مجموعة مختارة من شعر ( فؤاد حداد )

مجموعة مختارة من شعر ( فؤاد حداد )

تعالى نلضُم اسامينا
الفله جنب الياسمينه

قنا سوهاج الاسماعيليه
بنت الصاعيده بحريه
الاقصر غزاله محَنّيَه
فى اسكندريه ترسّينا

و انا رشيدي و دمياطي
آخدك يا منصوره فى باطي
و اغني و ارقص سنباطي
قبل القمر ما ينسينا

و اعدّي ع الجيزه خَفَاجه
وردان ضلوعي الخفَّاجه
عيوني طلّت يا رفاقه
من وادي حَلْفَه على المينا

ع الضفتين ألقى ربوعي
و اعيد ميلادي و سبوعي
من كوم حماده ينبوعي
فى جرجا ابريق الزينه

بلبيس ح نلبس دبلتها
شربين شربنا فى قلتها
بعد المحله ما حلتها
بنها العسل راح تشفينا

و دنشواي اسمها اصبح
اجلّ شاهد بيسبّح
في المنزله الضىّ بيرمح
و في بحر يوسف سواقينا

و الشاي يا واسطه فى السكه
نقعد يا منيا على الدكه
توصل بني سويف الضحكه
نلاقي اسيوط و سطينا

عَصَرْت قلبي الجوَّاني
على التراب الأسواني
رجع يا نوبه عنواني
كوم اومبو رايقه و امينه

وطنطا شي الله يا سيّد
وطهطا نفْلَح و نشيّد
و نزور مغاغه و نعيّد
فى بور سعيد ع التراسينا

ومن السويس قلت يا لاللى
و القنطره فجر تملّي
و الوز الاخضر بيصلّي
على القنايه من سينا

