مصر السهرانة ف عيون جاهين

مصر السهرانة ف عيون جاهين

النور ملو الشوارع
و مليون راديو والع
الساعة اتنين صباحا
لكن إيه الموانع ! ..
الخلق رايحة جايه
و الدنيا لسه حيه
مليانه بالهأَو أَو
و زعيق القهوجية
واحد يقول لواحد :
خليك يا عم قاعد
التانى يقول له :
شكرا
ده انا م المغرب مواعد
فيه سهره لسه عندى
فى بيت فلان افندى
ح ناكل حاجة حلوه
و نشرب تمر هندى
و اللى تروح دالقه جردل
فوق حضرة المبجل
طبعا صاحبنا يزعل
و ينفجر شتايم
و الحى كله يوصل
ما بين مصلح و لايم
اللى يقول : يا جماعة
و اللى يقول : يا بهايم
و مطرب الاذاعة
يصرخ ، و ف وجده هايم
و لو طرطقت ودنك ،
فى وسط دى العظايم ،
تسمع مسحراتى ،
بطبله صوتها واطى ،
بيقــــــــــــــــــــول :
اصحى يا نايم

من رباعيات جاهين

انا الذي عمري اشتياق في اشتياق
و قطر داخل في محطة الفراق
قصدت نبع السم وشربت سم
من كتر شوقي وعشمي في الترياق
عجبي !!!

الله على اختياراتك يا مامادو
تسلم ايدك
يا رب اكون ترجمت الاسم صح

الرائع دائما الاستاذ صلاح جاهين
ما زلت رغم رحيلك تمتعنا بأجمل الكلمات
واصدق العبرات
وما زال هناك من يعشقك ويتابع اعمالك
ويكتب مواضيعك
فتحيا لك
وتحيا لمن يتابعك

جميله قوى يا مامدو
تسلم ايدك
وفى انتظار مساهماتك القادمه

» مجموعة مختارة من شعر ( صلاح جاهين )
» قصاقيص ورق.....صلاح جاهين
» رباعيات صلاح جاهين
» من روائع صلاح جاهين..........
» اشعار صلاح جاهين