يا جنا يا جنا يا جنا يااااا جنا
****************
في بعادنا عن أرض الحنان
الليله مرت كم سنه
يا ريت نعود للدار سراع
نرتاح تحت شتل الهناء
واشوقنا لنخل الفريق الضامي
في صدرو الجنا
للحلوه أم وجها قمر
ضواي مورد بالهناء
********************
الليله زارتنا الرؤي
المنسوجه من عمق الجذور
رسمت صور ضوت جمال
وجوه الخيال عاشت دهور
أفراح فريق يوم الحصاد
وجريف يضم طينو البذور
وزغروده وصلت للسحاب
وعريس معطر بالعطور
وجهاد فتح درب الصباح
وشهيد ملفح بالزهور
وشباب بعز الأرض شايل
مبادئ نضال و نور
*********************
في مره طاف بيناالخيال
بعد الغياب الطال جرح
شفنا البخور في الريح عبق
و الليل شرب عطر الطلح
والغيم ربط فوق للفريق
شافو الشتل شابا و فرح
و حدا الصريف قام الخدار
حاضن صفيقات القمح
و القمره نامت في الرمال
و الطين شرب نديان صبح
و الوادي فرهد بالخريف
اخضر بقشو السمح
*************************
الفين سلام
يا يمه يا شتل المحنة
الشب في وسط الجروف
يا يابا يا الدرع المتين
الليهو كم سجدت سيوف
يا جده يا أم صوتا حنين
حجواتا بالوادي بتطوف
ياالسمحه يا شمس الفريق
الليها كم غنت حروف
في الغربة يا أهلي الحنان
كم عشنا في قسوة ظروف
و أشواقنا لي أرض الوطن
و لخضرة الوادي العطوف
خلتنا كم ساقنا الخيال
طار بينا لدارو الولوف
والفرحة غنت و صفقت
و الشوق حضن شتل الجروف
كلمه ياجنا الشاعرينادى لابناء الوطن
جنا باللهجه السودانيه توازى يا ضنا
كلمات صديق مدثر
