اول قصيده فى مصر

للشاعر مصطفى الجزار

أول قصيده في مصر



ما باكتِبش القصايد فيكي بالسّاهِل
برغم انّ القصايد فيكي تستاهل
وانا عُمْري..


ما كنت فحِرْفتي عاجز ولا جاهل
لكن ساعة ما اقول إني هاقول فيكي..
ألاقي الحرف جوايا ما بين مقتول.. وبين قاتل
وعارفه.. كل دا مِن إيه؟
باحِسّ انّ الكلام عنِّك.. سحابه عالية فُوق فُوقي
وانا واقف على قلبي وْعلى حُبّي وْعلى شُوقي..
وبرضه لسه مش طايل!
ولما يقولوا: "غَنِّلْها..
وقُول الشعر ف عينيها عشان يِرضى عليك نِيلها
وتِعدِلْ بَخْتَك المايل"..
أَرُدّ بْكُلّ إحساسي: مَنِيش قايل..
يا مَصر الشِّعر ف عينيكي ما هوش سطرين بيتقالوا
ولا موّال بيتغنّى وانا قايلُهْ ومِتْقالُه
ولا شوية كلام شعارات بيتحطّوا.. ويتشالوا
يا مَصرالشعر ف عينيكي جبال عالية
وحِمْل تقيل..
يشيلُه إبنِك الفارس
وانا لسّه منَِيش فارس
لكنْ حاسِس..
بإني هابقى يوم هُوَّا
ساعتها يا امَّه تِبقى الكِلْمه مِن جُوَّا
وأبقى قَدّ قُول قلبي
وامِدّ إيديَّا لإْيديكي
ساعتها بسّ أستاهِل.. أقول الشعر ف عينيكي
*****
***
*
يا شايلَة كْتير على اكْتافِك
ومش هَمِّك.. وبتشيلي
وساقيَه الكُلّ من دَمِّك
وبتقولي: "فِدا نِيلي"
يا أيُّوبَهْ..
يا غالبَه وانتِ مغلوبَهْ..
يا نِسمَه ف عِزّ صيف باردَهْ
وحُضن ف عِزّ ليل طُوبَهْ
باحبِّك.. وانتِ مش غيرِك
باحبِّك لماتبقِي انتي
بِطين الزرع وبْخيرِك
ف عِشَّه صْغَيَّرَه سْكِنْتي
باحبِّك وانتِ مش "هانم"
ولا لابْسَه الكعوب عاليَه وماليَه وِشَّها أحمر
باحبِّك وانتِ فلاّحَه..
ولابْسَه الحِشْمَه والطِّيبَه وْعلى جْبِينِك.. عَرَقْ أخضر
واحبِّك لما ألقاكي بتتوضِّي.. بميّة نيلِك الأسمر
وبتصلِّي على التّرْعَهْ.. وفَارْدَه الكُون مِصَلِّيَّه
باحبِّك...
وانتِ مصريَّه
ماتبقيش واحدة منسوخه..
وممسوخه..
ف آخْر الصفّ مَرْمِيَّه
يا أُمّي إرفعي راسِك ودُوسي كل مِن داسِك
وِحِبِّيني..
أنا شعبِك.. أنا ناسِك
أناأرضِك.. أنا فاسِك
أنا العايش بأنفاسِك
أنا العطشان لنقطة فايضة من كاسِك
لا انا طمعان انول دهبِك.. ولا ماسِك
دا انا.. ماسِك..
بإيدي الجمر طول عُمْري
ولا خَيِّبت يوم ظنِّك ولا كدّبت إحساسِك
ولو عايزة.. أكون تاجِك
واكون لو عايزة كَنّاسِك
واكون عَلَمِك..
واكون قَلَمِك..
واكون حِبرك وكرّاسِك
واكون كُرباج على ضَهْر اللي يوم غَشِّك
وقرّب إيدُه مِن وِشِّك
وقال لِكْ إنُّه مِن جُندك وحُرّاسِك
وع الخَدّ اليمين ضَرَبِك... وع الخَدّ الشمال.. بَاسِك!
* * *
يا أُمّي... حِسّي بوْجودي
دا انا الكِلْمة اللي فوق سَطْرِك
طب اعمل إيه عشان خاطرِك؟
عشان خاطرِك..
أكون مَدْفَعْ..
واحارب في صفوف الجيش
واكون أجدَعْ..
واحارب في طابورالعيش
ولو ينفع..
أعيش زيّ الملايكة هاعيش..
ولا آكُل.. ولا أشرب.. ولاأحزن.. ولا أغضب
ولو كان اللي جاي أصعب.. ولا يهمِّك
ما انا اتعودت يا (غالية).. على (الغَلَيان)
وإنّ الفاضي دلوقتي.. صَبَح بيصُبّ ف الملْيَان
وإنّ المَكسي عايز هِدْمَة م العِريان
وإنّ سعادة الشبعان..
بيطلُب لُقمة م اللي مقضّي طول عُمرُه نهار رمضان!
أنا اتعودت ع الدنيا اللي بالمقلوب
وع اللي بيتُه مَبنِي إزاز لكنْ وَاصِل
فيِحْدِف حِلْمِنا بالطوب!
* * *
أنا اتعودت..
ع الجري اللي للمتاعيس
وع الزفّة اللي فوق أرضي ومش ليا
وماشي فيها ألف عريس..
وبنت بنوت..
حِلمت ف يوم تكون ليا.. واكون ليها
حِلمت اسكن على نيل رمشها الصافي
واقابل بُكرة ف عينيها
حِلمت بكل شيء فيها
وفجأة ألاقي أحلامي..
سما عمّالة بتمطّر سيول كوابيس
فاقوم من نومي من فزعي
ألاقي الصبح بيشقشق على وجعي
يصحّيني بُكا الأشعار
فأغسل وشّي بالأخبار
واحضّر من همومي فْطار..
يكفّي قلبي طول الشهر
وابلّع لُقمتي.. بالقَهر
ولما اشبع من الأحزان..
أبوس على إيدي وش وضَهر
واقول.. نِعمَه
هتفرق إيه.. نشوف الدنيا أو.. نِعمَى؟
يا مصر القلب مش قادر يشوف غيرِك
ولا قادر ينول... خيرِك
ولا قادر.. يكون مِن غير جناح طيرِك
لكن برضه بيستحمل يقول.. عادي.. ولا يهمِّك
أنا اتعوّدت يا غالية.. فمدُّقّيش
ما انا هافضل كده عايش على أمل اني بُكرة هاعيش!
واقضّي عُمري مش فارقة..
ألاقي اللقمة.. أو ما الاقيش
وانام برضُه جعان.. لكنْ...
أخاف احلَم...


