اشعار صلاح جاهين

خايف ابص من الشباك فجأه ومالاقيش مصر

خايف اقلق باليل كده زى ماقلق او على وش الصبح انا وظروفى بقى بعد العصر

وافتح الشباك وابص مالاقيش مصر

اعوذ بالله من الشيطان الرجيم ياخى فال الله ولا فاللك طب وانت مالك

يعنى بيتنا اللى بيطل على النيل ده

هيطل على فراغ دانتا دماغ

ويبقى بلدنا اسمها التجمع الخامس والمجاوره خمستاشر ؟مش هينفع

خايف ابص من الشباك مالاقيش مصر

لمت هدومها وخادت حاجاتها قرفت طفشت تعبت

لمت هدومها وخدت هرمها على نيلها وطفشت وحلفت ميت يمين ماهى قاعدالنا

مابينى وبينك برضه احنا زودناها كاننها استعمرنا ورثناها

هى دى البنت الاموره اللى كانت زى القمر

فجأه كبرت عجزت وبان عليها الكبر

خايف ابص من الشباك فجأه ومالاقيش مصر

__________________

الخط دا خطي
الكلمة دي
ليا
غطى الورق غطى
بالدمع يا عنية
شط الزتون شطي
والارض عربية
نسايمها انفاسي
وترابها من ناسي
وان رحت انا ناسي
ما تنسانيش هى
والخط دا خطي
والكلمة دى ليا
لاكتب على عينى
يحرم عليكى النوم
واحبس ضيا عينى
بدموعى طول اليوم
قبل الوفا بديني
زي الصلا والصوم
والدين فى عرف الحر
هم ومذلة ومر
وشجون تصون وتجر
احزان مخبية
والخط دى خطي
والكلمة دى ليا
لاكتب على كفي
والحبر من دمي
ياهمتي كفي
يا عزوتى ضمي
اول ما ح نوفي
بالوعدح نسمي
باسم اللى ماتوا صغار
فى المدرسه والدار
والمصنع اللي انهار
فوق الصنا يعية
والخط دا خطي
والكلمة دى ليا

يا عرب .. يا عرب .. يا عرب في أي مصر

يا عرب .. يا عرب .. اسمعوا صوت شعب مصر

أحفظوا لمصر المكان .. و احنا عالعهد اللي كان

مصر أوفى من الزمان ..
و انتو عارفين شعب مصر

يا عرب يا عرب يا أهل مصر

----------------------------

اللي خانوا العهد بينا .. و استباحوا كل حاجة

و استهانوا بالعروبة .. و استكانوا للخواجة

مستحيل حيكونوا منا .. نحنا حاجة و هما حاجة

هما باعوا الجلابية .. و الوطن و البندقية

و ا حنا أصحاب القضية ..

احنا ما بنبيعش مصر

يا عرب يا عرب يا أهل مصر
----------------------------

يطلع الدجال بزيفو .. يملا وادي النيل ضباب

ينزل الجلاد بسيفو ... يزرع الموت و الخراب

يطول الليل زي كيفو .... الصباح له ألف باب

و احنا بوصلتنا بإيدينا .. ما تخافوش من الليل علينا

مهما غبتو عن عينينا ..

انتو جوا بقلب مصر

يا عرب يا عرب يا أهل مصر

-------------------------

سينا و لا .. يافا و لا .. حيفا ولا ... دير ياسين

اسألوا الشمس اللي هالة .. عللي صحيوا مبدرين

يزرعوها نور و غلة .. دول جدودنا و لا مين ؟

حقنا و حتما ً يُعاد .. بس لو بانت سعاد

و البيان ده لوه معاد ...

و المعاد حيكون في مصر

يا عرب يا عرب يا أهل مصر

زى الفلاحين
القمح مش زى الدهب
القمح زى الفلاحين
عيدان نحيلة جدرها بياكل فى الطين
زى اسماعين
ومحمدين
وحسين أبو عويضة اللى قاسى وانضرب
علشان طلب
حفنة سنابل ريها كان بالعرق
عرق الجيبين
القمح زى حسين يعيش ياكل فى طين
أما اللى فى القصر الكبير
يلبس حرير
والسنبلة
يبعت رجالة يحصدوها من على
عود الفقير

بحـــــــــري
آخر النهار هفهفت نسمة على الميّه
بعودا ليام على الجدعان و عليا
يا صيادين القاروص غيّه
رمى الشبك ع السمك له خِفيّه

طرحت طرحه لقيت فى الطرحة جنيّه
حلِّيت وعقدتهم على عينيا
و نزٍّلتنى القرار صرخ الشبار فيا
إرمى الشبك ع السمك يا واد بحنيّه