تعالى نلضم اسامينا
الفله جنب الياسمينا

مسحرااتى
ــــــ
اصحى يانايم وحد الدايم
وقول نويت
بكره ان حييت

الشهر صايم
والفجر قايم
اصحى يانايم، وحد الرزاق
رمضان كريم

مسحراتى يامؤمنين

منقراتى مد الأنين

الله على رعشة الحنين

عمره ماكان الأمل ضنين

ياقدس يانوارة السنين

كأن عينى فى ميتمى

ياقدس مايحتمل دمى

الا أشوفك وأرتمى

وابوس ترابك المريمى

أبويا وابنى على فمى

ماأتوهش ياقدس فى المطال

ياعاصره مهجة الرجال

سقاك من دمعته الهلال

ياقدس ياسبحة الشقا

الأعمى فى سجدتك رأى

والفجر من صخرتك سقى

ياقدس تتفجر الجراح

والصبر حرب وأيوب صلاح

ياأخت من مكه والبطاح

قلبى انضرب للعرب وصاح

لابد من فتح فى الصباح

المشى طاب لى

والدق على طبلى

ناس كانوا قبلى

قالوا فى الأمثال

الرجل تدب مطرح ماتحب

وانا صنعتى مسحراتى فى البلد جوال

حبيت ودبيت كما العاشق ليالى طوال

وكل شبر وحته من بلدى

حته من كبدى

حته من موال

لما تقول أجمل مافى الدنيا

الميه للعطشان

يعرفوك عربى

أما للراوى ريحة البرتقان فى مداخل يافا

يعرفوك عربى

لما تقول ابنى اتولد لاجئ

يعرفوك عربى

لما تقول يارب

يعرفوك عربى

لما تباشر جهادك ، ترمى أوتادك

فى قلب دابح ولاد

يعرفوك عربى

اصحى يانايم وحد الدايم

السعى للصوم خير من النوم

دى ليالى سمحه

دى نجومها سبحه

اصحى يانايم

يانايم اصحى

وحد الرزاق
رمضان كريم

حب الوطن

******

ردى ياسهريه

الروح لهذى العين

النبض للخيالين

ياغنوتى السحرية

أنا كنت غايب فين

أنا كنت دايب فين

أنا كنت دايما فين

غيران من السحلية

الخضرا زى الشمس

والا غريق فى الأمس

والا فى غرام هندية

بين الجسد والرمز

والا فى شجر يواقيت

فى ساعة اسـتذكار

فى متجر المواقيت

والا كذا منقار

بيطور الحنية

بيلتفت بيهز

بياض فى ظل النهار

كأنه لبن البز

اللولى زى ماقلت لك

ببلاش

أربع بلاد ع الرصيف

وفى لفة السلم

الأولة ربع خالى

والتانيه عزوة خيالى

قرب وشوف موالى

بالطبع وفلسطين

الأولة مش صفيحه

مش علبة من هونج كونج

وجنيه كانت فصيحة

زى أرتفاع البرج

وبحر يوسف

وبير يوسف

بيناتهم شهر

واللى بيناتهم بلد

اللون رمادى شرد

زى الغزال من قرونه

والسبع من ديلة

بالطبع وفلسطين

واحنا فى آثار التاريخ

ولا فى آثار الحفر

ولا فى آثار النوم فى كلب الغرزه

الأوله مانى فاكر

والتانيه ماني فاتورة

كل القلوب مفطورة

على ايه ومن أيه

من حب الضنى وعليه

بالطبع وفلطسين

والأولة يا فلسطين

ياموشوشانى

فى القصيدة اللى فاتت

بعد الأوقات الى فاتت

بعد الزمان

اللى فات

كسروا رقبة المثل

لامات المثل ولا ماتت

فى دمى باتت

ردى ياسهريه

الروح لهذى العين

النبض للخيالين

ياغنوتى السحرية

أنا كنت غايب فين

أنا كنت دايب فين

أنا كنت دايما فين

اصحى يا نايم وحد الدايم

وقول نويت بكره ان حييت

الشهر صايم والفجر قايم

اصحى يا نايم وحد الرزاق

رمضان كريم

مسحراتي منقراتي

خالاتي عماتي سيداتي

على تل عجوه وعسل وسمن

ولا مجلس الامن سهرانين

لت وعجين يبنوا الهرم

قالت حماه المحترم

ياكعك ياسيد الكرم

نبنطلك في المشمشي

يابنت قومي وفرفشي

لاتحوشي ولا تختشي

احمي الوابور واستحمشي

اشي واشي تلاقيه مشي

اشي نغبشي واشي حبشي

واشي دندشي واشي انقشي

واشي ينحشي واشي رشرشي

سكر عليه بركه ايديه

فرحه عنيه قال ايه وايه

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

قال واحد اتنين تلاته واللي كان في الجرن

كله انفتل وانقتل وانشال وراح الفرن

عيني على رصه راحت ولا رصه جات

عمال اسحر وانا ماشي ورا الصاجات

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق

اصحى يا نايم وحد الدايم

وقول نويت بكره ان حييت

الشهر صايم والفجر قايم

اصحى يا نايم وحد الرزاق

رمضان كريم

مسحراتي منقراتي ع الطبله ايدي

ريشه ف دوايتي اسمع ياسيدي

اسمع حكايتي مع استماره

راكبه حماره اول ماراحت

راحت لحسني قالت ياحوستي

هو انت فاطر قال كنت فاكر

مش حانسى تاني خليك مكاني

الاستماره راكبه الحماره

راحت لفكري قال تيجي باكر

وتروح لزكري قال روح لشاكر

ولا لشكري ، شكري في اجازه

راحت لبهجت لا حط ماذا

ولا سألها اشر نقلها

راحت لهاني خليك مكاني

هاني الطاطوري قال فيما يبدو

حتروح لعبده لازم ضروري

ضروري لازم راحت لحازم

منه لتيفه شاغلاه لطيفه

منه لمكتب راجل مؤدب

ببدله بني قال لي اظني

في تاني اوده عند الموظف

ابو بدله سودا بدله رصاصي

قال لا مؤاخذه مش اختصاصي

ياسيدي لاظوغلي خلص لي شغلي

في تاني طرقه على شمالي

لبدله زرقا شرحت حالي

قال ثانيه واحده

والاستيماره من يومها قاعده

راكبه الحماره

لو كنت راكب ماكنتش اوصل

ولا أؤدي واجب ولا احصل واطلع بلاشي

احسن لي افضل على مهلي ماشي

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

انا صايم الشهر طول الشهر ودا فاطـــــر

وانا ماشي في الشغل قلبي سخن ودا فاتر

ما يـنـتـقـل شـبـر الا بـحــبـر ودفــــاتـــــر

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق

