كابوس صابر أيوب
ست الشاي ءاف. بي. آي
شعر : هاشم صديق
الرادي يساسق
بين بريطانيا
وبين أمريكا
..........
و(صابر) سارح
لنفسو يصارح
- يا صابر هوي
رمضان جاييكا
حتجيب من وين
قروش السكر
وحق الويكة ؟!
..........
(الرادي) يناهد
وسط الحوش
بين (بن لادن)
و(عمر المُلا)
و(مستر بوش)
- تصريح
من لندن
- أخبار
من (غزة)
وجيران صابر
عاملين (قعدة )
انقلبت (ندوة)
في الكأس العاشر
بالعرقي( الداشر)
والليل مصبوغ
بي ريحة (المزة)
...........
الرادي يكورك
وسط الحوش
- افغانستان
موت أفغان
- مستر بوش
وخواجة بيصرخ
وصوته مَرَخْرَخ
زي (حنكوش)
- القصف يدك
أركان (كابول)
..........
ووالدة (صابر)
حاجة (بتول)
مشدوهة تَقطّع
عيش الفتة
تكب سرحانة
في موية الفول.
- يوماتي عشاهم
(فتة بوش)
والرادي يساسق
بين (بن لادن)
ومستر (بوش) .
.........
وصابر يطنطن
- الصاح مقلوع
السيف مرفوع
الكلمة غموض
والمعنى فروع
الدنيا خراب
والأقوى مهاب
والعدل رهاب
...........
الليل مشروق
بي فتة فول
وصوت (الحاجة)
الوالدة (بتول)
يناغم صابر
-شنو الإرهاب؟
ويتمتم صابر
- قلـ...قلتي
شنو؟
وترد (الحاجة)
- مالك مرعوب؟
تتلفت ليش؟!
تقول مزرور
بي عسكر وديش؟!
سألتك بس
شنو الإرهاب؟!
..........
واتنحنح (صابر)
صنقع ودنقر
حك رويسو
اتمدد وصنقر
وقال للحاجة
- سؤالك يمه
جوابو كتاب
لكن....
لكن يا (حاجة)
زي ما تقولي
طلع ربّاط
في الليل
لي زول
بي سيف مسلول
وشال من جيبو
قروش العيش
وحق الفول .
أو زول آمن
يقع في مكيدة
يموت مكتول .
وزي تغيان
على الفقران
على المسكين
على الأعزل
على المشلول .
........
وتتدفق
غبينة (الحاجة)
زي راجمة
وتصبح ناغمة
- وحسع نان
منو الرباط؟
امريكا؟
(بن لادن) ؟
ولا الأفغان؟
من التغيان
منو المسكين؟
من المظلوم
(مستر بوش)
ولا فلسطين؟
شنو الـ......
منو الـ....
.........
ضحك (صابر)
وحكّ رويسو
واتنحنح
وقال للحاجة
- يمة اتعشي
أكلي البوش
لو عارف ردود
لي ديل
ما كان الرويس
مدووش .
........
سكت صابر
رقد معبور
وصوت الرادي
لافّي الدنيا
لسة بيدور .
سرح صابر
ودمو يفور
نكش حزنو
وقال لي نفسو
من قلبو
أريت الدنيا
حسه تغور.
.........
سمع صوت أمو
تاني يلح
- دحين يا وليد
بدور أسأل؟
ويرد صابر
وضيق العبرة
طعمو ملح
- نعم يمه
قايلك نمتى!
وترد الحاجة
- أنوم كيفن
وصوت الرادي
في أضني
زي مكنة؟!
بدور أسأل
- دحين أمريكا
ما ياها
العذابا دنا ؟؟!
.........
ويرد صابر
وضحكو عِلا
- عذاب أمريكا
ولا هنا ؟؟!
عذاب أمريكا
ولا أنا؟
ويصن لحظات
- دحين يمه
- ورمضان جاي
هم أمريكا
ولا اللقمة والويكة ؟!
...........
ترد الحاجة
تفتش لكيس
تُمباكا
في ( الكَراّب)
- نقول همين
عذاب وعذاب
تخت السفة
وتبرطم
- دحين يا وليد
ده مو الإرهاب؟!!
..........