لا دق ع الباب و أقول للحلو يا جارى
رمىْ الشبك صنعتي والصبر دا كاري
أصبر على الرزق لما تمتلى بحاري
وأصبر على العشق لما تنطفى ناري

يا ميت ندامة على اللى البحر ما ادّاله
مفتوح عليه الحنك والكف مادّاله
عدّى الشطوط والخطوط اللنش عدى له
غفر السواحل يا صاحبي مستعدا له

أنا مذهبي الصبر واصبر حتى على تارى
و اطعم شباكي و صنارى بصباري
أنا أعوم على الصبر لما أوصل لأوطارى
و الصبر دا مركبي والقلع والصاري

صلاح جاهين

شوفــي قد إيه
يا بخت من يقدر يقول
و اللى ف ضميره يطلّعه
يا بخت من يقدر يفضفض بالكلام
وكل واحد يسمعه
يقف فى وسط الناس و يصرخ : آه يا ناس
و لا ملام
ييجى الطبيب يحكى له ع اللى بيوجعه
يكشف مكان الجرح و يحط الدوا
ولو انكوى
يقدر ينوح
و انا اللى مليان بالجروح
ما اقدرش اقول
ما اقدرش ابوح
والسهم يسكن صدري ما اقدرش انزعه
شوفي قد إيه؟

إحنا النهارده إيه فى أيام السنة
شتا والاّ صيف
و فين أنا
إيه اللى وصّلنى هنا
أنا صاحب البيت والاّ ضيف
صوتي انحبس
ما اقدرش اقول
ما عرفش حاجه عشان اقول
ما عرفش غيرك انتى بس
يا بت ياللى فى حبك العقل اتهوس
مكان غريب
كأنه سجن كأنه مخدع لحبيب
كأنه بير
شباك حديد وعليه ستاير من حرير
والريح بينفد منه زى المسامير
الريح عوى
قلبي انقبض
قلبي اتلوى
الشمس تلج اصفر شعاعها صاروخ هوا
الضلمه تلج اسود كتير
أُلوف أُلوف القناطير
خبينى فى شعورك يا بت
أحسن عروقي اتخشِّبت
شعرك خشن زى الحِرام الصوف يا بت
خبّينى فيه م الزمهرير ..
و نيمينى فى السرير
دخل النبي بردان خديجه لفِّته
حطت عليه غطيان لحد ما دفّتُّه
دخل النبى بردان و قال : فين الغطا
البسمة غطت شفِّته.

صلاح جاهين

__________________

النخل في العالي والنيل ماشي طوالى
معكوسة فيه الصور .. مقلوبة وانا مالي
ياولاد انا ف حالي زى النقش فى العواميد
زى الهلال اللى فوق مدنة بنوها عبيد
وزى باقي العبيد باجري على عيالي
باجري وخطوي وئيد من تقل أحمالي
محنية قامتي.. وهامتي كأن فيها حديد
وعينيا رمل العريش فيها ومِلح رشيد
لكنى بافتحها زى اللى اتولدت من جديد
على اسم مصر
مصر . . التلات أحرف اللى شاحنة ضجيج
زوم الهوا وطقش موج البحر لما يهيج
وعجيج حوافر خيول بتجر زغروطة
حزمة نغم صعب داخلة مسامعي مقروطة
في مسامّى مضغوطة مع دمي لها تعاريج
ترع وقنوات سقت من جسمي كل نسيج
وجميع خيوط النسيج على نبرة مربوطة
أسمعها مهموسة والا اسمعها مشخوطة
شبكة رادار قلبي جوه ضلوعي مضبوطة
على اسم مصر

