مابننسى ..ليله

ما بنسي ليلة كنا تايهين في سمر
بين الزهور أنا وأنت والنيل والقمر

.............** ..........
وين يا جميل يوم كنا تايهين في سمر
من انسنا اتمتعنا بي جني الثمر
كم قلبي بالأنفاس لانفاسك غمر
الجو سكر من ريك اتعطر خمر

............** ...........
ما بنسي ليلة كنا في شاطيء النهر
نتعاطي خمر الحب بكاسات الزهر
والبدر مزق ظلمته و سفر ازدهر
في النيل سطع بي نوره واتقطع بهر

............** ..........
الليل هدا والجو صفا وغاب الاثر
النسيم بجيب من توتي اصوات المتر
انا يا جميل بي صوت ضميرك المستتر
من شعري كم اسمعتك الحان في وتر

...........** ...........
شفت النجوم تنظرنا بي نظرة شذر
لما القمر في افقه بغيابه اعتذر
صافين عفاف ياحبيبي خالين من قدر
في هوانا لا واشي ولا مراقب حذر

...........**...........
انا بي غرامك ياحبيب دمعي انفجر
وانا بي غناك ايقظت سكان الشجر
قبال اراك انا كنت في حيرة و ضجر
اليوم حظيت بلقاك يا ظبي الحجر


للشاعر محمد بشير عتيق

اداء مميز للرائع جمال فرفور فى حضور
شرحبيل احمد وصلاح بن الباديه