اصحى يا نايم وحد الدايم

وقول نويت بكره ان حييت

الشهر صايم والفجر قايم

اصحى يا نايم وحد الرزاق

رمضان كريم

مسحراتي ومعدي

منقراتي ومين قدي

الطبلة عاليه في احضاني

زي البيان زي النشره

في ستة اكتوبر عشره

من الهلال الرمضاني

كان قلبي صخر الحنيه

في المعركه للحريه

وللسلام اللي هداني

والنسمة هلت بحريه

يا مصر يا شهد الشهدا

الجنة شمسك وترابك

اصوم واصلى في محرابك

واسمع الشط الثاني

الله اكبر وأداني

اه من هواي في اوطاني

اه من شقاي ومن طربني

الارض تتكلم عربي

والدنيا تسمع بوداني

نور الوجود من وجداني

زقاقي يفتح لي ميداني

حبيبي خدني وعداني

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

دخلت دار بعد دار والكل بيحيي

انا اللي حي وشهيد في الجنه وفي حيي

الله اكبر كأن الشمس من ضيي

على ارض سينا في نار المعركه والصهد

وانا والتراب المنور انتصرنا لبعض

وكنت صايم ملكت من السماء للارض

وكنت عطشان ما حدش ارتوى زيي

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق

اصحى يا نايم وحد الدايم

وقول نويت بكره ان حييت

الشهر صايم والفجر قايم

اصحى يا نايم وحد الرزاق

رمضان كريم

مسحراتي منقراتي

ليله في حياتي

ومع السلامه ةبسمع بودني

حس يعاودني وبنتي وابني

مع السلامه

مشيت اعرّج عشان افرج

النجم رجرج مع السلامه

انا اللي حارت برجلي حاره

مع السلامه مطرح ما ادور

الاقي منورعمال يشور

مع السلامه

خالصين ياقافيه خليك بعافيه

مع السلامه

انا عيني بكّت وقلبي نكت

ناولني فكه مع السلامه

انا جاي بكره الاجر اجره

افطر بفطره و مع السلامه

انا بكرى ارجع اغني واسجع

تلايمني تسمع مع السلامه

و مع السلامه

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

رمضان مخلف هلال وهلال مخلف عيد

وكل يـوم من لـيـالـيـنا قــديـم وجــديـــد

خلـف بـنـيـه وصـبـي خـلف امـل وسعيد

وانا طـبـلتي تغـني غـنوه وتحكي حدوته

بالسمن ملتوته ونرجع نقول ونعيد

رمضان مخلف هلال وهلال مخلف عيد

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق

اصحى يا نايم وحد الدايم

وقول نويت بكره ان حييت

الشهر صايم والفجر قايم

اصحى يا نايم وحد الرزاق

رمضان كريم

مسحراتي منقراتي

منجراتي دواليب زمان

ما تشتكوشي دقة شكوشي

جت في الاوان يا ناس حبايب

يا ناس جيران انا قلبي دايب

على البيبان عجوز شويه

لكن عيني روحين حنان

لاظني سئ ولا جبان

درويش واوسطي وشيخ كمان

وفي عبي قطه

ازاي حتلعب فيه الفيران

تسـألني بتعب اقول صراحه

شقاي راحه قوة حصان

لاجل وعشان قبول عيالي

في الامتحان وانا في بالي

حاجات جنان من الطبالي

اعمل صيوان وابني لخيالي

اربع حيطان دا انا في انتقالي

من اولى ساقيه لسد عالي

لقيت مكان سيري يا موجه

بالتكنولوجه لبر الامان

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

لو ماشي في الصحراء شفت النور اقول انسان

دا انا كل شباك يقيد اشكر لايد انسان

واقول هدتني المناير سبحت للعرش

يا رب من رحمتك مكنت للانسان

يغير الضلمة اما النور ما يتغيرش

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق

يا مراجيحي

الحركة البركه

يا مراجيحي

يا علو حلو

يا مراجيحي

صابحين فاطرين لابسين أخضر

كلنا على بعضنا بندور

لسة امبارح كنت منور

بفلوسي فانوسي الوحاويحي

يا صلاة النبي نازلة وطالعة

عقل وخف ولعب وصنعة

أنا طتاير وفي ريحي القلعة

أنا طاير والقلعة في ريحي

زغروطة في قلبك من جوه

تنده على أش تلاقيه هو

والدنيا تقول لك يا بو قوة

ما أحلي مجاياتي ومراويحي

والهوا على البحري وعلي ودنه

والشاطر أكبر من سنه

والجد يقول أوعي تونوا

واش قد الجد التفاريحي

قلب عبد الناصر

يا قلب عبد الناصر

وانت اللي فيك الرحمه

وانت الحزين ودموعك

خيط الأمل

كل المسالك ظلام

والعقل هادي

ياما طلوع الفجر

كان الثواب والأجر

قلبك نهض للأمر

نهض لأمر شديد

وعينيك رمت لبعيد

لضيّ دايما سعيد

انت اللي زيه قريب

يا قلب دايما طيب

وقبل طيب وصادق

وقبل كل المبادئ

مواطن الأمهات

من موقع الشعب ناطق

عمان دخلها الليل

والنوح على الأرض خالد

من الشقا واليتم

ولا شهيد إلا والد

ولا عيله إلا أم

والحق دايما واحد

والظلم دايما ظلم

زي الرصاص البارد

زي الرصاص السمّ

يا قلب عبد الناصر

قوم للجهاد والفرض

ولاجتماع الملوك

ويتامى يستعجلوك

الله يحب الجهاد

ويحب الاستشهاد

والابتسامه اللي عرض

الأرض والسموات

الله يحبك

انت المثال العالي

اسمك شجر في الناس

رافع أتم جبين

دايس على التعابين

تستقبل المجهود

واضح رحيب الصدر

شعب الحنان والجود

أصلب رجال الصبر

تعرف تلاقي الصخر

تعرف تلاقي منين

تملك ثبات العين

ضد العيون العرجا

انت اللي جاي معانا

انت الأمل في دعانا

محملينك أمانه

يا قادر الإنسانيه

يا صادق الابتهال

يا ماضي في المسئوليه

زي الصلاة الأولى

تكبيرة الأجيال

الله يحبك

انا والدى كان أراجوز

انا والدى كان أراجوز..