وترن من تانى نفس النبرة في ودانى
ومؤشر الفرحة يتحرك في وجدانى
وأغانى واحشانى باتذكرها مالهاش عد
فيه شيء حصل أو بيحصل أو ح يحصل جد
أو ربما الأمر حالة وجد واخداني
انا اللى ياما الهوى جابنى وودانى
وكلام على لساني جانى لابد اقوله لحد
القمح ليه اسمه قمح اليوم وأمس وغد
ومصر يحرم عليها .. والجدال يشتد
على اسم مصر
ولما زماني رماني عليل
نسيت كل شيء عن حبيبي الجميل
لكن هوّ أبدا
انا مانساهوش
نسيت مشيته وصوته كان شكله إيه
ورسمة شفايفه
ولمسة إيديه
نسيت نظراته
نسيت لون عينيه
وقوس الحواجب وسهم الرموش
لكن هوّ أبدا
انا ما انساهوش
ــــــــــ
نسيت اسمه وحكايته وعرفته فين
وعشنا سوى العمر
والا يومين
وكان م البشر
والا طير بجناحين
نسيت حتى كان له وجود أو مالوش
لكين هوّ ابدا
أنا ما انساهوش
ـــــــــــ
قطعوا الأغاني وطارت نشرة الأخبار
دارت على كل دار في الكوكب الدّوار
يا حاضرين اعلموا الغايبين بأنه فى مصر
اتغيّر الاسم منذ الآن فأصبح . . مصر
ضحك التاريخ ضحكته المشهور بها واندار
ودخل مناقشه مع الجغرافيا عما صار
هل نعترف بالبيان اللى أذيع العصر
أم ننتظر مصر تطرد إسرائيل بالقسر
و ساعتها تحصل بكل جدارة يوم النصر
على اسم مصر

على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرمية جريحة حرب
باحبها بعنف وبرقة وعلى استحياء
واكرها والعن أبوها بعشق زى الداء
واسيبها واطفش في درب وتبقى هيّ ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مصر

مصر النسيم في الليالي وبياعين الفل
ومرايه بهتانة ع القهوة .. أزورها .. واطل
والقاها برواز معلّق عندنا في البيت
فيه القمر مصطفى كامل حبيب الكل
المصري باشا بشواربه اللى ما عرفوا الذل
ومصر فوق في الفرانده واسمها جولييت
ولما جيت بعد روميو بربع قرن بكيت
ومسحت دمعي في كمي ومن ساعتها وعيت
على اسم مصر

مصر السما الفزدقى وعصافير معدية
والقلة مملية ع الشباك . . منديّـة
والجد قاعد مربّع يقرا في الجرنال
الكاتب المصري ذاته مندمج في مقال
ومصر قدامه أكثر كلمة مقرية
قريتها من قبل ما اكتب اسمي بإيديا
ورسمتها في الخيال على أبدع الأشكال
ونزلت أيام صبايا طفت كل مجال
زى النادي وفؤادي يرتجف بجلال
على اسم مصر

رحيلاً رحيلاًًًً بغير هوادة
رحيلاً فإن الرحيل سعادة
عبادة
إرادة
سيادة
ولادة
رحيلاً . . إلى أين ليس يهم
وليس يهم بأي وسيله . . .
أجيراً بلقمته في البواخر ..
على واحد من جياد القبيلة..
على مقعد في ذرى الجو فاخر
وتملأ لي الكأس بنت جميلة..
على قدمي..أو بفكري..أهاجر
أبادر
أغادر
أخاطر
أسافر
ولكن إلى أين.. ليس يهم
إلى حيث لا تعبر الأفق شمس
إلى القطب.. أو حلقة الاستواء..
إلى حيث يسمع للجن همس
إلى باطن الأرض أو في الفضاء
إلى مرفأ الغد .. أو أرض أمس
أرى كل شيء ومن أين جاء
وافعل ما قاله القدماء
من الفقراء
أو الحكماء
أو الأمراء
أو الأشقياء أو البلهاء فليس يهم
لقد قيل وهو الكلام المهم
اللي يعيش ياما يشوف
واللي يمشى يشوف أكتر

شفت الجبرتي بحرافيش الحسين وبولاق
بابن البلد ماشي زى النمس في الأسواق
بالفلاحين ع المداخل من بعيد و قريب
بالأرنؤوط بالشراكسة بكل صنف عجيب
مترصصين سوررهيب مزراق فىريح مزارق
كأنهم لا بشر ولا خلقة الخلاق
ومصر فلاحة تزرق بين رقيب ورقيب
من غيرأبوالهول ما ينهض ناهضة شايلة حليب
والصبح بدري الجبرتي ينام وقلمه يسيب
على اسم مصر

