ان شاءالله القيامه تقوم

منازله بين اثنين من اكبر شعراء السودان
غايه الروعه وفن الشعر الهجائى.
ارجو ان تنال اعجابكم

واحده من اشهر المساجلات بين اثنين من اشهر شعراء بلادى
ولقد وجدت حظها فى النشر فى عدد كبير من الصحف والمواقع السودانيه
لطرافتها و حلاوته وددت ان تطالعوها جميعاّ
قولوا بسم الله:

قصة القيامة
يقول الشاعرالراحل المقيم حسن الزبير كنت يوم في المكتب فجأة جاني زميل من زملانا وقال لي أنا عايز أوسطك تخطبلي زميلتنا دي قلت ليه انتو متفاهمين؟؟ قال لي متفاهمين قلت ليه خلاص ان شاء الله في اليوم التاني قالت لي انا برد ليك بكرة ولمن جات في الصباح قالت لي أنا ما بقدر أتزوج زميلنا ده وذكرت لي بعض الاسباب قلت ليها انا حا أقول ليه مخطوبة واتفقنا على كده بعد داك جاني هو في المكتب جا وقف قدام التربيزة قال لي اها قلت ليه اقعد قال لي ما قاعد نجيب ليك شاي؟ قال لي ما دايرشاي قلت ليه طبعا زميلتنا دي امبارح اخدو الفرصة ومشو كلمو ود عمهاالكان خاطبا ورفض وقال ما بخلي بت عمو دي
مهما كانت الظروف وبنات حواء كتار وربنا يديك الابرك منها قال لي يعني ما حا تتزوجني؟؟؟
قلت ليه طبعاً لانها مخطوبة وانت جيت متأخر يعني ما حا تعرسني؟؟
قلت ليه طبعاً ما حا تعرسك
ضرب التربيزة وشتت لي الورق وقال لي
ان شاء الله القيامة تقوم
عشان الناس كلهم يتلخبطو في بعض
المهم قالا بطريقة فيها نوع من الالم والحسرة
أنا داعبتهم الاثنين بالقصيدة
ان شاءالله القيامة تقوم
عشان ريدك معاي ما بدوم
ناس سهرانة طوالي
وناس طول الليالي تنوم
أشوف انا كيف حسابك يطول
على الوعدالدوام ممطول
وانا الشايف كتير أحباب
بعيشو الريدة عرض وطول
أنا الشايل دوام همك
وأريدك ريدة زي أمك
وأغير من غيرتي زاتا عليك
أخاف أنا يا الخفيف دمك
ان شاءالله القيامة تقوم
وكل زول يمشي في حالو
عشان ما قلبي يرجع يقول
حبيب الدنيا في بالو


كان ممكن الحكاية تنتهي عند هذا الحد
لكن أخونا الدكتور أحمد فرح شادول قال لي
أبداً الحكاية دي ما حصلت لزميلك
دي حاصلة ليك انت
وقام عمل قصيدة هاجمني بيها
هجوم الشاعر شادول لحسن الزبير

ان شاء الله الحسادة تطير
وتمتد السعادة تدوم
والضاق العذاب في الريد
بكرة يعيش ويشبع نوم
وتقول القيامة تقوم؟؟
عشان حظك شقي ومشئوم
وفتحن ليك بنات حواء
وجافاك ليلة واحدة النوم
بتقول القيامة تقوم؟؟
أنحنا لا عرفنا الريد
ولا زيّك عشقنا الغيد
وحبينا القريب وبعيد
وراجعنا القديم وجديد
ولا ضمانا حضن الليل
مع الوجه البهي وغريد
ولا لليل شكينا حبيب
اذا حتى العشقنا عنيد
ولا نظمنا في الحلوات غنا وموال
درر وقصيد
ولالينا بن عوف غنا
لا الصابر ولا الباكي
خيالِك عندي يوماتي
صباح خيري ومساء أفراحي
أعد ميعادو باللحظات
وسهري معاه صباحي
عيونِك فوق عيوني تنوم
وفوق آلامي ترتاحي
وريدِك من عواتي الريح
المو وأضم عليو جناحي
وتقول القيامة تقوم؟؟
أنحنا مع السعادة نسير
مواكب فرحة هادرة هدير
نحيا نحب نعيش ونغير
ونعلن ثورة التغيير
ناكل حب
ونشرب حب
ونلبس حب
ونفرح بالمحبة نطير
نعيش الريدةعرض وطول
كبيرنا ملك صغيرنا أمير
وتسمع صوت هتافنا يجيك
ان شاء الله الحسادة تطير
وتكبر وتنسى يا زغبير



رد حسن الزبير


ان شاءالله القيامة تقوم
وعشمي في الله ما شويّة
أدخل جنة المأوى
وهناك يدوني حورية
أتكي في الارائك أنووووووم
بكل حبور وحرية
وأرتاح من ده مافي وقوم
وأمش جيبلي وجيب ليّا
أفارق دنية المعدوم
والقى مطالبي بالنية
ولوحنيت للحم الطير
تجيني الطيرة مشويّة
عشانك كيّة يا دكتور
تكون حوريتي خمرية
تجرجر ديسا ده المردوم
ولهجتا خالصة عربية
أخلي ليك بنات حواء
تحاحي صباح وعصرية
وتبقى عواطلي يا دكتور
هناك لا مرض ولا شكيّة
هناك لا أذن سمعت
ولابعيونا مرئية
هناك حتى الرحيق مختوم
وولدان طائفة دوريّة
لا عشوائي في الخرطوم
ولا صفقات تجارية
صفي النية يا مهجوم
بلاش هجمات هبوبية
وان شاء الله القيامة تقوم
وتنجح مية في المية

