مجموعة مختارة من اشعار ( سيد حجاب )

مجموعة مختارة من اشعار ( سيد حجاب )

لخابيط
سيد حجاب

يا مصرى ليه دنياك لخابيط...والغلب محيط
والعنكبوت عشش عل الحيط...وسرح عل الغيط

يا مصرى قوم هش الوطاويط...كفاياك تبليط
صعبه الحياه والحل بسيط...حبة تخطيط

فتحت باب إستيرادك
وصرفت فوق ضعف إيرادك
حلى للخواجه إستكرادك
سابك بتقرا فى أورادك
وده أشطك ونزل تشفيط
ومهولاتى تحب تزيط
ساعة الفرح زغاريط تنطيط
وفى المياتم هات يا صويت
وفى المظاهرات سخن تشيط
وفى الانتخاب تنسى التصويت

وليه بترشى وتتساهل
وتبيع حقوقك بالساهل
تستاهل النار تستاهل
ياغويط ويحسبك الجاهل
ساهل وساهى وغبى وعبيط

يا مصرى يا اللى الغلا عصرك
والنهب فى عصرك حاصرك
قوم للحياه وأسبق عصرك
ولا حاجه هاترجع مصرك
إلا أن تكون شغال ونشيط

يا مصرى ليه دنياك لخابيط...والغلب محيط
والعنكبوت عشش عل الحيط...وسرح عل الغيط
يا مصرى قوم...هش الوطاويط...كفاياك تبليط
صعبه الحياه والحل بسيط...حبة تخطيط

سلوا قلبى

سلوا قلبى وقولوا لى جوابا * لماذا حالنا اضحى هبابا
لقد زاد الفساد وساد فينا * فلم ينفع بوليس او نيابه

وشاع الجهل حتى ان بعضا * من العلماء لم يفتح كتابا
وكنا خير خلق الله صرنا * فى ذيل القايمة وف غاية الخيابا

قفلنا الباب احبطنا الشبابا * فادمن او تطرف او تغابى
ارى احلامنا طارت سرابا * ارى جناتنا اضحت خرابا

وصرنا نعبد الدولار حتى * تقول له انت ماما وانت بابا
وملياراتنا هربت سويسرا * ونشحت م الخواجات الديابه

ونهدى مصر حبا بالاغانى * فتملؤنا اغانينا اغترابا
وسيما الهلس تشبعنا عذابا * وتشبعنا جرائدنا اكتئابا

زمان يطحن الناس الغلابة * ويحيا اللص محترما مهابا
فكن لصا اذن او عش حمارا * وكل مشا اذن او كل كبابا

ودس ع الناس اوتنداس حتى * تصير لنعل جزمتهم ترابا
امير الشعر عفوا واعتذارا * لشعرك فيه اجريت انقلابا

وما نيل المطالب بالطيابه * دى مش دنيا يا شوقى بيه دى غابه

لو كنت أمير من أمراء الحواديت

لو كنت أمير من أمراء الحواديت

كنت ادى لكل فقير وفقيرة بيت
بيت بجنينة مليانة زهور
وبعشة مليانة كتاكيت
وأعلّق فوقه قمر بنور
ونجوم لولى... فتافيت فتافيت

لوكنت أمير
من أمراء الحواديت

كنت ادى لـ... وزرائى محاريت
علشان يشتغلوا بايديهم ويشوفوا ازاى
الأرض السمرا لما نحرتها كدة رايح جاى
بتطلع غلّة وبن وقطن وضل وشاى
وتطلع غاب نعمل منه الأرغول والناى

لو كنت أمير
من أمراء الحواديت

كنت أدّى لكل الأطفال الحلوين ألعاب
قطر بقضبان..فرشة ألوان.. مية أو زيت
وابنيلهم قصر على المالح من غير أبواب
قصر بقبة لولى وقبة مرجان
وأعلّق عالقبة أجراس
فضة ومرمر ودهب ونحاس
لكن قبل ده كلّه

لو كنت أمير
من أمراء الحواديت

كنت ادّى لكل الناس
وردة وكتاب

وردة وكتاب
وكمان قبل ده كلّه
قبل ده كلّه

لو كنت أمير
من أمراء الحواديت

كنت أرفرف زى النسمة وادخل فى الحلق
وأقطّع نص السنة الخلق
نص اللى مابيقولش الحق
علشان يتعلمه
امتى يقولوا أيوة
وامتى لأ

