جيه التنسيق بتاعى علي طب اسنان الاسكندريه
بس ياترى هعيش فين في اسكندريه . في شقة العجمى طب ومصاريف الاكل والمواصلات والمصاريف
وهنا قال بابا في عبقريه (مفيش غير المدينه الجامعيه)
وقعد يكلم نفسه عن ايام شبابه فيها
وحاول يقنع ماما انها توافق ويقنعنى انا كمان شكله كان عاوز يخلص منى
بينى وبينكم انا مكنتش محتاج اقناع اصلا انا عاوز اسافر
رحت الاول لقريبي قبل اما اروح للمدينه الجامعيه وبعد ظهور كشوف المقبولين في المدينه بأسبوع رحت علي هناك وسألت واحد كان ماشي
(لو سمحت يا اخ هو نظام الاكل هنا ايه ) فرد عليا (ايه)
(الاكل الاكل ايه نظامه )
(يعنى ايه اكل )
اظاهر ان من ساعدته بالمدينه نسي شهوتة الاكل فسألته تانى
(طب انت ايه رأيك في المدينه)
(يعنى ايه رأي)
بصراحه زهقت منه ومشيت وسيبته ودخلت علي الاوضه اللي كنت بحلم بيها
والحمد لله اتخضيت من المنظر
الاوضه مينفعش ادخل فيها انا والشنطه بتاعتى مع بعض الا في اوضاع هندسيه صعبه
بس لاقيت حل هاروح مدرسة باليه علشان اعرف اتوافق مع الواقع
وبعدين سمعت خبط علي الباب . دا واحد جاري
(السلام عليكم)(وعليكم السلام)
(لو سمحت ملقيش عندك شوية شاي وسكر)(لا والله انا اساسا مبشربش شاي اصلا)
(طب كوبايه)(برضو اسف اصل الدكتور مانعنى من الشرب اصلا)
(طب فوطه فرشه ملايه خياره اي حاجه تطلع من ذمتك)(الله يسهلك)
وقفلت الباب قبل اما يبدء في اسطوانتة ابوه اللي في المستشفى وامه اللي في الجيش واخواته اللي في سجن الحبشه والجرى علي الايتام
المهم
جيه وقت الغدا ورحت علي المطعم اللي يجى بعد 7 كيلو كده من المدينه
دخلت وانا ميت من الجوع لاقيت واحد رايح الحمام ومعاه الصينيه فسألته
(لو سمحت انت رايح فين ) (دورة الميه)
(طب واخد الصينيه ليه معاك) (هاغسلها)
(هو انت خلصت اكل علشان تغسلها) (اظاهر انك جديد هنا) وسمعت واحد بيقوله
(هتغسلها ليه علشان وسخه يعنى الاكل هو اللي نضيف اوى)
الناس دى اكيد بتبص للنص الفاضي من الكوبايه
المهم غسلت الصينيه ورحت للي بيوزع الاكل بعد اما عرفت النهارده الاكل (رز وفراخ وخضار وسلطه وعيش)
اكل يجوع فعلا
وقفت قدام بتاع الرز فحط الكبشه في الحله وطلعها ونص الرز وقع في الحله تانى وهو مهتمش وحط النص اللي فاضل في الصنيه بتاعتى
فضلت واقف مستنى انه يكمل الرز زعق وقال(اتحرك) فهمته ان الرز ده ميكفنيش
فضل يزعق بكلام مفهمتوش ومسمعتش منه غير (التلاتين ملطوش اللي بتدفعوهم انتم تحمدوا ربنا انكم لاقين الاكل ده)
وكمل كلامه بالجمله الشهوره (توب علينا يارب من الشغلانه دى)
رحت للخضار وشمت ريحه فظيعه جايه من الحله وسألت الشيء ده ايه قالوا فاصواليا
طبعا مشيت من غير اما اخد حاجه خالص وانا بسأل نفسي (هو الموزع واقف ازاى وسط الريحه دى من غير ما يغم عليه)
رحت للفراخ وكنت بسأل نفسي ياترى اطلب منه صدر بدل الورك ولا.................
وقبل اما اكمل تفكير بصلي بصه خلانى امشي وانا ساكت
خدت الصينيه وهى ملايانه للربع وقلت مش مشكله انا هبص للنص الملايان من الكوبايه
بعد كده عرفت ان الاكل ليه طقوس وان الرز بيتنقي وهو بيتاكل والعيش لا يمكن يتقطع الا بمنشار كهربي _بس انا خدته معايا لغرض في نفسي_
ده غير السلطه اللي مضروبه بالشبشب والفاكهه اللي متتكلش اصلا والخضار اللي عليه اطنان من الملح
وشوشه شويه بدئت اتراجع عن نظرية النص الفاضي من الكوبايه_لانى بالتدقيق_ ملاقتش كوبايه اصلا
وبدءت اكتسب الاكتئاب بتاع المدينه الجامعيه وكمان صفة التتنيح والسنتحه
لدرجة ان في واحد سألنى
(ايه رأيك في المحاضره)(ايه......اااه)
(المحاضره ياابنى بسألك عن رأيك فيها)(يعنى ايه رأي)
والنهارده جاري الرخم خبط عليا فمدت ايدى وطلعت رغيف العيش وحدفته بيه
عرفت بعد كده انه خد 7 غرز في وشه يله يستاهل والله احسن
دخلت الاوضه بتاعتى ولفيت حولين نفسي 360 درجه وقفلت الباب بكعب رجلى بعدين نطيت مع احناء الرأس والنزول علي اطراف الاصابع مع تنى الركبتين علشان اوصل للسرير واخيرا وصلت
بس لاقيت الباب بيخبط
اكيد ده جاري الرخم جاي ينتقم منى ففتحت الباب لاقيت واحد غريب
(نعم ) (انا محسن)
(اى خدمه يا محسن)(انا شريكك في الاوضه)
وهنا لاقيت نفسي اغم عليا
