من رباعيات صلاح جاهين

إنشـد يـا قلبـي غنــوتك للجـمـال

وارقص في صـدري من اليمين للشـمال

مـا هـوش بعيـد تفضـل لبكره سـعيد

ده كـل يـوم فيـه ألف ألف احتمـال


عـجبي !!

آه لـو أنا ومحبـوبي


آه لـو أنا ومحبـوبي جـزنا الفضـى

فـى سـفينة وحـدينا.. وأشـيا رضا

سـاعة صـفا تعجبنـا نرجـع لـهـا

والهـم قبـل ما ييجي… يبقى مضى

عـجبي !!

أهوى الهـوى


أهوى الهـوى وهمس الهوى في العيـون

وبسـمة المغـرم.. ودمـعـه الحنــون

وزلــزلات الحــب نهــد الصــبا

أكـون أنـا المــحبوب.. أو لا أكـون


عـجبي !!


أوقـات


أوقـات أفـوق ويحــل عنـي غبـايا

وأشـعر كأني فـهمت كـل الخبـايـا

وافتـح شـفايفي عشــان أقـول الدرر

مـا أقـولش غير حبة غزل في الصبايا


عـجبي !!

إيـديا فـي جيوبـي


إيـديا فـي جيوبـي وقلبـي طـرب

سـارح في غربة بس مش مـغترب

وحـدي لكـن ونسـان وماشـي كده

وبـابتعد… ما أعرفش… أو باقترب


عـجبي !!

اللي انت بيتك قش مفروش بريش
تقوي عليه الريح .. يصبح ما فيش
عجبي عليك حواليك مخالب كـــــبار
و ما لكش غير منقار و قادر تعيش
عجبي !!!!


كان فيه قمر كأنه فرخ الحمام
علي صغره دق شعاع شق الغمام
أنا كنت حاضر قلت له ينصرك
إشحال لما حتبقي بدر التمام
عجبي !!



يا ميت ندامه ع القلوب الخـــــــــــلا
لا محبة فيها و لا كراهـــــــــــه ولا
حتي يا قلبي الحزن ما عادش فيـــــك
معلهش .. لك يوم برضه راح تتملا
عجبي !!


العشب طاطا للنسايم و نـــــــــــــــــــــخ
أخضر طري مالهش في الحســـــــن أخ
عصفور عبيط انا .. غاوي بهجه و غنا
ح انزلهنا.. و انشا لله يهبرني فــــــــخ
عجبي !!!



غمض عينيك و ارقص بخفة و دلع
الدنيا هي الشابة و انت الــــــــجدع
تشوف رشاقة خطوتك تعبــــــــدك
لكن انت لو بصيت لرجليك ....تـقع
عجبي !!!