وكان راخر جميل الصوت .. والزعبوط..

وفى يوم من الأيام .. خللى بالك معايا ..

هنا العقده .

ندهه الملك .. وده كان ملك أعظم من العمده ..

وعينه .. مضحك ولى العهده ..

وقاله يا ألعب من القرموط ..

تضحك الولد .. أعلى مراتبك ..

تبكى الولد .. أقطع رقبتك ..

أفهم كلامى .. وأمشي بالمظبوط ..

أنا والدى الله يمسيه بالخير ..

ماكنش ناقصه .

طلع سلاح أبيضانى .. وقطع رقبته بنفسه ..

راح الولد فى البكا .

وأنا والدى مات مبسوط .

أنا والدى مات مبسوط عشان عكس امر الملك ..

أيام ما كان الملك .. ملك ..

ومصروف الأمل مضغوط .

من يومها وأنا عندى جيوب انفيه ..

وعيونى كما الحنفيه .

والدمع منى و فيه .

بحر ماله شطوط.

مجموعة مختارة من شعر ( فؤاد حداد ) Images?q=tbn:ANd9GcShL45PB15f4RNbwzvfyaai5_sLq-fV9f1cCfIV0Apv_UFKhm-4sw&t=1

مجموعة مختارة من شعر ( فؤاد حداد ) 8223%20(1)

فؤاد حداد

فؤاد حداد من أبرز شعراء العامية في منتصف القرن العشرين، فهو المؤسس الحقيقي لشعر العامية الملحمي في مصر، وكان دائما ما يعرف نفسه قائلا: أنا والد الشعراء فؤاد حداد. أطلق عليه كذلك فنان الشعب، حيث استلهم من الشعب المصري، عدد من الملاحم التي كتبها، مثل أدهم الشرقاوي.

لد فؤاد سليم حدٌاد بحى الظاهر بالقاهرة، والده سليم أمين حدٌاد ولد في 5 يونيو 1885 في بلدة 'عبية' بلبنان في أسرة مسيحية بروتستانتية لوالدين بسيطين اهتما بتعليمه حتي تخرج في الجامعة الأمريكية في بيروت متخصصا في الرياضة المالية ثم جاء إلى القاهرة قبيل الحرب العالمية الأولي ليعمل مدرسا بكلية التجارة جامعة فؤاد الأول ويحصل علي لقب البكوية وعندما تنشأ نقابة التجاريين في مصر تمنحه العضوية رقم واحد، وما زالت كتبه وجداوله تدرس باسمه حتي الآن.

أما والدته فهي من مواليد القاهرة في 19 يونيو 1907م جاء أجدادها السوريون الكاثوليكيون الي مصر واستقروا فيها وولد أبواها في القاهرة. أبوها من عائلة أسود التي جاءت من دمشق الشام وأمها من عائلة بولاد من حلب، وفي المعتقل تحول "فؤاد حداد" إلى الإسلام.

تعلم في مدرسة الفرير ثم مدرسة الليسية الفرنسيتين، وكانت لديه منذ الصغر رغبة قوية للمعرفة والإطلاع على التراث الشعري الذي وجده في مكتبة والده، وكذلك على الأدب الفرنسي من أثر دراسته للغة الفرنسية. اعتقل فؤاد حداد عام 1950 لأسباب سياسية، ثم عاد واعتقل مرة أخرى عام 1953.

نشر حداد ديوانه الأول "حنبني السد" بعد خروجه من السجن عام 1956، واعتقل مرة أخرى عام 1959 لمدة خمس سنوات، وخرج ليكتب في شكل جديد لم يكن موجودًا في الشعر العربي، وهو شعر العامية فكتب أشعار الرقصات مثل "الدبة" و"البغبغان" و"الثعبان" وغيرها.

كتب "المسحراتي" لسيد مكاوي 1964 وكتب له البرنامج الإذاعي "من نور الخيال وصنع الأجيال" 30 حلقة عام 1969 والذي كانت أغنية "الأرض بتتكلم عربي" قطعة منه. أصدر 33 ديوان منها 17 ديوان أثناء حياته والباقي بعد وفاته ولابنه الأكبر هو الشاعر أمين حداد، وهو يعتبر أحد الشعراء الذين خرجوا من عباءة والده مسحراتي الشعراء، وله ابنان آخران هما سليم حداد وهو الاخ الاكبر وحسن حداد وهو الاخ الاصغر

كان ديوانه الأول "احرار وراء القضبان" عام 1956 ثم "حنبني السد" 1956 ومن أهم دواوينه "قال التاريخ انا شعر إسوَد".. ديوان ترجم فيه الشاعر مختارات من الشعر الفييتنامي 1968، "المسحراتى" 1969.