ده لوكنت
أمير
من أمراء الحواديت

سيد حجاب
الحدود

واحنا فايتين ع الحدود
مستمرين في الصعوود
اختفى النيل الجميل من تحتنا
و المدن و الريف و أول عمرنا
و ابتدى شيء ينجرح جوه الوجود
و ابتدينا أسئلة ملهاش ردود
ميلنا عالشباك نخبي
دمعة فرت مننا

باصة مالشباك على البحر البعيد
واحنا داخلين بالأمل عالم جديد
كنت فاكرة يا مصر اني زهقت منك
و إكتشفت إني محال أستغنى عنك
حتى دوشة صوت جيراني
و الزحام وحشوني تاني
بسمة حلوة لطفلةلسة صغيرة
لما كنت أديها حتة سكرة
قبل مانفوتك وحشتينا
يا مصر يا أمنا
و ابتدى شيء ينجرح جوه الوجود
و ابتدينا أسئلة ملهاش ردود
ميلنا عالشباك نخبي
دمعة فرت مننا

كنت بتذكر و أنا في غاية الأسى
لعبنا الكورة في حوش المدرسة
و الشقاوة واحنا لسة صغيرين
و البراءة و الصحاب الطيبين
لما سألتني اللي جنبي
إنت مصري ؟؟...دق قلبي
إسم زي السحر رفرف عالمكان
زي نسمة مهفهفة بصوت الآذان
أيوة مصريين لآخر
كل نقطة في دمنا
و ابتدى شيء ينجرح جوه الوجود
و ابتدينا أسئلة ملهاش ردود
ميلنا عالشباك نخبي
دمعة فرت مننا

الوجوه من ثلج و عيون من قزاز
شوقي زاد للعشرة و الناس العزاز
و إبتديت أكتب و أنا فوق السحاب
إبتديت يا حبيبي في أول جواب
مصر إنتي حتة مني
مش مجرد إسم وطني
قالوا فاضل نص ساعة عالوصول
قلت ايه معنى الساعات و الا الفصول
إلا في الأرض اللي فيها
ذكرياتنا و حبنا
و ابتدى شيء ينجرح جوه الوجود
و ابتدينا أسئلة ملهاش ردود
ميلنا عالشباك نخبي
دمعة فرت مننا