رد شادول

ما مقبولة اعذارك
وما معروف مصيرك وين
وماهي صالح اعمالك
عشان يدوك حوراً عين
لو انت على الصراط ماشي
وشركوا ليك ببنية
حا تختل كل حساباتك
وحا تحتل حتلة ابدية
أما لو ضرب حظك
وجابوا ليك بنات الحور
تموت واقف على طولك
ويشيلك حيلك المشلول
وتتلفت يمين وشمال
مشدوه بالجمال مبهور
وتحتار باقي عقلك طار
فيمن يهوي او يختار
ديك قواما سمهر وطول
وديك دعج العيون مكحول
وديك جمالا يسبي عقول
وديك من فيها حلو القول
ودييييييييييييييييك خليها لي شادول
وديك شعراً كمان خلي
قدر ما يزيد نعومة وطول
عذابنا وليلنا فيه يطول
وديك خشيما بنقط كلام معسول
تقيف مشدوه وتفوت القيامة عليك
واقف انت تتلفت طرب وذهول
حسن دنياك للزي ديل
وديل يا صاحبي هم دنياك
يودّنك ويجيبّنك
ويختنّك ويشيلنك
يجلبّنك ويبيعّنك
يغسلّنك ويشرّنك
ويدفنّنك ويكتلنك
يقيدو النار يشدّنك
ويبرن عودك المسلوب يحرقنّك
تفوح انت ويزيد دنّك
وتغني الدنيا بي فنك
ده حال الدنيا
ما بتدوم
مرة تلام ومرة تلوم
ويوم تتعب
مرة تحب وتشبع حب
ومرة تحب وما تنحب
حسن خليهم السمعوك وارجع لحلوكلامك
معقولة القيامة تقوم
قبل ماتلقى احلامك

الا رحم الله الشاعر حسن الزبير وادخله فسيح جناتة مع الصديقين والشهداء
وامد الله فى عمر شاعرنا الدكتور /احمد فرح شادول ومتعه بالصحه والعافيه

رائعة جدا جدا جدا
عمى ربيع

يسلم تقديمك
كالعادة تأتى بما يبهرنا
من شدة جمال الكلمات
قرأتها اكثر من مرة
كل ما اقرأها أعود أقرأها مرة أخرى

بجد نحن محظوظون بك عمى ربيع
دمت لنا دائما مبدعا ومتألقا

تقبل تحيتى ومرورى

شكرا لك يا ايهاب
اعجبتنى ايضا واردت انانقلها لمنتدانا الحبيب

ارجو ان تنال اعجابكم

الموضوع محتاج فنجان نسكافيه

وبعد كده ارد عليك

لحسن انا مش فايقه خالص والحروف دخله على بعض

هههههههههههههه
نسهل الموضوع ان زميل للشاعر طلب وساطته للزواج من
زميله فى المكتب ولما رفضته وذكر الشاعر للزميل بانها
مخطوبه ثار وغضب وتمنى ان القيامه تقوم لكن زميل الشاعر
الثانى ظن ان الحكايه تخص الشاعر الزبير فكانت هذه المبارزة
الشعريه.
كمان واحد نسكافيه للشرح

اعينيني على ولهي
وجئت إليك
يحملني
جناح الشوق يا حلوة
يسابقني
إلى عينيك
شوق الروح والنجوى
أعينيني
على ولهي
فذلك فوق ما أقوى
حنانك
جسر أحلامي
إلى الآفاق والصفوة
على
قمم الهوي نلهو
ونحيا كيفما نهوى
نحلق
في عوالمنا
سكارى .. بالمنى نشوى
فلا
قلب الهوى يسلو
ولا وله الهوى هفوة
ولا عرفت
جفون الحب
طعم النوم والغفوة
إذا ضاقت بي الدنيا
يؤمن حضنك المأوى
وان عبست
لي الأيام
عندك تكمن السلوى
فهل لي
في مودتكم
بصيص النور والحظوة ؟؟



كلمات الشاعر احمد فرح شادول

احد طرفى هذه المبارزه(ان شاءالله القيامه تقوم)

إذا ضاقت بي الدنيا
يؤمن حضنك المأوى
وان عبست
لي الأيام
عندك تكمن السلوى

يا سلام علي الحب الصادق
كليمات تجعل اي امرأه تحلق في السماء

لكن ايه موضوع القيامه هتقوم بالضبط

بريق الامل كتب:

إذا ضاقت بي الدنيا
يؤمن حضنك المأوى
وان عبست
لي الأيام
عندك تكمن السلوى

يا سلام علي الحب الصادق
كليمات تجعل اي امرأه تحلق في السماء

لكن ايه موضوع القيامه هتقوم بالضبط

ههههههههههه
دا واحد يائس تمنى ان القيامه تقوم لمجرد ان زميله له فى
العمل رفضت زواجه...
يعنى مش كفايه هو دا عايز بطربق الدنيا كلها عشان خاطر
عيونه.