تيتو
راكب درجه فاخره
الجنس : 
عدد المساهمات : 990
نقاط : 1600
تاريخ التسجيل : 03/11/2009
 | موضوع: جمال بخيت...مرثية لمصر  الثلاثاء يوليو 20, 2010 3:24 pm | |
| [size=21]جمال بخيت
شاعر متفرد
برع من أبناء جيله
يكتب لمصر وتشعر ببكاءه بين السطور
لذا اخترت له هذه النماذج
باموت يا مصر المتباعة
باموت يا مصر المنهوبة
شمسك تسير عكس الساعة
والعين على العمى مغصوبة
الصفر غيم على زمنكــــ
وعروق رقبتكـ مطلوبة
على الحدود قتلوا ولادكـ
وتقفى ساكتة .. ومرعوبة
مدد يا هيكل يا ضميرى
مدد يا كامل يا زهيرى
مدد يا قاضى يا خضيرى
مدد يا مكى يا زكريا
يا جورج اسحق
يا مســــيرى
يا بسطويسى .. يا حرية
مدد يا أجمل أعاصيرى
مدد يا قلب الوطن الحر
مدد يا سيرة عوض المر
مدد يا ندهة كمال خليل
مدد يا حلم ندى القصاص
مدد يا خط رؤوف عياد
شقيان وماشى بكل عناد
مدد يا قمح سكينة فؤاد
مدد يا بنت يا مصرية
يا جميلة يا اخت بهية
مدد يا شعر العامية
مدد يا صاحبى اللى قاسمته
مدد يا علم اتعلمته
من عم عودة وصدقى عزيز
شباب لبس وش العواجيز
مدد يا سورة أخلاصى
مدد يا خويا وتاج راسى
يا معصراوى .. يا حسينى
مدد يا ست نهى الزينى
يا فجر صبح على عينى
صالح مابنى نفسى وبينى
وقاللى دى ست القاضية
كشفت عن الألوان زيفها
وخلت الوردة الزاهية
تعيش على وش خريفها
مدد يا فادى يا أسكندر
على خطى محمد الاسقر
على طريقة أبن ابو عيطة
جمع مظاهراتنا مشاعر
ويغير من الهتافات شاعر
يحفظ ديوان لامين الديب
يلاقى شعب كأنه أديب
عندك فى شعره
بلاد .... تقاسيم
عندك حجازى
وعمرو سليم
والنكتة بوزارة التعليم
**********************************
[/size]
[size=21]إرجع بأه
وفك حبل المشنقة
وامسح همومنا باللقا
ياجدرنا تحت التراب
يا حلمنا فوق السحاب
يا عمرنا طال العذاب
فى الإنتظار
رجعوا التتار
لكننا أشواك بتتحدى العطش
وجنود بتتحدى الفرار
نسقط ساعات
لكننا نفضل كبار
نفتح عيون للانبهار
متشوقة
فارجع بأه
وفك حبل المشنقة
وارفع راياتك يا أبى
قريش بتسأل عن نبى
يهديها من بعد العمى
خالد قتل مسيلمة
لكن جنوده الكدابين
عينهم فى طابا
يتحدوا فرسان الخطابة
ويلجموهم بالسكوت
فى عصر بيروت الحزين
خالد قتل مسيلمة
لكن جنوده الكدابين
بيفتتوا دلتاك بصبر
وبيحفرولى فى سينا قبر
وبيركبوا نيلى العنيد
وبيخنقونى فى الصعيد
بكلام نكت وبتريقه
فارجع بأه
دا الهزل زاد
والباشا إيده على الزناد
وصدقى بيصلى لفؤاد
وبيحلفوا نرجع عبيد
نتباع فى أسواق الكساد
الهزل زاد
والباشا إيده على الزناد
والسد جوه الفوهة
لو ينسفه تغرق بلادك كلها
وتعود سنين الأوبئة
تسكن ضلوعنا الضيقة
فأرجع بأه
الشمس سكنت كل غرب
حلفت ما ترجع للشروق
من أى شرق
إن لم تكن فى الأنتظار
إنت وسيفك -والتتار تحت القدم-
فأقضى بصوتك على العدم
إعدل موازين الزمان
رتب نجومنا فى الفضا
وأكسى وجوهنا بالرضا
بعد الشقى
دى الأمة لسه محتاجاك
والأرض لسه مهيأة
فأرجع بأه
*****************************
[/size][size=16]وهذه غناها المطرب أحمد الحجاربلحن
مميز واداء راقي معبر [/size]
[size=16]رفاقى
الوحدة و المنفى
و شوق الريح
مهاجر من زمن ضايع
لقلب جريح
بتهزمنى انكساراتى
و برفع اعلى راياتى
حياتى فى زمن آتى
يا أرض النور تحاوطينى
فلسطينى .... فلسطينى
بيسرى الاقصى فى دمى
اسير و عنيد
و بلدى , و وجهتى , و يومى
فى هواها شهيد
سلاحى قبضة معتلة
و حتى النبضة محتلة
لكن روحى ما تتخلى
عن الجرح اللى يبقينى
فلسطينى .... فلسطينى
انا شاعر
لكن قدرى اغنى بارود
يا عشاق البراح
امتى تكون لى حدود؟؟
و امتى الفجر يا أمة ؟؟؟
و أحس براحة الضمة
يا أستشهد , يا أتسمّى
فى ليلة بدر :حطينى
فلسطينى فلسطينى
فلسطينى فلسطينى
*************************
[/size] [size=16]وهذه غنتها المطربة لطيفة
