ثلاثية الخوف والجوع والفقر
(1)
موت فقير تكسب دولار
وتعيش أمير بين التجار
تاجر فى قوت الشعب
تاجر فى مصير الغلبانين
دى السرقة على عينك يا تاجر
مش بالالآف بالملايين
رزق الحرامية الكبار ع المجانين
اللى فى لحظة صدقوا وتشوقوا
للعدل بين اللى بيتغدى براتب ألف مستخدم شريف
واللى مش لاقى الرغيف
بين ترلا أو جبلا بس ساكن جوه فيلا
وبين عفيف بس بينام ع الرصيف
وان نقول حرام يقولوا
موت جعان تموت خفيف
يا مال بلدنا يا مال سايب وما لوش اصحاب
يا فلوس تكية يا وكالة من غير بواب
وسيادته فى الليلة الغبرة يهبر هبرة
والناس اهى ساكة وصابرة ومش عارف ليه
ومشيتوا جنب الحيط ياما والحيط ملت
وشوش جعانه وعدمانه وخايفين على ايه
تلقى البعيد جيبه فاضى وجوفه فاضى
ويبوس ايديه ويقول راضى ..راضى عن ايه
راضى تعيش تعبان عرقان
وتعيش ذليل ايام وسنين
وييجى هوه بباكو لبان
يكسب ارانب او ملايين
(2)
موت فقير تاخد نيشان
طاغى كبير او ديدبان
اظهر وبان
يا حقد يا متخبى جواك من زمان
يا غل يا متعبى فى اسود مكان
ساعة ما يمسك سلطة او يقعد على الكرسى يبان
يبان على اصله الجبان
بهدل ابوك واسجن اخوك
ما خلاص خدوك وعلموك انك تدوس
مش ع اللصوص لا ع اللى ركعوا للفلوس
لأ ع النفوس .. أطهر نفوس
(3)
موت فقير تكسب كتير
وتعجب البيه الكبير
ياخدك معاه
وتقول وراه
شعب رعاع شعب حقير
اتعودوا ع الذل والكرباج وخافوا م العصا
ويا ويله لو فى مرة هاج ويا ويله لو مرة عصى
ما يفوقوش غير العصا
شاطر فى فن المهيصه والبصبصة
واتعودوا يا كلوا الفتات واتعودوا على المصمصة
لو شبعوا مرة وفكروا هيدوروا
كام دخلنا وصرفنا كام وف ايه وليه
ومين نهب ومين سرق
ومين بيلعب فى الورق
وليه ف لحظة بيتحرق
واللى غرق واللى تشنق ليه اتشنق
علشان كده كله تمام بنشرده ونجوعه
وبفضل اعلامنا الهمام بنخوفه ونروعه
ونهشكه وندلعه
واللى بيفتح بقه يابا
بنسوحه ونضيعه
شعر:محمد رفعت
********************************************************************* [b]