هنا القاهرة

هنا القاهرة الساحرة الآسِرة الهادرة

الساهرة الساترة السافرة

هنا القاهرة الزاهرة العاطرة

الشاعرة النيّرة الخيّرة الطاهرة

هنا القاهرة الساخرة القادرة

الصابرة المنذرة الثائرة الظافرة

صدى الهمس في الزحمة و الشوشرة

أسى الوحدة في اللمة و النتورة

هنا الحب و الكدب و المنظرة

نشا الغش في الوش و الإفترا

هنا القرش و الرش و القش و السمسرة

هنا الحب و الحق و الرحمة و المغفرة

و انا ف قلب دوامتك الدايرة بينا

بصرّخ بحبّك يا أجمل مدينة

يا ضحكة حزينة .. يا طايشة و رزينة

بحبّك و اعفّر جبيني في ترابك

و اعيش في رحابِك و أقف جنب بابك

جنايني أروي بالدم وردة شبابك

يا زينة جنينة حياتنا اللعينة

بحبّك يا بنت اللذين

بحب البحر

بحب البحر لما يزوم
وبعشق صرخته فى الريح

وأحس فى موجه شوق مكتوم
لناس حرة وحياة بصحيح

وأحبه لما يتهادى
وأدوب لما يوشوشنى

ويفرش موجه سجادة
فى أحلامى تعيشنى

مالوش أول مالوش آخر
قراره طاوى أسراره

ودايما فى الهوا مسافر
ولا نهاية لمشواره

بحب البحر وأعشق صرخته وأنه

وأحب الناس ماهم فيهم حاجات منه

وأحبك ياللى احلامى فى هواكى زهزهوا وغنوا

يا بلدى ياللى وأنا فيكى عيونى إليكى بيحنوا

بحب الورد فوق السور
وباعشق ضحكته الفانية

وأحس فى ريحته شوق مسحور
لناس حرة وحياة تانية

وأحبه بين إيدين عشاق
رسالة مهفهفة بأشواق

وحتى وهو بين أوراق
كتاب العشق ذكرى فراق

حياته فى الهوا ليلتين
وعمره ماكان بعمره خليل

يرش هواه على الماشيين
ويتقاسموا مع الجايين

أحب الورد وأعشق ضحكته وأنه

وأحب الناس ماهم فيهم حاجات منه

وأحبك ياللى احلامى فى هواكى زهزهوا وغنوا

يا بلدى ياللى وأنا فيكى عيونى إليكى بيحنوا

بحب الورد وأحب البحر وأحب الناس

وأحب نعيشها أحرار مرفوعين الراس

ولا تفرقنا لا الألوان ولا الأديان ولا الأجناس

وأدوب فى أذان يرفرف تحضنه أجراس

تعالوا نقيم لبكره الجاى ياناس قداس

بحبّك

حتة حلم غنتها شادية

أما أنا يا ابني شفت لك امبارح حتة حلم
أغرب من أغرب فيلم
شُفت لك الديك بطاقية حمرا و جلابية
واقف بيكلّم شمس الصبحية
يا شموسة يا ام ضفاير دهبية
دهبِك فالصو.. قُصّيه و ارميه

الشمس انكسفت خالص
بقى لونها أصفر خالص
زي لمونة من الدهب الخالص
و انعصرت خالص
و قالت له بصوتها الدهبي
تقصد إيه؟

قال لها
لو سبتي السما و نرلتي السوق
الناس حيبصوا لك من تحت لفوق
و يقولوا
و دي تنفعنا بإيه؟

لو كنتي جنيه
كنت اشتري بيكي مصاصة و بالون اتنطط بيه
لو كنتي جنيه أو حتى قرش نحاس
مش كنتي بقيتي مفيدة لكل الناس؟

فكرّت الشمس الدهبية شوية
و قالت للديك
إنت ولا فاهم حاجة يا ديك
و عامل لي فكيك
ده لولايا عليك
ما كنت طلعت من البيضة
و لا كنت اتعلّمت الغنا و المزازيك

و لولايا على الناس و الدنيا
ما كانتش الأيام البيضا تصبح بيضا
ولا كانت أرض الناس تولد فاكهة
و سنابل و فاصوليا
و لا ورد ندوّبه في كلونيا

الديك المتكلّم .. بلّم
و جري يا فكيك من غير ما يحيّي و لا يسلّم
و صحيت و انا باصرخ و اتكلّم
خدوا كل فلوسي .. ورق و دهب و نحاس
و سيبوا لي الشمس يا ناس
سيبوا لي الشمس يا ناس
سيبوا لي الشمس يا ناس

من ورا ستارة الليالي
شمس بكرة جايّة تاني
إحنا شايفينِك تعالي
يا ام ضحكة برتقاني

العروسة الدهبية
جايّة و ف شفايفها وردة
شمس بكرة جايّة جايّة
بكرة أجمل م النهارده

شُفت يوم عصفورة نونو
لسه طالعة من أودتها
ريشها كان مبلول و لونه
لون غناها و صوصوتها

قمت قُلت ف عقل بالي
بقى دي جناحها يشيلها؟
سِبتها و مشيت في حالي
بعد مدة قلت آجي لها

قال لي واحد من جيرانها
ياه دي طارت ليها مدة
قلت معنى طيرانها
بكرة أجمل م النهارده

شُفت مرة مهرة سمرا
نونو ماسكة ف ديل مامتها
قُلت بكرة حتبقى حرة
تجري وحديها براحتها

عدى شهر و شهر تاني
شُفتها فرسة جميلة
تنطلق تجري ف ثواني
تقطع الرحلة الطويلة

قمت قلت لها قولي لي
ليه بتجري يا مهرة شاردة
قالت الريح بتنادي لي
بكرة أجمل م النهارده

