الـســيل

الـســيل

محمد طه القدال أغسطس 1975

خمسين سنة

وايدنا في طول مدّهِن

لا فترنا من مد اليدين

لا صبنة جاتَك يا رحم

يا يُمّه كان عرسِك

دلاليك الهنا

ويا يُمّه عرسِك

كان قبل كمّين سنه

وأمس القريب

قلتيلي جاييني الوحم

اسبيتي كم ؟ ربّيتي كم ؟

عمّرتي في ها الأرض كم؟

رحطِك قطيع

يا يُمّة من مَجَدة جناك

في الأرض

في الزمن الزمان

والليلة يا دوبِك بِكِر

شِلخة نصيبِِك يا ام عرِض

مكتوب تصيبِك

لا بَدُق فوقِك نحاسي

ولا دمِع برميهو شانِك

ما بقوقيلِك شِكِر

ومترجيك
مترجِّك يجيني الجاكي في دمِّي

ومترجيك

علي ميعادنا مترجيك

غنايا على الأرِض والفاس وبت امي

غناياً لا بيبضِّع فيك

ولا للضيم غناي بدِّيك

ولا بِخَبِر بلاك نمّي

***

إذا ما البيت لبخ جالوص

مزبَّل للخريف عِمة

وكان جواهو محبوبين

وهبَّابين

وخمسة عيال وسحَّارة

كان في الحوش

عَقَاب معزاية للشفع

كان الدنيا يا الضلمه

وكان القـِبله جهَّاره

وكانت الغيمه هدَّاره



مَرَق حمدان يسيلو تـَرَس

علي مونة السنة المشلوخ

إذا ليهُ الترس ينفع

ماهمَُه السما الدَّمَّع

رجع والدنيا دوَّاره

ويا الحوش الصِبِـح ميضه

وبـِدور مركب:

- دحين يبقى السَرِف نعمة؟

- دحين يبقى البلد خرَّف؟

- أمُرْقي العدة ياام احمد

بدور أضهب

بكِسْر الحوش عشان الساس

واسيلي على الحَدَب مصرف

وقام أحمد يحاوط البيت

- اسرِع يابا

- جانا غضب

- شقوق ام سيسي والفارة

وكان الدنيا يا الضلمة

وكان القـِبلة جهارة

وكان الغيمه درارة

سبلوقاتنا ما صبّن

سباليق جارنا سوّن جو

ودميع السحابن نوّح

ويا معز اللبن دغّن

ويا البقر الطلق بوّح

جفل في الزيفة ديك روّح

ويا الكلاب يسوّن هو

وقام حتى الجداد كيّك

ويا مرق السنط سيّك

وتمسع بُرْدُلُوب حيطة

- ويا ابو مروَّه .. يا ابو مروَّه .. يا ابو مروَّه

بيت حاجة أم خريف دَرْكان

تجيك من الفريق عيطة

وتقرأ أم احمد البسم الله

وتقرأ أم احمد البسم الله

- أقيدي اللمبة يا ام احمد

وحفضي مع الهدوم شيطة

- تعال آزول

تعال الحق صعيد البيت خلاص اماص

- أمرقي الشفع اليتلافو سَدر الحوش

بشوف الجاية في الرصاص

قت لك أمُرْقي يا بنيَّة

وطينتاً في التراب نيَّة

قلتلك أمرقي

فرشاً اطير

هو شن هبَّاب

وشن كرَّاب

وشن قُرقاب

وتسمع بردولب

يا المعزة وقعت ناشفة

بين الشِعبتين والباب



- وكان اب احمد المهجوم بيقرا الفاتحة في سرُّو

بيقول:

- الجات علي مالك

مليحاً جات علي متالك

تعال آجني وكنكش فوق كتف خيك

عاد لا حوله لا قوة

جانا غضب

ومويه ركب

وداك الحزه كان الحله شِرْقَت تـَبْ

وكان اتشتت الرصاص

وكان الساس

حـَتـَل وامَّاص

حتل واماص

حتل واماص



دمِّيع السما

ودمع الجُهال واحد ..

دمع الجهال في الضـَلـْمة

كان مالح

وكان القبلة في عينينا دواره

كان الدنيا يا الضلمة

وكان القبلة جهارة

وكان والغيمه هدارة

ودرارة

وأصبح بيتنا لي تولاتنا كفَّاره

***

وشـِن بتقولي في القبلي المدمع فوق عشم عشمان؟

خلاف دمع العشم مو نوح

دمع العشم مو نوح

وشن بقولي في الصباحي؟

والضحوية؟

والضهراوي والطوفان؟

وشن بتقولي في الجيعان؟

وفي العريان؟

وشن بتقولي في الصرمان؟

وفي الخاتي الدرب ضهبان؟

وسدرك امان

وحِجـْرِك لي جناكي ضمان

باقية علي المدائن في المحل

مونة وقدح ضيفان

وباقية علي الجناين

دوح

ولو غيّرك بجابد في العنا الطوفان

ولا غيرك سفينة نوح

ولا خابت عليك مسرتنا

نتراجك

على ميعادنا نترجاك

بالسلوكة نترجاكي

بالدلوكة نترجاكي

بالدوباي

وبالدوباي تقوم يا بيتنا

بيت الطين

حِملة يوم

شراية يوم

لتيبة يوم

ولبنايتاً تخدر

في مسورنا الجاي



ولبنايتاً تخدر

في مسورنا الجاي

ياهامي

صابك كم رزاز؟!

ياهامي شقيش الوَجَع؟

تَصْبُر

على الحَصْب الظُلُم

والرد يفور

جواكْ ويِلح

تختار جَواب

وجَع السُكات

تكتم رِدودك

في الجَرِح