لماذا 22 جملة تحديداً؟!
.. يا أخى إنت قارئ غريب فعلاً.. باتفائل بيه يا سيدى.. باحب أبوتريكة يا عم.. مش حافظ غير لهنا يا ستى.. قارئ غريب!
عموماً ما تزعلش.. الـ22 جملة هى التى تذكرتها فى حصر لنتائج هذا العام،
فلو عندك زيادة فكرنى، وها هنا تذكير بذكريات ليس من السهل نسيانها.. خذ
عندك:
- «إحنا لساننا عفيف يا (قراميط) يا أنجاس».. الشيخ وجدى غنيم بتصرف (لزوم الاحترام الذى لم يراعه الشيخ).
- «مفيش حاجة فى المتسابة».. الفريق أحمد شفيق فى أحد تصريحاته المهمة.
- «اللى متصورين إن هما يهربوا من قدام عينى ويروحوا فى حارة مزنوقة
عشان يعملوا حاجة غلط».. الرئيس محمد مرسى لمؤيديه عن المنتمين للنظام اللى
فات.. يا جامد يا ريس.
- «تجربتكم متخلفة بنت 60 كلب».. عمرو أديب للإخوان المسلمين مقارناً تجربتهم بالتجربة التركية والتونسية.
- «ما ذنب النباتات؟».. د.محمد بديع المرشد العام للإخوان المسلمين.
- «اللى هيقول عليا متهم فى موقعة الجمل هديله بالجزمة».. مرتضى منصور.
- «كم واحد اعتلاكى باسم الفن».. عبدالله بدر لإلهام شاهين رداً على انتقادها للتيار الإسلامى.
- «لو مات الزند.. فهناك مليون زند».. الرجل الزند.. أقصد المستشار أحمد الزند بعد الاعتداء عليه أمام نادى القضاة.
- «ضد مبارك ويّا الابن.. ضد الفردة والاستبن».. من هتافات المعارضين لخيرت الشاطر ومرسى.
- «هاتولى راجل».. الشيخ السلفى محمود شعبان على قناة الحافظ معقباً على قبول الرئيس مرسى الحوار مع «امرأة متبرجة».
- «عايزين تواليتات وحمامات و100 تغييرة.. كلوت وفانلة و100 بشكير».. ممدوح حمزة فى ميدان التحرير استعداداً للإقامة الكاملة.
- «جبنة نستو يا معفنين».. أحد الإسلاميين المهاجمين لاعتصام الاتحادية
مستنكراً أن يستخدم معتصمو حمدين والبرادعى (الخونة) الجبنة النستو فى
اعتصامهم.
- «قول لمحمد يكلم البيت عندى.. يقول لهم إنى هاتكلم دلوقت».. محمد مرسى
قبل فوزه بالرئاسة لأحد معاونيه داعياً إياه لتنبيه (البيت) ألى أنه سيظهر
فى التليفزيون.
- «اشتم ما هو ده تمامك».. سامية لزوجها البطة فى إعلان العلبة الذهبية.. مقوى جنسى سعادتك من إنتاج طارق نور (الإعلان وليس المقوى).
- «باسم يوسف مغرى أكتر من ليلى علوى ولازم يلبس نقاب».. الشيخ أبوإسلام منتقداً (فتنة) باسم يوسف.
- «أنا سعيد إنك سألت السؤال ده».. حازم أبوإسماعيل فى أوقات فراغه.
- «أين البرلمان؟».. د.عصام العريان آناء الليل وأطراف النهار.
- «النهضة مشروع فكرى».. د.ياسر على المتحدث الرسمى باسم الرئاسة ناسباً النهضة للأستاذ فكرى.
- «فى 6 أكتوبر 1973.. كنت أنا كبير.. فالساعة 2 وخمسة.. كنت قاعد بتغدى
مع واحد صاحبى».. صبحى صالح قيادى الإخوان المسلمين متحدثاً لتامر أمين عن
ذكرياته فى العاشر من رمضان (ما كانش فيه صيام أيامها غالباً).
- «آه يا مجلس يا ابن الحرام.. بعت دم الشهيد بكام».. الألتراس للمجلس العسكرى بعد مذبحة بورسعيد، وماحدش قال بكام.
- «مصطفى يونس خرم».. د.علاء صادق واصفاً مصطفى يونس لاعب الأهلى السابق
ومذكراً إياه بـ«مصطفى تونس» والخرم الذى تلقاه قبل 30 عاماً.. دنيااااا.
- «هتمطر عليك منى شخصياً».. عماد الدين أديب لباسم يوسف بهدووووووووء
بقلم
محمد فتحى
