النهارده معايا ومعاكم خبير التجميل "علاء التونسي" اللي هيعرفنا إزاي نقدر نعمل ميك أب سواريه لو عندنا سهرة أو فرح بالليل.. 
ودلوقتي تعالوا مع بعض نشوف الخطوات... 1- طريقة توزيع كريم الأساس ومصحح العيوب
أول حاجة هنعملها قبل ما نبدأ في الميك أب إننا ننضف الوش كويس
بماء الورد أو التونيك علشان لو فيه أي تراب أو أي شوائب من الجو نقدر
نشيلها، ومهم جداً إننا نعمل الخطوة دي قبل ما نحط الميك أب، ولازم كمان
نهتم بمنطقة الرقبة برضه وننظفها، وبعد ما نخلص نبدأ نجفف الوش كويس..
وبعد كده نحط كريم ترطيب قبل الميك أب علشان يرطب ويدّي إشراق ونور للوجه.
بعد
كده نبدأ في أول خطوة، وهي إننا نحط الكونسيلر "مصحح العيوب" تحت العين،
وممكن نوزّعه بالفرشة أو بصوابعنا على حسب الطريقة اللي تريحنا.. وطبعاً
لو عندنا هالات سوداء مش هنختار درجة فاتحة أوي؛ لأن اللون ممكن يقلب
معانا بلون أزرق.
وبعد ما وزعنا الكونسيلر على العين كلها نبدأ
نوزع كريم الأساس بالإسفنجة الخاصة به، وطبعاً بنختار كريم الأساس بالدرجة
اللي تناسب لون بشرتنا؛ يعني مثلاً الموديل اللي معانا لون بشرتها برونزي
فمش هينفع نستخدم معاها درجة أساس فاتحة.
ولو عندنا مناطق غويطة
شوية في الوش زي المنطقة اللي تحت الدقن أو تحت العين أو حول الأنف، فإحنا
ممكن نعالجها بإننا نحط عليها درجة فاتحة من كريم الأساس أو الكونسيلر.
وما ننساش طبعاً إننا نوزع كريم الأساس على الرقبة علشان ما يكونش فيه فرق في اللون بين الوجه والرقبة.
ولما
نيجي نوزع كريم الأساس في منطقة تحت العين بالذات فإحنا بنوزعه بطريقة
الضغط الخفيف، زي ما نكون بنعمل مساج؛ لأن منطقة تحت العين منطقة حساسة؛
فمش هينفع إننا نضغط عليها جامد.
إضغط لمشاهدة الفيديو:
2- طريقة الظل والنور لإخفاء عيوب الوجه
بعد
ما وزعنا كريم الأساس هندخل في مرحلة تانية؛ وهي مرحلة إصلاح العيوب؛
فمثلا منطقة الأنف هنستعمل لها لون غامق، وأي بنت ما فيش عندها اللون
الغامق اللي أنا باستعمله ممكن إنها تستعمل آي شادو بني غامق شوية، أو على
بيج غامق، وبنحدد به منطقة الأنف في الآخر بعد توزيع كريم الأساس؛ لأن
الطريقة دي بترَفع الأنف وبتديها شكل مسحوب شوية ومش عريض.. وبكده نكون
كإننا عملنا عملية تجميل مؤقتة للأنف.
إضغط لمشاهدة الفيديو:
3- رسم العيون
وبعد ما
خلّصنا مرحلة إصلاح العيوب هندخل في مرحلة جديدة، وهي مرحلة توزيع اللوس
باودر "البودرة السايبة" على الوش كله، وبنوزعها بطريقة الضغط كأننا بنعمل
مساج للوش.. وبعد كده بنشيل البودرة الزيادة من على الوش، وبكده هيبقى
الوش جاهز إنه يستقبل أي رسمة عين تحبي تعمليها.
نبدأ بعد كده في
رسم العين؛ ولكن قبل ما نبدأ لازم نحط شوية لوس باودر "البودرة السايبة"
تحت العين علشان لو أي ألوان وقعت تحت العين ما تبهدلش المنطقة دي وتغمقها
ونقدر نشيلها بكل سهولة..