مصر اللي عمر الجبري لم عرف لها عمر
وطلع لقاها مكان مليان عوامّ و ذعر
جعيدية غوغاء يجيبوا تملي وجع الراس
وخليط أفارقه هنادوة روم ملل أجناس
والترك في القلعة والمماليك خدودهم حمر
كان عمرها ستلاف سنه..كلها سنين خضر
بس الزمان يختلف زى اختلاف الناس
ناس تبنى مجد وحضارة وناس بلا إحساس
وناس تنام لما يزحف موكب الأحداث
على اسم مصر
ـــــــــــ
أنا اللي اسمي حتحور.. أنا بنت رع
مثال الأمومة و رمز الحنـان
تفيض حلماتي و تملا الترع
و تسقي البشر كلهم و الغيطان
ــــــــــــ
أنا ربة الحب حتحور أنـا
أنا السيدة المنجدة المغرمين
وكم من محب ف هواه إنضني
دعاني وطيبت خاطره الحزين
ـــــــــــــ
أنا طيبة إنما طبعي صعب
وديعة..ولو ثرت بطشي مهول
ما أشوف اللي قدامي لو ألف شعب
أدوسهم وتجرى دماهم سيول
ـــــــــــــ
ويوم رع ما فات بسناه في السما
وكل العين خايفة تنظر إليه
وجاله القمر خلقته معتمة
وعدى قصاده ..وضلم عليه
ـــــــــــــ
يا ويل اللي فتّح في ابويا العظيم
يا ويل من تطاول يا ويل من ضحك
يا ويلك يا مصر مصيرك اليم
أنا اللي حتحور أنا ح امسحك
يحاول يهديني رع ما اسمعوش
وادمّر واطيح في البلاد والعباد
أنا الطيبة .. كنت زى الوحوش
سفكت دماء البنات والولاد
ـــــــــــــ
دبحت المحبين في عز القبل
هدمت المعابد على المنشدين
قلبت على النحاتين الجبل
حرقت الغيطان هم والفلاحين
ـــــــــــــ
لحد ما رع نادى ع الآلهة
وقال صبوا في النهر كل النبيذ
وشفت المياه حمرا ومزهزهة
وظنتيها دم الضحايا اللذيذ
ـــــــــــــ
شربت انتقاما شربت شربت
وأنا بلعن المفترى والغبي
وحبّة بحبة عن الوعي غبت
ونمت على النيل في ضيّ أبى
ـــــــــــــ
وقمت .. بكيت من فؤاد أم ثكلى
ونهنهت فوق صدر مصر العريض
على العالم المبدورين جنبي قتلى
وكان دمعي ينصب في النيل يفيض
ـــــــــــــ
وأقول ليه يا مصر ولادك كده
يا إما المذلة يا يتجبـرّوا
يا خوفي يا فرحة قلوب العدا
ويا ندمي لو ما يتغيـروا
ـــــــــــــ
ومن يومها والنيل في نفس المعاد
يفيض كل عام قبل فصل الخريف
بلون حمرة الدم يملا البلاد
ويملا النسايم بعطر مخيف
ـــــــــــــ
بعطري أنا اللي اسمي حتحور أنا
وعطري مخيف وحنون وطري
يفرح بس مرّة في كل سنة
ويهمس يا مصر .. واحذري
ـــــــــــــ
نهايته مصر اللي كانت أصبحت وخلاص
تمثال بديع انقلب وأنفه في الطين غاص
وناس من البدو شدوا عليه حبال الخيش
والقرص رع العظيم بقى صاج خبيز للعيش
وساق محارب قديم مبتورة ف أبو قرقاص
ما تعرف اللي بترها سيف والا رصاص
والا الخراب اللي صاب عقل البلد بالطيش
قال بن خلدون أمم متفسخة تعيش ليش
وحصان عرابي صهل صحّي جميع الجيش
على اسم مصر

حصان عرابي جميل حصان عرابي أصيل
حصان عرابي رشيق القد ديله طويل
يسهر مع الخيل طول الليل يتكلم
ويقول أراء رغم انه ماكانش متعلم
ويقف في عابدين وياخد زاوية البروفيل
للرسامين يرسموه ونشوفه جيل ورا جيل
ويعدى كالريح على المجاريح ويسلم
وحافره على الصخر في التل الكبير علّم
ولما صابه انفجار القنبلة إتألّم
على اسم مصر

والمس حجارة الطوابى وأدق بكعابي
يرجع لي صوت الصدى يفكرنى بعذابي
يا ميت ندامة على أمة بلا جماهير
ثروتها يعملها جيشها ومالها غيره نصير
والشعب يرقص كأنه عجوز متصابي
انهض من القبر احكي القصة يا عرابي
يطل لي رافع الطهطاوي م التصاوير
شاحب ومجروح في قلبه وجرح قلبه خطير
وعيونه مغرورقين بيصبوا دمع غزير
على اسم مصر
مالك سلامتك بتبكى ليه يا طهطاوي
قال لك عرابي .. انكسر بسلاح أوروباوي
وسلاح أوروبا ما هواش المدافع بس
ده فكر ناقد مميز للثمين والغث
قلناها ميت ألف مرة بصوت جهير داوي