من ورا ستارة الليالي
شمس بكرة جايّة تاني
إحنا شايفينِك تعالي
يا ام ضحكة برتقاني

العروسة الدهبية
جايّة و ف شفايفها وردة
شمس بكرة جايّة جايّة
بكرة أجمل م النهارده

شوك وضل

.. أحب ما عليا
! الشجره أم شوك و ضل
الضل وحده يتلج الحشا .. يعلّ
و الشوك يـِغلّ
...........
ما احبش القديسة
ولا اللى ما يعرف خلاف سجاده الصلا
براءه الملايكة ف ارض شايكة .. شئ يشل
و ما احبش الخسية
ولا الفلاتى الزانى حتى ويا أحجار الفلا
خساسه النجاسه والنخاسه والسياسه و قلة الحساسة
شئ يذل
.. و أحب ما عليا
الشجره أم شوك و ضل

شحات

لله يا محسنين
عبد فقير محتاج
على رصيف الشع
متمزعة هدومه
وعنيا مبلوطة
باشحت صور وخيال
فوق الكتاف الصر
منشالة محطوطة
احاسيسى مربوطة
على جناح الطير
لله يا محسنين
شحات بادق الباب

أغنية لروحنا نعود

وليل تباريحنا جارحنا ..
نضيع و تضيع ملامحنا
نتوه في زحمة العالم ..
ما نلقاش وشنا مالم
لروحنا نعود ..
و نبقى احنا
حبيبي تعالى لسه العمر في ربيعه ..
و نهر الحب في قلوبنا ينابيعه
حرام نعشق و نتعاهد ..
و نتفرق و نتباعد
و يبقى بكرة بين ايادينا ..
و نبيعه !
--------------------------------------
أنا في التوهة ، في الزحمة ..
باضيع ولا راحة ولا رحمة
تعالى انجدني من روحي ..
و من توهاني في جروحي
و خلي الكون يصالحنا
----------------------------------
عينيك داري و حنان أهلي ..
و فين ما باروح بتندهلي
تزهزهلي الحياة فيها ..
و تتفسر خوافيها
نطير و احنا في مطارحنا !
و ليل تباريحنا جارحنا ..
نضيع و تضيع ملامحنا
نتوه في زحمة العالم ..
ما نلقاش وشنا مالم
لروحنا نعود ..
و نبقى احنا

بفتح زرار قميصي

بفتح زرار قميصي للنسمة و للأماني
و أنور فوانيسي و أملى العالم أغاني
باغنى للمحبة ، وللنجم الملالى
دى الغنوة فى قلبى شابة ، وطايرة فى العلالى
أه يا هوى ياسيسي إنت لساني وحصاني
بافتح زرار قميصي واملا العالم أغاني
بفتح زرار قميصي للنسمة و للأماني
و أنور فوانيسي و أملى العالم أغاني
باغني للسعادة ، وباغني للرضا
والغنوة كل مادا ، تعلا وتملا الفضا
أه يا هوى ياسيسي إنت لساني وحصاني
بافتح زرار قميصي واملا العالم أغاني
بفتح زرار قميصي للنسمة و للأماني
و أنور فوانيسي و أملى العالم أغاني
باغني للحقيقة و باغني للانسان
و غنوتي الرقيقة بتنورلي الزمان
أه يا هوى ياسيسي إنت لساني وحصاني
بافتح زرار قميصي واملا العالم اغانى

حطة يا بطة

حطَّه يا بطَّه يا دقن القطه
بابا جاي وشايل الشنطه
إيه في الشنطه
فيها ما فيها
غش وبوليتيكا وأوَنْطَه
حطه يا بطه

حاكم بابا شغلته ظابط
ضابط هابط
شابط لابط
راقع خابط
نازل شافط
طالع لاهط
عمره ما فكَّر فكره وصابت
عمره ما نبِّتْ زرعه وطابت
يزرع سكر يطلع شطه
حطه يا بطه

بابا عشان خَدْها بالملحق
بقى ظابط واتعيِّن ملحق
واترقى سفير ف وزير
إيه السر .. السر ف بير
والسر ف طرف النبوت
واللي يحل السر يموت
ياما نفسي يا بلدنا يا شابه
يبقوا الوزرا بفلات فوت
وقلوبهم مليانه مباسطه
حطه يا بطه

يا بلدنا يا زادنا وزوادنا
يا ام جدودنا وبنت ولادنا
إيه آخرتها مع الظباط
بيروقراط على تكنوقراط
حُكَما فلاسفه فشر سقراط
واحنا يا عيني غلابه بُساط
فردانيه ما بيناش رابطه
حطه يا بطه

موش بتبطل لف الدنيا
و لا هتبطل لف
ده اللى يبص لحال الدنيا
يضرب كف بكف
الدنيا موش هتبطل لف

.........