ويصن الليل
ورأس صابر
يدقدق ساي
يَشَرّق جاي
يغّرب جاي
- كراتشي
- أباتشي
- أنقرة
- عنقرة
- ربع الويكة
- صوت أمريكا
- جمرة خبيثة
- مكيدة دسيسة
- بي. بي . سي
- ءاي. ءان. تي
- سي. ءان. ءان
- توني بلير
- كلام الطير
- خبر وحواشي
- إبراهومة
- أموكاشيييييي .
..........
ويقع صابر
في بير النوم
ويشوف روحو
بدل (أمجاد)
ركب بعشوم .
وشاف الناس
توسوس ساي
- خبر يا هناي
ست الشاي
أف. بي. آي
وأحمد بيه
سي . آي. ءايه
- ووسط الموز
لقينا (كروز)
- برج كلتوم
ملان بحمام
وقع صاروخ
شَقّ حشاهو
سكن جواهو
سّوا حطام.
.........
ويغوص صابر
غرق أكتر
في بير النوم
ويشوف الحاجه
أمو (بتول)
وسط الزحمة
رافعة ءايدينها
بي قندول
تكورك وتهتف
- لا أمريكا
- بل ( فتريته)
(أنحنا الساس)
رافعين رأس
ما بنتراجع
ما بنتهان
ما بنخاف
الأمريكان
.........
ويشوف صابر
بيوت الحلة
تتغامز
وتترّيق
على الحاجة
وتتلامز
ووسط اللمة
صوت الحاجة
عالي فصيح
(تشيلو الريح)
..........
صوت الرادي
مابي النوم
الموت أخبار
الظلم حصار
الرعب خيار
والليل حزنان
الليل عريان
والقمرة هدوم.
الليل مفضوح
والنجم كتوم
الدينا تصن
لقيامة تقوم
صابر مجروح
في نومو
يئن
وفي الرادي تجن
بالتار
(بيق بن)
والنشرة تجيب
أخبار الشوم .
.........
كابوس صابر
قفة خضار
سوت جنحين
طارت لي فوق
والفاقة مطار
...........
كابوس صابر
يعمل ءايه
والدنيا مصالح
وسي. آي. أيه
..........
كابوس صابر
الناس بتوسوس
وتنضم ساي
- ست الشاي
ءاف بي آي
.........
كابوس صابر
الدنيا مغازي
يموت الحب
ترمي أخوك
في بطن الجُب
وتترتر غادي
تناصر الغازي
..........
كابوس صابر
الكلمة ضحية
إرهاب مشروع
وإرهاب وحشية
ضحايا غبش
وضحايا غنية
...........
كابوس صابر
الناس (بالقرجة)
تقيف للفُرجة
تغير لونها
ميتين درجة
..........
كابوس صابر
هم الويكة
والفتريتة
ونار أحزانو
ونار أمريكا
..........
كابوس صابر
الصاح مقلوع
السيف مرفوع
الكلمة غموض
والمعنى فروع.
الدنيا خراب
والأقوى مهاب
والعدل رهاب .
...........
الرادي يلعلع
وسط الحوش
بين (بن لادن)
و(عمر المُلا)
ومستر بوش
- أفغانستان
- موت أفغان
- القايمة تطول
- عراق.. سوريا
- جنوب لبنان
- وما معروف
- تاني كمان!
تجي الحملة
عقاب جملة
(على الإرهاب)
على الإنسان؟!
..........
القصف يدك
أركان كابول
ووالدة (صابر)
حاجة (بتول)
حلمانة تقطع
عيش الفتة
تكب سرحانة
في موية الفول
يوماتي عشاهم
فتة (بوش)
والرادي يساسق
بين (بن لادن)
ومستر (بوش)
........
صوت الرادي
مابي النوم
والليل حيران
الليل حزنان
الليل عريان
والقمرة هدوم
الليل مفضوح
والنجم كتوم
........
كابوس صابر
قفة خضار
سوت جنحين
طارت لي فوق
والدنيا مطار
..........
كابوس صابر
صوت مبلوع
حق مقلوع
والموت بالجوع.
كابوس صابر
يعمل آيه
والدنيا مصالح
وسي. آي. أيه
..........
كابوس صابر
الناس بتوسوس
وتنضم ساي
ست الشاي
أف. بي. آي .