بس الحماقة لاليها طبيب ولا مداوي
ولاحد م الخلق بالخطر اللي داخل حس الغفلانين اللي خلوا العقل صابه مس
قالوا الخطر هو فكر أوروبا لو يندس
على اسم مصر

أحسنت في القول صحيح يا ولد يا متنبي
جبت اللي جوه الفؤاد عن مصر متعبي
وحكمت بالعدل لكن بعضنا انظلموا
"يا أمة ضحكت من جهلها الأمم"
العلم كان عندنا من صغره متربي
لكنه هاجر وعدى البحر متخبي
لما الإيران هجموا ثم اليونان هجموا
ثم اليونان دمّروا ثم التتار هدموا
ثم الجميع كل واحد جه مسح قدمه
على اسم مصر

أيها الديكُ رفيعُ الموضع
يا صفيحاً فوق مسمار يدور
صف لنا فعل الرياح الأربع
قل لنا .. لو كنت تدري ما يدور
ـــــــــــــ
قال صه . فالآن ريح الشرق جاءت
تحمل الضوضاءَ من سوق المزاد
وتغني دون لحن كيف شـاءت
أنا ريح الشرق أدعي شهر ذاد
ـــــــــــــ
أنا أحكي ثم أحكي ثم أحكي
وأمامي السيف كالعشب يميل
وبكائي يتساوى مع ضحكي
طالما كان بأسلوب جميل
ـــــــــــــ
ثم ها قد أرسل الغرب رياحه
تزكم الأنف برائحـة عجب
وتغني كبغيّ في منـاحـة
أنا ريح الغرب لوني كالذهب
ـــــــــــــ
أنا صفراء برمل الصحراء
أدفن الخضرة تحتي دون رحمة
أوصدوا الباب بوجهي الحقراء
حسنا فلتصبح القرية فخمة
ـــــــــــــ
ثم ها قد أقبلت ريح الجنوب
بدخان الدهن تسري عابقة
وتغني أنني أدعى الهبوب
أنا سوداء كبئر المشنقة
ـــــــــــــ
أنا سوداء كأفعى هائلة
كرماد النوم ينثر في العيون
كالعرايا في المروج الموحلة
سعداء .. تعساء .. يرقصون
ـــــــــــــ
وتأنى برهةً ديك الصفيح
يلقط الأنفاس وهو يترنح
دائرا دورته مع كل ريح
وأخيرا صاح كالأسد المجنح
ـــــــــــــ
هللّويا .. أقبلت ريح الشمال
في غلالات رقاق راعشة
وهي تشدو بحنوّ ودلال
ها أنا ريح الشمال المنعشة
ـــــــــــــ
إنني وردية مثل العسل
ديدمونا .. هكذا يدعونني
قد عبرت البحر يحدوني الأمل
لعطيلٍ أسمرٍ . .
يخنقني!

ومضى ديك الرياح في دعة
من يمين ليسار يتـذبـذب
وبدا أضحوكـة وإمـعة
وهو مصلوبٌ شهيدٌ يتعذب
ـــــــــــــ
وعلى رأي المثل
الديـك الصفيـح
بيدوخ ويّا الـريح
والديك الفصيـح
م البيضة بيصيح
ويقول بالصريح
الفكرة فوق في الشمال يالله ألحقوه ياولاد
لحقوه ولاد من ولاد الأغنيا الأسياد
وهم راجعين رموه م الباخرة في البحر
ونزلوا حكموا في ظل الإنجليز والقصر
ومصر في الشمس بتغربل كلام منعاد
عن ابن بنت ابن حنت وطارق ابن زياد
والإنجليز راضية بالخطباء وخطب الفخر
خطيب يهز الرؤوس وخطيب يهز الخصر
وخطيب يموت موتة الأبطال قتيل القهر
على اسم مصر

والإنجليز معجبين بمراسم التأبين
مات مصطفى كامل إتملت البلد صواوين
والمشرقين شوقي جابهم لجل يبكوا عليه
آه لو عرف هم إيه دلوقت وبقم إيه
المشرق الأولاني هو شعب الصين
هزم التخلف بتنظيم إشتراكى رصين
تنظيم يروح اللومان على طول كده برجليه
والمشرق التاني ينحط الحديد في إيديه
مليون شهيد يعنى ثورة تخض شوقي بيه
على اسم مصر