دنيا بتلعب بينا الكورة
نجرى نلف شمال و يمين
و حياتنا فيها فزورة
مين فينا اللى يحلها مين
دنيا غرورة
و لا السنيورة
أم ملاية لف
ده اللى يفكر نفسه فهمها
يبقى حقيقى اتهف

الدنيا موش هتبطل لف
............

ساعة تكون حلوة و أمورة
وساعة تخلى القلب حزين
مين الأصل و مين الصورة
فيكى يا دنيا البنى آدمين
ساهية و دايرة
و طالعة و نازلة
و عمر الدمع ما جف
بس الدمعة وراها الضحكة
و وسط الضلمة نجف

و الدنيا موش هتبطل لف
الدنيا
.........
و حياتنا فيها مهدورة
بين ضحكة و آهة و أنين
و قلوبنا التايهة معذورة
عينى علينا احنا يا تايهين

موش بتبطل لف الدنيا
و لا هتبطل لف
ده اللى يبص لحال الدنيا
يضرب كف بكف
الدنيا موش هتبطل لف
الدنيا

حاول ماتبكيش

تقدر ما تبكيش …

إن شفت عصفور أخضراني الريش ..

قتلوه و هو يا دوب بيحلم يعيش .

حاول ما تبكيش ..

إن شفت غزة تحت نار الحصار ..

و المجزرة طايلة الكبار و الصغار ..

لكنها بتصرخ في وسط الدمار :

“الشعب ماله سوي المقاومة خيار”.

و الوقت لبنان كله صار كربلاء ..

وولاد يهوذا قتلة الأنبياء ..

رافعين في قانا كاسات دما الأبرياء ..

و بيشربوها ف صحة الأغبياء .

في البنتاجون .. و دي ناس تخاف من القوة و لا تختشيش ..

اثبت .. ماتبكيش ..

اثبت .. ماتبكيش ..

ما انت ان بكيت ترتاح .. و ليل الجراح ..

يسكن ضلوعك .. و الشرف يُستباح

و تعيش حياة الذل و الانبطاح

و تلاقي بكره الجاي بالضي راح

بدل ما تبكي اثبت في وش الرياح

و اصرخ في أعداء السلام و الصباح

“أستسلموا للحق و أرموا السلاح”

“و أفتكروا هزيمتكوا ف زمان الاجتياح “

“و كفاية قتل و حرق و جنون و طيش “

اصرخ .. ماتبكيش ..

غني .. ماتبكيش ..

دلوقت نصر الله في لبنان بدأ.

ووعد يرد لنا حقوقنا و صَدَق .

و شعوبنا طالعة .. كلنا إيد في أيد ..

مع كل شعب كان قريب او بعيد ..

ح نصحي في الدنيا الضمير البليد ..

و تقيم شعوبنا شرق أوسط سعيد ..

نتساوي فيه .. و مفيهش سادة و عبيد ..

و لكل أمة فيه مكانة و مكان .

” لا للصهاينة .. و الطغاه لامريكان “

” لا للصهاينة .. و الطغاه لامريكان ”

.

صوره على جدار

من ألف . .

ألفين . .

قول ثلاث اّلاف سنه

كان الناياتى الأعمى قاعد يترسم . .

على الجدار هنا . .

وكان يبتسم . .

وقلبه بيبص لبعيد

ومن صوابعه الليّنه

ومن شفايفه بيتولد نغم غنا . .

ياهلترى . .

كان المغنى بيبتسم علينا ولا بيبتسم لنا ؟ !

وكان غناه . . غنوة فرح ملونه ؟ !

ولاّ عديد فى محزنه ؟ !

ويا هلترى . .

كان المغنى الأعمى . . أعمى زيّنا ؟ ! ! !