ومن أبرز القصائد التي كتبها ضمن تلك السلسلة: سلام، وحسن أبو عليوة، الاستمارة، الكحك، النسمة هلت، والله زمان، يا هادي، بعلو حسي، افتح يا سمسم، في الغيط نقاية، عنتر، ألف باء، هلال، حرفة هواية، التبات والنبات، دواليب زمان، على باب الله، الأرض بتتكلم عربى.

كلمة مصر 1975.
من نور الخيال وصنع الاجيال في تاريخ القاهرة 1982.
استشهاد جمال عبدالناصر 1982.
الحضرة الزكية 1984.
الشاطر حسن 1985.
الحمل الفلسطيني 1985.
أشعار فؤاد حداد ويضم خمسة دواوين 1984، وكذلك ميت بوتيك، ويا أهل الامانة، أيام العجب والموت، ويوميات العمر الثاني – ديوان أم نبات حققه فؤاد حداد وغيرها..

إلى جانب قصة الأمير الصغير لأنطوان دي سان إكزوبري التي ترجمها عن الفرنسية إلى مسرحية غنائية بالعامية المصرية.

وله أعمال أخرى منها:

أدهم الشرقاوي
حسن المغنواتي
أم نبات
مرآة الصوت

على باب الله

فنان فقير على باب الله
الجيب ما فيهشي ولا سحتوت
والعمر فايت بيقول آه
والقطر فايت بيقول توت
صحيتني ليه يا شاويش يا شاويش
أنا كنت سارح في الملكوت
لما بنام بحلم وباعيش
لما بفوق ما بفوقشي بموت
وتقول على كبير السن
وانا في قلبي ولد كتكوت
وتشوفني ببكي وبانعي وائن
والدنيا لسه بنت بنوت
اشمعنى قلبي ضناه الشيب
من الشقا مهري ومنكوت
قال اللي قال العيب في الجيب
والجيب ما فيهشي ولا سحتوت
والعمر فايت بيقول آه
والقطر فايت بيقول توت
علي المحطة يا ولداه
حتى المحطة كمان حتفوت

الحضرة الزكية

يا اهل الأمانه والندى والشوق، يا مجمّعين
الشمل الحضره الزكية، أوِّل ما نبدي
القول نصلّي على النبي

المصطفى سيّد ولد عدنان
آه يا مُنَى عَيْني مُنَى عَيْني
يا سيّدي يا ابن الذبيحينِ
انت الأمين في هلال محرّم هاجر
ذكر هلال نادى على الأم هاجر
إذ هَرْوَلَت بينَ الصفا والمرْوَه
وبكت ليالي واسماعيل لم يَرْوَ
بتواجه الريح اللي تعوِي وتجلد
وحجر وظلمه وخوف وشمس ورمل
وكأنها بتحمل ضناها وتولد
واتوحّمتْ ع الميّه طول الحمل
حفيتْ عينيها ولمّا سالت زمزم
بعينيها سالت وارتوى الظمآن
قالت عينيها تبسَّم
عدّت غمامه تنسَّم
ريح الحجاز وَتَوسَّم
أحب أرض الله وطن للزمان
ورجع خياله لحدّ أوِّل يوم
سمع الخليل يطلب من الرحمن
تهوِي إليهم أفئده من القوم

اقبل فؤاد من أفئده

تهوِي إليك

يا خالق العود البريء
كان الفؤاد زي الحريق
لا ماء ولا زرع يبلّ ريق
والأم تبكي على الطريق
هاجر هناك الوالِده
اقبل فؤاد من أفئده

تهوِي إليك

العين ما تعدمش الدليل
الدمع في الخد البليل
من فجر أيّام اسماعيل
هاجر تنادي على السبيل
زمزم تردّ على الندا
اقبل فؤاد من أفئده

تهوِي إليك

لما رأى الرؤيا خليل الله
نادى وأخد ولده على يمناه
ما أبعده منّه وما أدناه
فين تبدأ الأشواق وفين المرسى
أنا شفت من برَّه وجوَّه عينيَّ
الشمس ماشيه بتبكي زيّ الخرسا
وبلغ معاه السعي قال يا بنيَّ
شفت اسماعيل في عيونه إنسانان
دمعة حنان زيّ ابتسامة حنان
بيقولوا يا أبتي بأجمل حسّ
كان نصل ما يحتاج إلى سنّان
ورمش نايم في الحجر بيمسّ
اللهُ أكبر أيها المؤمنان
سجد ابراهيم للي ناداه يا ابراهيم
ورأى اسماعيل الدنيا زيّ الميدان
الله هُوَ الرحمنُ وَهوَ الرحيم
والناس إلى الكعبه في نور الأدان

أقبل فؤاد من أفئده

تهوِي إليك

يا قوة الجفن الجريح
لا يرضى بالدمع المريح
ينظر إلى الموت الصريح
النصل فوق نحر الذبيح
الله قبل فيه الفدا
اقبل فؤاد من أفئده