هل مصر موميا جميلة صورتها فوق النعْش
يعشقها مجنون ينادي عليها ولاتطلعشْ
هل مصر نار صفصفت والنفخ فيها محال
والأرض نشعت على رمادها استحال أوحال
سألت أنا الرافعى كان عجّز ولا بيسمعش
لكن عينيه كانوا يحكولي قصص ما اشبعش
يقولولي ماتخافش مصر بخير وعال العال
مصر الجبرتي ومصر الرافعي حال غير حال
انظر محمد فريد أعظم وأرقى مثال
على اسم مصر

خد الكتاب في يمينك وانظر الترقيم
عند المحبة وعند الموت في حرف الميم
تلقى محمد فريد بينهم مقيم ع العهد
وتلقى وجهه المدوّر زى قرص الشهد
مليان حماسة وكياسة وجدعنة وتصميم
على إيه مصمم؟ .. يسهّم زى كل زعيم
ويقول على الثورة مهما إتطلّبت من جَهد
أنا مش عرابي اللي وأدوا ثورته في المهد
أنا بابني في السر شيء صعب المنال كالفهد
على اسم مصر

محلول مركز من السكر في كباية
وف قلبه يتلضم حباية حبايه
سكر نبات بللورات الماظ بتضوى ضى
وتفضا الألماظات تكبر شوي شوى
لحد ما العقد يبقى في الجمال غاية
ده الحزب في الشعب نضرب به المثل آية
الصلب والسايل الاثنين سوا يا خىّ
تنظيم محمد فريد في كل قرية وحي
بللوره بتشع بالثورة اللي يومها جيّ
على اسم مصر

العقد الماظ ورقبة مصر لا يقـالـه
ضيّع فريد كل أرضه عليه وأمواله
وفجأة حاكموه ويالله نفوه عن الأوطان
وحرب عالمية أولى ووفد م الأعيان
وثورة و الإنجليز انحطوا و انشالوا
مين اللي نظّم فلول الشعب ده بحاله
ازاي جميع البلاد تنهض في نفس الآن
القاهرة إسكندرية منفلوط أسوان
وبعيد يا ولداه فريد مرمي وحيد شرقان
على اسم مصر

السيمفونية اسمها الثورة على المحتل
سنة تسعتاشر اتعزفت في كل محل
تأليف محمد فريد ألّفها من سنوات
وكتب لها النوتة بوق وبيانو وكمنجات

عزفوها من غير قيادته وجمعهم ما اختل
غير وقت صرف الأجور لما النفر ينذل
من وقتها وغلْوشت نغمات على نغمات
وسعد زغلول زعيم مشغول في الانتخابات
يخطب ويضرب بإيده يطبع البصمات
على اسم مصر

وف أوضة عريانة فيها كل شيء بردان
رقد فريد وحده بالحمى و بالهذيان
وقام وقف ع السرير في تلج ألمانيا
ينده يا مصر اسمعي اللي مفارق الدنيا
وصيتي الثورة لا شتراكية والبنيـان
ثورة بحق وحقيق مش حركة م الأعيان
ما تغمضوش عن وحوش الغرب ولا ثانية
ح تروح وحوش لنجليز تطلع وحوش تانية
وسقط ونطق الشهادة ونظرته الحانـية
على اسم مصر

__________________

أنا الذي مشيت أدوّر باشتياق وحنين
على مصر .. والمشي خدني من سنين لسنين
لحد ماسنينها وسنيني بقم واحد
وعاصرتها يوم بيوم لم فاتنى يوم واحد
وحضرت شاهد عيان مولد وموت ملايين
ما زعلت من كلمة قد البركة في الجايين
مين هم دول يا جدع .. ما توحد الواحد
البركة فينا وفي السامعين بالواحد
أنا قولتها بنرفزة .. من غيرة الواحد
على اسم مصر

مصر الرمال العتيقة وصهدها الجبار
والنيل كخرطوم حريقه وحيد في وسط النار
في إيدين بشر نمل رايحه وجايه ع الضفة
فيهـم مطافي وفيهم كدابين زفـة
وفيهم اللي تعالى وقال أنا حكمدار
وكل باب م البيبان مقفول على أسرار
وكل سر بحريقه عايزه تتطفـا
من أهلي تندهلي وتقولي تعا إتدفا
أنا اللي عمري انكتب إلى يوم ما أتوفى
على اسم مصر

على اسم مصر ارفعوا الأنخاب وأملولي
شدوا الوتر ع القمر يا شباب وغنولي
نسكر على حبها بالفن والإحسـاس
نسكر ودمع الحماس يملا لنا تانى الكاس
احنا يا حلوة الفدا بس اطلبي و قولي
يا سمره بعيون كده وسنّتك لولي
وغنوة الحب تعلا ويسمعوا الحراس
يصفّروا ويحضروا بفرقة طبول ونحاس
ويتقفل سجن مصر أمام الناس
على اسم مصر

