رفعت الجلسه

القضيه من الاول للاخر خسرانه
ميت ورايح بالخشبه علي الجبانه
طابور طويل م الشكاوي والناس تعبانه
واللي سايق المركبه مش حاسس انها غرقانه
***************************
يا اهل الله يا هو حرامي امسكوه
اللعب يا حاوي الواد طالع لابوه
والضرب تحت الحزام شغال اللحقوه
وخبر رايح وخبر جاي بنسمعوه
**********************
خنازير ومعيز وناس سايقه الحنطور
وافلام تغيظ وشباب تايه مكسور
وبقينا ملطشه وقع علينا سور
قصقصوا رشنا وفي القفص عصفور
****************************
واخبط دماغك في الحيط كان غيرك اشطر
هتغير ايه ولاايه دور علي فكه وافطر
خليك في حالك يا ابن الحلال بدل ما تخسر
يومين وعايشينهم علي خير يعدوا فكر
******************************
احمدعبيد

رائعه والله يا احمد
والتلميح واضح للجميع
برافوا عليك

ايه يا اعم احمد الحاجات الجامده دى
استاذ ورئيس قسم يا فنان
بس كده انت هيتم اعتقالك رسمى اليومين دول
خلى بالك من نفسك يا معلم

اللعب يا حاوي الواد طالع لابوه

احمد يا احمد
هو مين الولد اللى طلع لابوه ده
اوعى يكون اللى فى بالى
يبقى الله يتولاك برحمته

انا هأحضرلك يا احمد العيش والحلاوه

الله عليك يا ابو حميد
كلماتك فى غايه الروعه
تسلم ايدك

اللة عليك يابو حميد طبعا كالمعتاد ممتعنا بكلامك الجميل واحساساك العالى بس ولا تجيلى ولا اجيلك ولا اعرفك ولا تعرفنى من بعيد لبعيد كانت ايامك حلوة يابو حميد :P

مين احمد عبيد ده
انا اول مره اسمع الاسم ده
لا يا عم انا مليش فى السياسه
بعد ازنك انا خارجه من الموضوع

صديقى العزيز احمد عبيد
كلماتك فى غايه الروعه واحسيسك جميله
كنت شاعرا وفنانا عظيما
الله يرحم ايامك الجميله

واللي سايق المركبه مش حاسس انها غرقانه

استاذ والله يا احمد
ملكش دعوه بحد
استمر فى الكلام الجامد والجميل ده
احسن حاجه ان الواحد يحس بهموم وطنه



بس هى نمره مباحث امن الدوله كام !!!!!!

حتي انت ياشوقي كل اصدقائك باعوك ياقيصر
ايناس اسلام تيتو وكل المنتدي خيانه هجوم

ولا يهمك يا باشا
الله ينور عليك



بس ممكن تدينى العنوان علشان ابعتلك بطانيه
علشان اسمع ان السجن ساقعه

اقرب قوادك خانوك يا ريتشارد حتي انت يا صديقي علي

انا اسفه
الظاهر دخلت المكان هنا غلط

انا ماعرفش بصراحه حد اسمه احمد عبيد

الاسم ده اول مره اسمعه

تعيش الحكومه
تعيش
تعيش
تعيش

حتي انتي يا بنت المنصوره الا اجد هنا من مناصريين

كفاره يا سيد الرجاله
كفاره .. كفاره

وهتخرج لينا بكفاله
كفاره .. كفاره

سهر بتبعيني يا سهر في اول محطه ربنا يسامحك

خنوك اصحابك يا قلبي(خونه)
وسابوك وحيد بتغلي(في سونه)
ولا واحد جنبك(نداله)
ولا حد جبلك(عيش وحلاوه)
الله يسامحهم(هقول ايه)
الناس دول(معايا يا بيه)

اتفضل ياسيدى ولا يهمك

ما تزعلش يا احمد من الخونه دول

ده اقل حاجه الوحد يقدمهالك فى محنتك





وبالمكسرات يا حماده
علشان تعرف انت غالى علينا

دموع وماتبكيش عليا حتي دمعه
الله يعوض عليا

صديقتي الواحيده هي مها حسني هي اللي فهماني(والباقي خونه)
ايها الجنود هجوم علي المنتدي ماعادا مها

دموعك مش هتفيد بعد ايه اقتلوها اليكم بيها ايها الجنود

صوره احمد عبيد بعد قصيدته الشهيره