تهوِي إليك

أمري إلى الله الرحيم
على الصراط المستقيم
سبّحت للعرش العظيم
تحت السما وكان إبراهيم
يرفع أساس الأعمده
اقبل فؤاد من أفئده

تهوِي إليك

لما فؤادي اهتدى لمعناه
سجد في صدري شاكرًا لله
اقبل فؤاد بيقول أنا لبّيت
وسعيت لأعتاب الذي حبّيت
من أرض خضرا ومن جبل حجّيت
ومن البراري والعواصم جيت
لك يا بلد يا آمنًا يا بيت
وكأني طاير أو كأني حبيت

اقبل فؤاد من أفئده

تهوِي إليك

يهوي إليك في كل حين
يهوي إليك في الخاشِعِين
والطائِفين والعاكِفين
وفي كل دعوه تقول آمين
منّى ومن أمّ البنين
والأرض تتلقّى الجبين
بين الجموع الساجِده
اقبل فؤاد من أفئده

تهوِي إليك

يقولُ عبدٌ من عبادِ الله
شاعر ولا مرّه فؤادي انعصر
إلا استفاد المعرفه وانتصر
ويبوس على هذا الأثر والأثر
وفي حبّ هاجر يختم الراوِيَه
بكلمه أطيب في النبات والوتر
مما لو انّ السيل وكلّ المطر
وكلّ أنهار البلاد راوِيَه
صلّى الإلهُ على الرسولِ وسلّم
"صلّوا عليهِ وسلّموا تسليما"

الأرض بتتكلم عربى

ياسامعين : أبناء بلد واحده

تحت السما الواحده وياما جرى

مرت سنين ع الدنيا متقدره

الغرب سماها العصور الوسيطه

ونظر وقال كان الزمن مظلم

أما الحقيقة البسيطة

بتقول فى دار الشرق

مهما جرى ومهما يجرا

من أول تاريخ الهجرة

كان عندى فجر أنشق

نوره فى عين الجبارين مؤلم

حتى اذا ما ألتقوا بالفارس المسلم

عرفوا الحقيقة وعظموا فارس

صلب القوام والدرع تحت العمامة

حتى اذا مانزل من السرج ونصب خيمة

سهل الدموع الا أبتسام الراضي

مايل بجسمه لأستماع الأراضي

وعلى العيدان الطرية

ايديه نديه كيف أيدين الفارس الغارس

هذا الذى رد الثغور البهيه

وبنى باسماء الأئمة المدارس

وحضر مع الخصم لمقام القاضي

وأعاد الى الأم الصليبيه ابنها

أما عن المنكر نهى

وأما فى ليلة شجن بالشام

حلف يمين أفضل له

يفقد ولاده ومؤنسته ولا يهدم

هذا صلاح الدين فتى مقدم

حامل لواء الفتيه والأجناد

فوق الخيول المسرجات الجياد

وهى ليله من ليالى ربيع

أو هى ليله من ليالى جماد

القاهرة أولى رايات الجميع

عند المقطم كبرت للجهاد

يارب تشفى الصدور

يارب توفى الأمهات الندور

يارب تمنع عن ولادنا الويل

زاحفين على السواحل سلاسل نور

والبحر من دمياط يحيي السيل

واترتبت ع الخطوة رجلين الشهور

والصبر أملك من عنان الخيل

حتما على قدام وحتما ندور

والحصن فى عكة عظيم الليل

يلقى الآذان بيشق فوق السور

الحق ياولاد العرب منصور

فى كل أرض اتكلمت عربى.