بسوق العيش!

الاستاذه العزيزه زينب

شكرا لمرورك والترجمه
هههههه

مصر وطن يعيش فينا

وليس وطنا نعيش فيه

------

قصيده رائعه يا استاذ ربيع

شكرا لاختياراتك الرائعه دائما

باحبِّك وانتِ مش "هانم"
ولا لابْسَه الكعوب عاليَه وماليَه وِشَّها أحمر
باحبِّك وانتِ فلاّحَه..
ولابْسَه الحِشْمَه والطِّيبَه وْعلى جْبِينِك.. عَرَقْ أخضر
واحبِّك لما ألقاكي بتتوضِّي.. بميّة نيلِك الأسمر
وبتصلِّي على التّرْعَهْ.. وفَارْدَه الكُون مِصَلِّيَّه
باحبِّك...
وانتِ مصريَّه



الله الله بجد احساس جميل وكاني شايفه

كل ما يقال بعنيه تسلم ايدك وذوقك اخي ربيع

تسلم ايدك اختي زينب علي كتابه الكلمات

فراوله كتب:

مصر وطن يعيش فينا

وليس وطنا نعيش فيه

------

قصيده رائعه يا استاذ ربيع

شكرا لاختياراتك الرائعه دائما

وشكرا لتذوقكم الشعر نثرا والقاءا
وشكرا لمرورك العزيزه فراوله

شكرا للاخت العزيزه بريق مرورك الدائم
خالص تحياتى

اشكرك اخى ايهاب
بارك الله فيك

بجد عمى ربيع هذا الشعر قرأته أكثر من مرة وكل مرة أجد وكأن الشاعر لخص حيات غالب المصريين فى هذه الكلمات
تسلم يدك وإنتقاؤك للموضوعات وبعدين هنقول إيه إنت أمير شعراء المترو فلن تأتى إلا بما هو مميز
تحيتى لك عمونا الغالى وتقبل مرورى

شكرا يا ايهاب
فعلا كلمات صادقه واحساس عالى للشاعر بالكلمات
اذدادت القصيده باعجابكم جميعا جمالا

فى حبك يامصر ياما اتكتب قصايد مدح فيكى...


وياما قلوبنا بكت من كتر الخوف عليكى




والف لية اتقالت مكتومة جوانا وسكتنا عن حقوقنا ..


والنهاردة شوفى فرحة ولادك بيكى..


فرحوا لما جمعهم عشقهم واخلاصهم ليكى




فرحوا لما صوتهم هز العالم بيصرخ صرخة أمل


يهون دمنا يابلدى بس يرجعلك كيانك ..


وبكل قوة وعزيمة هنقف لكل الى يفكر يعاديكى




ويشهد كل العالم بعشقنا لكل حبة رمل موجودة على اراضيكى




********************************

ودآمت مصر رغم أنف الحـآقدين رمز آ وترآثـآ وأمـآ للدنيـآ بأسسرهـآ

لاعدمناك يارب ولاعدمنا طرحك الرائع والهادف..
نبقى دوما بشوق لجديدك القادم ..
ودي لك وجل تقديري..

تعليق رائع اخى رسلان

شكرا لمرورك

للاسف يا استاذ ربيع
مصر الان تتغير الى دوله اخرى غير التى نعرفها
مصر التى فى خاطرى وفى دمى كما كنا نغنى لها امس
اصبحت تتوحش
تتذئب
وخرج علينا قطيع من الضباع ينهش فى كل جزء من اجزاءها
ولن يتركوها الا جثه هامده
لك الله يا مصر

مصر ستبقى خالده ابد الدهر
اين التتار ونابليون والانجليز لااحد يستطيع كسر الاراده المصريه مهما كان
شكرا لمرورك
الفتى الطائر كنا نحلم ان نطير باحلامنا لكن يبدو مكتوب علينا الهم
اللهم ارفع عنا الهم والحزن

بنت المنصوره كتب:

للاسف يا استاذ ربيع
مصر الان تتغير الى دوله اخرى غير التى نعرفها
مصر التى فى خاطرى وفى دمى كما كنا نغنى لها امس
اصبحت تتوحش
تتذئب
وخرج علينا قطيع من الضباع ينهش فى كل جزء من اجزاءها
ولن يتركوها الا جثه هامده
لك الله يا مصر

العزيزة بنت المنصورة
فعلا اصحنا فعلا قطيع من الذئاب كما قلتى الكل يريد مصلحته الشخصيه ومنهم من يلعب حساب اطراف اخرى.
لا احد يفكر فى مصلحه البلد من يفكر فى الانتقام ومن يفكر فى التمسك بمكانه
خوفا من كشف ماضيه المستور وكله يقاتل لمصلحه شخصيه
لك الله يامصر