طمنى على مصر يا عم عبد العال
قالى مصر زي الفل وعال العال
قلتله والناس
قالى بيفطروا بيتزا وبيتعشوا حمام
قلتله والعيشه لساها مره
قالى دي الناس من الفرحه مش عاوزة تنام
قلتله يعني البلد حالها اتعدل
قالى طبعآ دي مفيهاش كلام
قلتله امال البلطجة والسرقة
قالى دة ابراهيم الابيض ودة شغل افلام
قلتله والضحايا والشهدا
قالى يا عم دي تفاهات إعلام
قلتله ايه اخبار الخصخصة
ضحك و قالى خلاص كلها قطاع عام
قلتله طب والدعم
قالى مع التموين كل شهر ليك بلح الشام
قلتله واطفال الشوارع
قالى ملهمش غير الصنعة والعلام
قلتله والعشوائيات
قالى كلها بقت سراميك ورخام
قلتله صحيح جرام الدهب عامل كام
قالى جرام ايه دة الدهب بيتباع خام
قلتله طب علي كدة بقى ماتشوف لى عروسة
قالى خلاص مبقاش فى عنوسه كلها بقيت مدام
قلتله ايه اخبار ثورتنا
قالى مطالبنا اتحققت وكله تمام التمام
قلتله مصر اللى بتكلمنى عليها دي مصر أم الدنيا
ولامصر أم الاحلام والاوهام
ولا مصر كمان 100 سنة لقدام
سكت وقفل من غير حتى ما يقولى سلام