في أحد الأفلام[/size]
[size=16]تعرف تتكلم بلدى
وتشم الورد البلدى
وتعيش الحلم العصرى
يبقى انت أكيد
المصرى
تعرف بالعربى تنادى
بسم الله وبسم بلادى
صوتك فى العالم
يسرى
يبقى انت أكيد
المصرى
المصرى حبيب متحمس
لو حتى بدقه يغمس
لو جاله حبيب
يرتاح له
لو جاله حسود
بيخمس
محفوظ بيغنى ياليل
على دقة قلب زويل
وحليم فى الهوى دوبنا
على قد الشوق
والميل
ثومه ومنديلها الوردى
غنواية جيل
ورا جيل
قادر على كل
تحدى
ايه معنى الكلم ده
المقصود
المصرى تمام[/size]
********************
[size=21]شباك النّبي على باب الله
يا صبية الصبي على باب الله
هَاوْدِي وقَرَّبي على باب الله
ونْلمْ الشَامي على المَغرَبي
على باب الله
على باب الريح ربِّـينا نَسيم
يكبر بالجمع وبالتقسيم
ويلم الشعر على التقَاسيم
على عطر وسيمة وصَدر وسيم
خلّيكي معانا إزاي تذهبي
وإنتي الأُغنيّة بنور مذهبي
شباك النبي على باب الله
على باب الشُوق من غير توصيف
عدينا ربـيع ودخلنا خريف
البخت ف ليل الحُب ضعيف
والورد ب يهرب م التقطيف
وإنتي ولا بتئسي ولا بتهربي
ولا يوم ب تلبِّي سوى مطلبي
شباك النبي على باب الله
على باب الجنَّة يا طَعْم التوت
أنا ممكن أحب لَحّدْ مَ أموت
وأزرعلِك جُوُّا البحر بيُوت
وأخلِّي سنين الصَعب تفُوُت
أنا اشيل الشَقَا وإنتي تطبطبي
وأتعبلِك وإنتي بلاش تتعبي
شباك النبي على باب الله
على باب العيد بالهوى ضَحِّيت
ذُقت الحرمان .. قُلت إتغدِّيت
رزق الغلبان .. يحْرَم ع البيت
الدُنيا قالتلي إبكي .. ما بكيت
سهّلي .. سهّلي ليه بتصعَّبي
ده أنا مهما جَنيت عارف مكسبي
شباك النبي على باب الله
على باب الخَلق وباب النصر
صلّيت الفجر ضحكلي العصر
تعاليلي العِشّة .. أبنيلِك قَصر
أنا أطيب مصري .. يا أجمل مصر
أحْلِف بالشافعي وبالزينَبي
وعينياّ تميـل وبَـشيل مَنكَبي
شباك النّبي على باب الله
على باب الله بساتين بساتين
شوفنا الزيتون ف مَقام التين
والناس ف حليب وعسل فايتين
والظُلم ضعيف والحق متين
قرآن الفَجر تلاوة أجر
وآيات بتملِّس على كوكبي
شباك النبي على باب الله
على باب الغار بتبيض يا حمام
ح أبنيلَك بَدَل العِشْ مَقَام
كُفَّار اليُوم عايزينها سلام
شرط الصّديق ينسى الإسلام
لكن ماتخافش الخوف أجنبي
وانا لسه شُجاع سيفي ومأربي
شباك النبي على باب الله
على باب إسرائي بُساط أحمدي
كُل الأنبيا ويّا مُحمدي
بيصلوا صلاة القلب النبي
الأقصى قريب لو يوم نَهتدي
من باب أندلُسي لباب مَندبي
نفتح شباك ع الزمن الأبي
شباك النبي على باب الله
ولا فيش أجنبي على باب الله
يا صبيَّة الصَبي على باب الله
هَاوْدِي وقَرَّبي شربات تشربي
ونْلمْ الشَامي على المَغرَبي
على باب الله
******************
[/size] [size=12]مات الجنية
و ألف رحمة ونور عليه
فقيد بنوك القاهرة
أخو ريال
والد دراهم والبرايز والشلن
وجد فلس
ونسيب لعائلة الدينار
التحقيقات ف المركزي بتقول
دي موته ربنا
والشائعات بتقول : غلط
دا انتحار
الأمر جد ما فيش هزار
مات الجنيه
وألف رحمة ونور عليه
كان الفقيد
راجل شديد
وكان زمان بيجيب دهب
ويشيل حديد
و في اخر العمر المديد
سموه : حمام
لأنه كان بيطير أوام
لكن سقط
من غير وداع
من غير كلام
مات الجنيه
وألف رحمة ونور عليه
ننعيه إليكم بينما
نتمني للسيد دولار
طول البقاء والانتشار
ف جميع بوتيكات البلد
ف جميع محلات اللعب
وف كل أسواق الخضار
ننعي الجنيه
لكل من يهفو إليه
من الجماعة المفلسين
والمفلسات
والف رحمة ونور عليه
ولا عزاء للمليمات[/size] | |
|
احلامى
راكب درجه ثالثه
الجنس : 
عدد المساهمات : 367
نقاط : 613
تاريخ التسجيل : 14/07/2010
| | موضوع: رد: جمال بخيت...مرثية لمصر الخميس يوليو 22, 2010 9:17 pm | |
| | |
|