والمطبعة تدور وتخطف كل إيد منشور
عيش لسه م الفرن طالع ريحته ريحة النور
يا فلاحين يا جنود يا طلبة يا عمال
عدوكم خلف لاستعمار ورأس المال
عاش الطريق لشتراكي قوم يا شعب وثور
وحكمكم حكم إقطاعي عميل مأجور
عاش الكفاح بالسلاح إلى القنال يا رجال
خلوا حياة لنجليز المستقرة محال
والشمس نامت ليلتها وفكرها شغّال
على اسم مصر

القاهرة في إكتئاب والأنس عنها غاب
من عتمة تدخل لعتمة كأنها ف سرداب
أو قرية مرمى عليها ضل هجانـه
الحظر م المغربية بأمر مولانا
ومصر في الليل بتولد والبوليس ع الباب
صبية ولاّدة يابا ولحمها جلاب
طلع الصباح زغرطت في السكة فرحانة
على كتفها مولودتها لسه عريانة
وف لحظة كانت جميع الدنيا دريانة
على اسم مصر

على كتفها مولودتها وتجري وتنادي
يا ولادي من يوم ميلاد الأرض يا ولادى
ينهض لها امحتب بدواه يقوِّيها
وبنتاؤور ينشد الأشعار يهنيها
وسعد زغلول يكح يزلزل الوادي
وعرابي يهمس ومصر ترد بتمادي
تقوله آه برضه ثورة جيش و ح أحميها
بالدم بالروح بكل حياتي ح أفديها
أما الاسامي معنديش غير اسمها
على اسم مصر

مولودة كبرت وشبت في تلات تيام
من هبّة هبّت .. لثورة لبت الأحلام
والعرش عام راح إيطاليا بعيد ورا البراميل
يا هتلري دي حقيقة و الا وهم جميل
ومصر من إمتى كانت حظها بسام
ظهر قميص العرق متشمر الأكمام
أنا شفته عقلي برق وبدأ لصاحبه يميل
نقشت له ف قلبي أحلى وأروع التماثيل
براعي والمطرقة وبإيدي والأزميل
على اسم مصر
ـــــــــــــــــــــــ

باليـــه
. .وبنت أم أنور , بترقص باليه
بحيرة البجع ,
سلام يا جدع . . .
سلام ع الإيدين اللي بتقول كلام ,
سلام ع السيقان اللي مشدودة زى الوتر ,
سلام ع القوام اللي مليان دلع مش حرام ,
حلال , زى نور القمر . . .
سلام ع الخطاوي اللي بتمر ع الكون تداوى
سلام ع الغناوي ,
سلام ع النسيم في الشجر.
. . وبنت أم أنور , بتضرب بساقها الفضا,
وبتشب , وتلب , وتنط نطة غضب ,
ونطة رضا ,
و بتقول بلغوة إيدها : اللي فات انقضى
. . حقيقي , مضي .
كات أمك يا بنتي ,
في أزجال معلمنا بيرم عليه السلام ,
ما تعرفش تركب سوارس تروح الأمام ,
و تمشي . . تقع .

أرض مصــرية

ملس بخدك ع التراكيب الجلوجية
والمس بيدك كرمشات الزمان
أحجار بهيئة ميه مغلية
معموله هي ولا عفوية ؟
من عهد آدم والا عام الطوفان؟
ترابيزه بعد السكر ق××××ا الخمورجية
مالت سبع طبقات على طبقات
والسن بارز فى السما طبقات
شامخ شموخ فرعون جرانيتى
حالم فى بهو الأعمدة من غير نفرتيتى
وف جبهته الحيه . .
والرخ بيقدف بأجنحته الجسام
صاعد يتمتم مشهد التتويج
انصت بودنك تسمع الاهازيج

من فرقة الكهنة ذوى الإحترام
والرقاصات فى المعبد الملكى العتيد التليد
بطوحوا ساق المرحفى الهوا
وينطوا ع الامشاط بخفه سوا
ويدخل العسكر بأجمل نظام
والجنرالات تحت الرايات العظام
بثبتوها فوق ربى ""سينة""
ويدقوا بالأقدام

