بتتلون حروف الكلمه فى الأوهام
تسافر فى المدا المسافات
تعيد الضحكه مخنوقه
ومشنوقه تقول آهات
بتتسلى بأوجاع الحروف منى
تسلينى تخلينى ألاعبها
وأستنى جواب الرد متردش
أتارى الرد بتعبها
أنا المدارى فى وهمى
ومتقرفص فى بحر الخوف
ومتكتف الاقينى بموت م الخوف
أتارى خوفى كان منك
عشان سنى مهوش سنك
وتاه منى وتاه منك
وتاه معنا
آهات الضحكه توجعنا
تسرسب فى مدامعنا
ومين فى الدنيا يسمعنا
خلاص مفيش أمل فيكى
ولا فيهم ولا فى الصمت
ولا فى ضحكة الأوهام
ولا فى حروف بتتلون
ولا كلمه بتتكون
ولا فى نجمة الراعى
ولا فى نسمه بعد العصر
بترفرف.
ولا حتى فى شربة ميه
بتهفهف.
قوليلى انت أيش بدك
دخيل الله
فى عرض الله
ياريت أعرف
