حب وكبرياء

أنا عندي زولة بحبها
أجمل جمال عين طلتو
منسوجة من ألق الصباح
مسقية وردة ووردتو
تحتار مع النسمة النجوم
دي الغيمة ام ديك طرحتو
ويا ربي إيه وهج الشموس
لو ما بكون من بسمتو
وإيه يعني لمعات السناء
لمعة سنا هي الحتتو
وتقولو يا قمر إتكي
وتقعد عديل في حتتو
وبحبها حباً بلوص
فيهو الزمن ...
بين إبتسامة ودمعتو
يدخلبها الشوق السما
يمرقبها السما حقتو
بس دايرة قلبي يكون أسير
وأنا قلبي حر في جنتو
لا برضى بي أغلال حرير
سكك الهوان ما سكتو
لا بنكسر بي جبرتها
ولا يوم بتنقص عزتو
دايراني ألحق ناس جميل
يتحكو بي زي قصتو ؟؟
إنتي بتعيشي ورود هواك
وأنا أبقى قيس في قصتو ؟؟
مسكينة !! أنا ما زول كدة
بشنق هواي في دمعتو
يا الحب يكون بي كبرياء
يا حب شنو البي ذلتو

وأنا جني جن الزول تريدو
يدارى عليك معزتو
ترفعلو إيدك بالسلام
يعمل تقيل في لفتتو
أنا يا عديل بتحبني
يا كل زول في سكتو
وأنا جني جن حباً يهين
الزول ويدلق دمعتو
لا قيس وليلى ولا كثير
لا جميل لا بثينتو
ديل مرمطوا الحب في التراب
وسقوهو كاساً ملتو
خلوا الهوى والكبرياء

بالذله مغصه تفتتو
للشاعر احمد عبيد

والله جميله يا زول
تسلم ايدك

شكرا لمرورك
الاخت العزيزه نجوى

لكن ماريكم فى هذه الابيات؟؟؟؟؟؟؟؟؟؟؟؟؟
هل يكون فى الحب تملك للاخر

بس دايرة قلبي يكون أسير (حابه)
وأنا قلبي حر في جنتو
لا برضى بي أغلال حرير
سكك الهوان ما سكتو
لا بنكسر بي جبرتها
ولا يوم بتنقص عزتو
دايراني ألحق ناس جميل
يتحكو بي زي قصتو ؟؟
إنتي بتعيشي ورود هواك
وأنا أبقى قيس في قصتو ؟؟
مسكينة !! أنا ما زول كدة
بشنق هواي في دمعتو
يا الحب يكون بي كبرياء
يا حب شنو البي ذلتو (ايه)