************

الأرض بتتكلم عربى وقول الله

ان الفجر لمن صلاه

ماتطولش معاك الآه

الأرض ..الأرض .. الأرض

الأرض بتتكلم عربى

***

الأرض بتتكلم عربى ومن حطين

بترد على قدس فلسطين

أصللك ميه وأصلك طين

الأرض ..الأرض .. الأرض

الأرض بتتكلم عربى

***

الأرض بتتكلم عربى سبل وكروم

تجرى اللقمه على المحروم

ما تثبتش حصون الروم

الأرض ..الأرض .. الأرض

الأرض بتتكلم عربى

***

الأرض بتتكلم عربى ياخيال

بيعد سيفك أم عيال

ظهرك ياما من الأجيال

الأرض ..الأرض .. الأرض

الأرض بتتكلم عربى

***

الأرض بتتكلم عربى حتى البور

بنت الساقيه والطنبور

حتى فى بطون الأرض قبور

الأرض ..الأرض .. الأرض

الأرض بتتكلم عربى

***

الأرض بتتكلم عربى بوجد وشوق

الفرع اللى يهم لفوق

لأجل الجدر يشم الضوء

الأرض ..الأرض .. الأرض

الأرض بتتكلم عربى

***

الأرض بتتكلم عربى جدورها جدود

مد اتوسع زى العود

انت الباكر والمولود

الأرض ..الأرض .. الأرض

الأرض بتتكلم عربى

***

الأرض بتتكلم عربى ولا ترتاح

واصل كالسيل المجتاح

فتحك ياعبد الفتاح

الأرض ..الأرض .. الأرض

الأرض بتتكلم عربى

صوتك فى صوتى أعلى صوت إنســان

هل المراسلة ممكنه بالشعر

يا عم يا أبنودى ؟

هل الفطار والقعده

ممكن والمساعده

القطر

صفافيره مبتعده

إيديه مرتعده

صوتك لكل الناس

يرجى

كمثل أخ من أب نودى

تعرف شريعة

سجعى فى الإحساس

وفى الأحداث

انا قلبى عمره ما داس

صوتك وصوتى

صريخ العين ، ونبت يومين

ألفين سنه

من التاريخ ، والطمى والمقياس

أيوب فى عصر الجبرتى ولاّ ابن إياس

السجن عاضض زورى ومخربشه

لماكان بيسقى النيل .. وبيبشبشه

جلنبلق بلق قء صوت الباب الكبير

إذا انغلق قء قأ

واذا انفتح بتدافع الطوابير

للنسمة والتعبير

والوعد والتصبير

صوتك صريخ القلب والقلبين

صريخ القلوب

رايحين لبعض بقوة المغلوب

إن كان عليهم يزحفوا بيزحفوا

ويعوموا .. بيعوموا

ويطيروا .. بيطيروا

فى بطن الأرض ..

يا عيونى اللى تحت عيونى

بيرسمونى سعيد وبيغنونى

صوتك فى صوتى أعلى صوت إنسان

وأهدا صوت إنسان

يرمى الشبك فى البحر عند اللسان

منظر فييتنامى ..

لما انتشر واتلف

زى الرحايه ولا أتقل وأخف

" يا بلدنا لا تنامى

صوتك ميزان عادل

بدليل ما قام السد

شلال مشرّخ بالجدل

والجلد والجنادل

صوتك رأيته بعينى

الفرن قايد

والظهر زى الطواله يستلم لأرغفه

الظهر زى الطواله

يا لهفة الأمهات

طول الصعيد

الدم فاير والسراير حبالى

كان عندى بيت المقام

" الحق دايماً مستبد وساطع "

خليته

يمشى على رجليه

ورجلى

" شمس الحقيقه تحر "