أصل الجراد أشكال وألوان

يا معلقين ع المراجيح
والحبل مستورد فاخر
ليلتنا فاتت زي الريح...
ما هي كل حاجة وليها آخر
بس الحقيقة المذهلة
ان الجميع في السلسلة
وفوق الرقاب يا معلمين..
.أحبال قطيفة مدلدلة

أصل الخواجة ابن ماريكا
لما بيدخل حواريكا
يا إما ياخدك في بطاطه
يا إما يا ابني هيأذيكا
حاكم الخواجة ابن ماريكا
هو اللي بدع الشيكابيكا

افتح عيونك فنجل
لكل من جه يتحنجل
أصل الجراد أشكال وألوان
حاطط على الأخضر بيحش
وبألف ماركة وألف دراع
وكل يوم بيبدل وش

يا ابن العرب ياللا يا ويكا
اعرف بقى مين أعاديكا
ده أنت إذا كفوفك ضمّت
ما حد يقدر يساويكا

افتح عيونك فنجلجل
لكل من جه يتحنجل
أصل الجراد أشكال وألوان
حاطط على الأخضر بيحش
وبألف ماركة وألف دراع
وكل يوم بيبدل وش

بحب البحر

بحب البحر لما يزوم
وبعشق صرخته فى الريح

وأحس فى موجه شوق مكتوم
لناس حرة وحياة بصحيح

وأحبه لما يتهادى
وأدوب لما يوشوشنى

ويفرش موجه سجادة
فى أحلامى تعيشنى

مالوش أول مالوش آخر
قراره طاوى أسراره

ودايما فى الهوا مسافر
ولا نهاية لمشواره

بحب البحر وأعشق صرخته وأنه

وأحب الناس ماهم فيهم حاجات منه

وأحبك ياللى احلامى فى هواكى زهزهوا وغنوا

يا بلدى ياللى وأنا فيكى عيونى إليكى بيحنوا

بحب الورد فوق السور
وباعشق ضحكته الفانية

وأحس فى ريحته شوق مسحور
لناس حرة وحياة تانية

وأحبه بين إيدين عشاق
رسالة مهفهفة بأشواق

وحتى وهو بين أوراق
كتاب العشق ذكرى فراق

حياته فى الهوا ليلتين
وعمره ماكان بعمره خليل

يرش هواه على الماشيين
ويتقاسموا مع الجايين

أحب الورد وأعشق ضحكته وأنه

وأحب الناس ماهم فيهم حاجات منه

وأحبك ياللى احلامى فى هواكى زهزهوا وغنوا

يا بلدى ياللى وأنا فيكى عيونى إليكى بيحنوا

بحب الورد وأحب البحر وأحب الناس

وأحب نعيشها أحرار مرفوعين الراس

ولا تفرقنا لا الألوان ولا الأديان ولا الأجناس

وأدوب فى أذان يرفرف تحضنه أجراس

تعالوا نقيم لبكره الجاى ياناس قداس

بفتح زرار قميصي

بفتح زرار قميصي للنسمة و للأماني
و أنور فوانيسي و أملى العالم أغاني
باغنى للمحبة ، وللنجم الملالى
دى الغنوة فى قلبى شابة ، وطايرة فى العلالى
أه يا هوى ياسيسي إنت لساني وحصاني
بافتح زرار قميصي واملا العالم أغاني
بفتح زرار قميصي للنسمة و للأماني
و أنور فوانيسي و أملى العالم أغاني
باغني للسعادة ، وباغني للرضا
والغنوة كل مادا ، تعلا وتملا الفضا
أه يا هوى ياسيسي إنت لساني وحصاني
بافتح زرار قميصي واملا العالم أغاني
بفتح زرار قميصي للنسمة و للأماني
و أنور فوانيسي و أملى العالم أغاني
باغني للحقيقة و باغني للانسان
و غنوتي الرقيقة بتنورلي الزمان
أه يا هوى ياسيسي إنت لساني وحصاني
بافتح زرار قميصي واملا العالم اغانى

» مجموعة مختارة من اشعار ( فؤاد قاعود )
» مجموعة مختارة من شعر الأبنودى
» مجموعة مختارة من شعر الشاعر ( على سلامة )
» مجموعة مختارة من شعر ( فؤاد حداد )
» مجموعة مختارة من شعر ( ايمان البكرى )