سينة . .
نبض وسرى فيكي يادى الزلطة
وح يسرى دايما . . بس تشبعى دم
شكلك كمثل القلب ع الخارطة
انش لله دايماً يبقى خالى الهم !
ياللى بكيت ياما
وحفرت وديان دمع فوق خدك
ملس بخدك ع التراكيب الجلوجية
وانصت بودنك تستمع ترانيم حماسية
ممزوجة من صوت صندل الفتيات
عبر السنين
مع ضباشات العسكريين لما أدوا الفرض
ويدقوا بالأقدام
ويطلع الصوت الحُمَمْْ الإلهية . .
دي أرض مصرية . .
در أرض مصرية

صــــديق عـمـري
عشرين سنة
عمري أنا
أنا العجوز الشايب الحزين
أنا العجوز من غير ما تمضي السنين
أنا العجوز من قبل سن أربعين
عمري النهاردة
رغم المرار ده
في عمر وردة
عشرين سنة

كانلي صديق وكان حبيب عمري
هو اللي علمني المشيب بدري
حضرت مولد كل شعراية بيضا
عبرت سوالفه كما الشهاب تجرى
كما برْق سيف الحق في الهيضا
وسط الظلام تبرق هلال هجري
تحسب تاريخ الكون حقيقة ومجاز
كالأبجدية بالقلم لردواز
بالشعر لابيض كان يعلمني
أستاذ تاريخ وفي التاريخ أستاذ
قابلته من عشرين سنة وكلمني
وأنا لسة باحبي في الظلال
علمني مشية الرجال
سلمني راية النضال
ولحد هذا اليوم . . بيلهمني
وخياله كل ما اقع يقومني
وكل ما اتبعتر يلملمنى
وانهض واقوم بأمل جديد
وبقلب أقوى من الحديد
وليد . . عجوز . . شايب . . حزين
وعمري عشرين سنة

شــــــــــدوان
كان ياما كان وعلى مدى الأزمان
بلد وكانت أول البلدان
بكرية الدنيا لكين صلي ع النبي
كانت ترضع أمها الألبان
من قبل منها الأرض عاشت سداح مداح
تسكنها أشباح ناس على حيوان
وشعرها منكوش ولا عارفة إسمها
والعقل غايب والكلام هذيان
الا وتطلع جنب نيل مصر للعجب
مخاليق تقيس الأرض بالفدان
تعمل بيوت لها سقف ومحل للأدب
وفرن عيش ومراية للنسوان
تحسب بروج النجم والشمس والقمر
وتقول ح ييجي يوم كذا الفيضان
تبري القلام البسط وتَخِط ع الورق
جوابات حكومة وفلسفة وبيان
تمان تلاف عام كل عام الف تجربة
ولكل تجربة ألف ألف ميدان
يا مفتحين العين كلامي يسركم
ويا غفلانين نشوا على الدبان
ولا كل من لها خارطة قالت أنا بلد
الرك ع المدنية والعمران
وعمار يا مصر عمار بنيلك وأمتك
عمار بأفراحك وبالأحزان
آدى اللي دم الجندى ع الصخر اثبته
بحروف من النار فى نهار شدوان

الأميـــر
المجد للجندى اللي من غير سبب لبس حرب
الفارس اللي مش على صهوة جواد
الراجل الغلبان فى روحه وعيشته كرب
لكين أمير عاشق بروحه ودمه جاد

عاشق بروحه ودمه جاد وكان أمير
وكان ولي العهد فى الكون الكبير
الصولجان مكتوب باسمه فى الديوان
والوحش والغزلان باسمه تستجير

والنحل والعصافير تجيله تكلمه
أنبل أمير أساطير خيالك يرسمه
السحارين سحروه صبح عتال فقير
شيل الحمول يحنيه ويوشك يهدمه

عتال فقير في السوق يسير محنى البدن
حكموا عليه يفضل كده طول الزمن
لحد ما ف يوم دق باب قلبه الهوى
وكان هواه وغرام صباه هو الوطن

لما انضرب بالنار على المتاريس ومات
بصديري بلدى وبقميص مربعات
مالت عليه الحلوة بلده ودمَّعت
والدمع زى الدم يعمل معجزات

الدمع فك السحر والأمر اتضح
وعرفنا مين هو الطريح اللي انطرح
وفوق جبينه اللي بقى ف وش السما
زالت خطوط الهم وارتسم المرح

عم صلاح جاهين ...هو مين زيه مين.
لعب بالكلمه وظفها...سقا كل العطشانين
تسلم ايديكي يامها ده احسن موضوع قرائته في المنتدي

شكرا يا مها على الاشعار الجميله للشاعر الجميل صلاح جاهين

» رباعيات صلاح جاهين
» من روائع صلاح جاهين..........
» رباعيات صلاح جاهين
» من رباعيات صلاح جاهين
» قصاقيص ورق.....صلاح جاهين