سحالى

أنا حرّه وأموت في الحريّه

ومزاجي أعمل سحلـيّـه

أزحف ع الأرض وع الحيطه

واطلع وانزل واعمل زيطه

واضرب في الشمس طرمبيطه

أنا حره بديلي وبراسي

وماحدّش يكتم أنفاسي

وما احطش ماسك لإحساسي

ولا احط قزاز

ولا أقفل شيش

عقلي يا هزاز

كلّك نغاشيش

وأنا حره أعيش

أنا عاوزه أعيش

أنا بدي أعيش

أنا نفسي أعيش

على كيف كيفي

أنا حرّه وأموت في الحريّه

ومزاجي أعمل سحلـيّـه

أرقع في الشمس الزغروطه

واخد حمام من غير فوطه

أنا حره براسي وبديلي

حره بنهاري وبليلي

حره بمناخيري القطقوطه

أنا حره بخشمي ماهوش خشمك

وما احطش برقع ولا يشمك

ولا احط قزاز

ولا أقفل شيش

عقلي يا هزاز

كلّك نغاشيش

وأنا حره أعيش

أنا حرّه وأموت في الحريّه

ومزاجي أعمل سحلـيّـه

أنا ابقى سحليه وسيمه

ويجيني برص بتاع سيما

وبتاع مزيكا وترا لم لم

واتاوي في حضنه وأنا باحلم

ويقول لي ابتسمي يا بسيمه

وافرحي بالميه وبالخضره

ماتحطيش احمر ولا بودره

ولا احط قزاز

ولا أقفل شيش

عقلي يا هزاز

كلّك نغاشيش

وأنا حره أعيش

أنا حرّه وأموت في الحريّه

ومزاجي أعمل سحلـيّـه

سحليه وحبايبي سحالي

أنا حره بحالي ومحتالي

حرة أصحصح والا أسخسخ

والا أغني وقلبي يشخشخ

أبواب الدنيا فاتحه لي

ما اقعدشي في الأوده لوحدي

وما احطش إيدي على خدي

ولا احط قزاز

ولا أقفل شيش

عقلي يا هزاز

كلّك نغاشيش

وأنا حره أعيش

أنا عاوزه أعيش

أنا بدي أعيش

أنا نفسي أعيش

على كيف كيفي

في حب مصر

مفيش في الأغاني كده ومش كده
تفرقنا عن بعض بالشكل ده
يا مصر اللي جايبة الشجر من زمان
وشايلة الضفاير على البرتقان
وقبل الأوان اللي قبل الأوان
بتحييني أنفاسك المسعده
مفيش في الأغاني كده ومش كده
تفرقنا عن بعض بالشكل ده
يا حلوة كلامك تحبه الودان
يشمسني في الدروه زي الميدان
يمشيني بين الحيطان الغيطان
عروسه وحصان في القمر والعدا
مفيش في الأغاني كده ومش كده
تفرقنا عن بعض بالشكل ده
عنيكي تغمض وتفتح يبان
سطوح الليالي عليه الأمان
وبحر الدره من ورق لامتحان
وبتغني موّالي يا مولّده
مفيش في الأغاني كده ومش كده
تفرقنا عن بعض بالشكل ده
بحبك كأني طليق العنان
و زى العجوز اللي دق البيبان
وزي الكتاب اللي كان ياما كان
وزي الرصيف اللي في السيده
مفيش في الأغاني كده ومش كده
تفرقنا عن بعض بالشكل ده

الامل

حيكون يوم زى تلاته و عشرين
من شهر يوليه
تموز
حيكون يوم زى الفاتح
من شهر زى نوفمبر
و الدنيا كل الدنيا حتكبر
فى صف واحد من تمام الصلاة
أستغفر الله
فى ايدين العدو المسجون
مسرى النبى و جبل الزيتون
حيكون
يوم فى تاريخ أكبر من الحرية
أكبر من الحرية

يا دمعة العين ما تخافيش تجرى
لابد منك فى الحماس الحق
الدنيا صيف و الجو مش أخضر
و الموت ماهوش فى صفحة الوفيات
و لابد من اتنين
الجوع و ناكل
العطش ونشرب
الحياة والموت
الهزيمة و ننتصر
الصبر
لكن مافيش صبر فى الدنيا يقدر
و إن كنت عمرى ميت سنة
و إن كنت ميت الف لاجئ
مافيش صبر فى الدنيا يقدر
يفطمنى عن وطنى
يا لاجئين طالعين على الضفة
متغربين مستغربين باصين
بعيون طويلة زى نور الشمعة
بوجوه شامية زى والدى صغير
بإيدين بطيئة من الطبق للفم
حيكون يوم و حيكون أم للأيام

يوم فى التاريخ أكبر من الحرية
أكبر من الحرية و البترول
الدم والبترول
الساعة والزلزال
فى كل شبر هلال
بس نمشى
و الأرض بالنبض اللى قال بورسعيد
تعرف تقول و تعيد
و الأمل و جدوره مليون شهيد
مايتقلعشى
و يا صبر ليل
الفجر فى الفجر يدن

على باب الله

فنان فقير على باب الله
الجيب ما فيهشي ولا سحتوت
والعمر فايت بيقول آه
والقطر فايت بيقول توت
صحيتني ليه يا شاويش يا شاويش
أنا كنت سارح في الملكوت
لما بنام بحلم وباعيش

لما بفوق ما بفوقشي بموت
وتقول على كبير السن
وانا في قلبي ولد كتكوت
وتشوفني ببكي وبانعي وائن
والدنيا لسه بنت بنوت
اشمعنى قلبي ضناه الشيب
من الشقا مهري ومنكوت
قال اللي قال العيب في الجيب
والجيب ما فيهشي ولا سحتوت
والعمر فايت بيقول آه
والقطر فايت بيقول توت
علي المحطة يا ولداه
حتى المحطة كمان حتفوت

مفيش في الأغاني كده ومش كده

مفيش في الأغاني كده ومش كده
تفرقنا عن بعض بالشكل ده
يا مصر اللي جايبة الشجر من زمان
وشايلة الضفاير على البرتقان
وقبل الأوان اللي قبل الأوان
بتحييني أنفاسك المسعده
مفيش في الأغاني كده ومش كده
تفرقنا عن بعض بالشكل ده
يا حلوة كلامك تحبه الودان
يشمسني في الدروه زي الميدان
يمشيني بين الحيطان الغيطان
عروسه وحصان في القمر والعدا
مفيش في الأغاني كده ومش كده
تفرقنا عن بعض بالشكل ده
عنيكي تغمض وتفتح يبان
سطوح الليالي عليه الأمان
وبحر الدره من ورق لامتحان
وبتغني موّالي يا مولّده
مفيش في الأغاني كده ومش كده
تفرقنا عن بعض بالشكل ده
بحبك كأني طليق العنان
و زى العجوز اللي دق البيبان
وزي الكتاب اللي كان ياما كان
وزي الرصيف اللي في السيده
مفيش في الأغاني كده ومش كده
تفرقنا عن بعض بالشكل ده

» مجموعة مختارة من اشعار ( فؤاد قاعود )
» مجموعة مختارة من شعر الأبنودى
» مجموعة مختارة من شعر الشاعر ( على سلامة )
» مجموعة مختارة من اشعار ( سيد حجاب )
» مجموعة مختارة من شعر ( أحمد رامى )