وبعد كده نفرد على العين آي شادو كريمي
زي ما هنشوف في الفيديو إننا اخترنا اللون الأوكسيديه أو الذهبي وبنرسمه
من زاوية العين الداخلية.. بعد كده نحدد العين باللون الأسود من داخل
العين وخارجها.
ودلوقتي ييجي وقت رسم العين بالآي لاينر الأسود،
وبعد كده بنحط لون روز غامق شويه علشان ينور العين شويه مع الأوكسيديه
الغامق ويديها شكل حلو ومشرق.
وبعد كده نحط لون ذهبي على الزاوية الداخلية للعين ونمشّيه لفوق وندمجه مع اللون الروز اللي حطيناه..
وفي
النهاية هنتقل الحاجب باللون البني وبأنصح كل البنات إنها ما تستخدمش
أقلام الحواجب؛ لأنها بتتسبب في تساقط شعر الحواجب بعد فترة..
وبنحط كمان لون ذهبي فاتح تحت الحاجب علشان ينور عظمة الحاجب.
إضغط لمشاهدة الفيديو:
4- تركيب الرموش وتوزيع البلاشر
بعد
ما انتهينا من رسم العين بنشيل اللوس باودر "البودرة السائبة" الزيادة من
تحت العين، ونبدأ في وضع الماسكرا، وبنحطها من تحت لفوق علشان شكل العين
يبان والرموش تتشد معانا..
ممكن إننا نزود كام رمش من الرموش اللي بتتباع منفصلة ونلزقهم على أطراف العين أو نحط رموش كاملة على حسب اللي يناسبك..
واللي ما بتعرفش إنها تركب رموش؛ فالأفضل إنها تكتفي بالماسكرا؛ لأن تركيب الرموش بيكون له طريقة خاصة مش أي حد بيقدر يعملها.
وبعد ما ركبنا الرموش، ممكن إننا نحط لون غامق على قوس العين علشان تدي شكل عميق للعين.
وبعد كده نجيب أحمر خدود غامق شويه يكون لونه على برونزي ونحطه على عظمة الخد وطبعاً مش لازم ننسى الرقبة.
وآخر
خطوة هنعملها في رسم العيون إننا نحط لون فاتح في المنطقة اللي تحت العين
علشان ينورها شوية سواء كان آي شادو مط فاتح أو أي باودر موجود عندك في
البيت.
إضغط لمشاهدة الفيديو:
5- أحمر الشفايف والشكل النهائي للميك أب
ودلوقتي
وصلنا لآخر مرحلة خالص وهي الروج ومش لازم نحدد الشفايف، يعني ممكن نحط
الروج على طول سواء بفرشة صغيرة أو بالقلم وممكن نستخدم باليتة الألوان
الخاصة بالروج..
وعلشان نفتح الميك أب اللي إحنا عملناه ممكن نختار
لون روج بينك؛ لأنه هيناسب الميك أب اللي إحنا عملناه أكتر من البيج لإن
البيج هيخلي اللون مقفول أوي.
وبعد ما نخلص من الروج هنحط ليب جلوس
"ملمع شفايف" خفيف خالص ومش لازم نحطه على الشفايف كلها ممكن نحط على
المنطقة اللي في النصف بس علشان تدي إضاءة للشفايف.
وعلشان نعطي للميك
أب اللي عملناه شكل سواريه ممكن نحط جليتر على العيون ونحط كمان عند
الزاوية الداخلية للعين من تحت لون أصفر على ذهبي شويه علشان ينور المنطقة
اللي تحت العين.
إضغط لمشاهدة الفيديو:
وبكده يكون خلصت حلقتنا النهارده.. ويا ريت الميك أب يكون عجبكم.. وتكونوا اتعلمتم طريقة جديدة للميك أب.. وحاولوا تجرّبوها لو عندكم مناسبة أو فرح.. لكن طبعاً بالألوان اللي تليق عليكم.. وفي انتظار مشاركاتكم وأسئلتكم.. 
