لا أنا حزبي
ولا سياسي
ولا معارض
ولا إخواني
ولا حكومي
ولا حماسي
ولا من اصـل
علمـاني
ولا بنافق
ولا برائي
ولا كان
الخداع دائي
ولا وصولي
ولا غائي
ولا طماع
ولا بيـاع
ببيع..
نفسي وأوطاني
ولا بحلم..
أكـون إلاّ
مجرد نسمة
في الضلّه..
تعود..
من وقت للتاني
ولا ح أقدر
أكون حارس
في يوم
لتاريخنا،
أو فارس
وأطير..
للقدس بحصاني
ولا بحلم أكون قائد
وعائد من زمن تاني
أنا شاعر،
وفي الآخر
كلامي حـر
ف لسـاني
أقول الحـق
علــي أبويا
واخويا
وأعز خلاّني
وبدفع التمن غالي
ليالي وسط أحزاني
أنا مملكش
غير عمري
وأمري
في يد سلطاني
أنا مملكش
غير نفسي
لكن مش نفسي
ملكاني
أنا مملكش
غير ألمي
وقلمي
هوَّ عنواني
بينزف ع السطور
دمعي
خسارة دا اللي أنا
في وسعي
يا ريت
تسامحني يا زماني
يا ربي
خلقتني شاعر
وليَّا قلب
ومشاعر
يا ريتني كنت
يوم قادر
أغير خلقي من تاني
خلاص..
ما بقتش متحمل
أشوف..
أوضاع مآلماني
أشوف..
الظلم متحكم
وبالإكراه..
لازم أكتم،
ويحْكُم
فيّا سجّاني،
وأشوف..
المسجد الأقصى
بيصرخ..
فينا ويعاني،
وحاني للي يوم داسوا
باقدامه وإحساسه
بينعي بالبُكا حاله
رجاله بعد إذلاله
خلاص..
داسوا علي حلمه
خلاص ما بقتش
فضيا له
حماس أو فتح
سابوا الجرح
وتحاربوا علي السلطة
وسابوا..
قدسنا في ورطة
ودي الغلطه
اللي قتلاني
وإيه تاني..
حيجري فيك
يا لبناني
في دنيانا
مذابح قانا
شربت دم أطفالك
واندالك
كتير فيها وخوانك
وكله بيرمي ع التاني
وأنا وطني
غيور جدا
بموت..
م الخوف علي بلادي
ونفسي..
اربي أولادي
علي القران
وع السنة
منايا ادخل الجنة
وبدعي ربنا الهادي
نكون خير
البشر أمة
يكون..
لبلادي يوم كلمة
وشمس..
تنور الظلمة
ويرجع..
فخر أمجادي
أنا مسلم
لا إرهابي،
ولا بعادي
بشر وخلاص
ولا بظلم
ولا بآكل
حقوق الناس
لا عمر الظلم
يرضيني
ولا في ديني
مكان للظلم
د انا بطبعي
وتكويني
بحب الخير
وعندي ضمير
بـ يهديني
و حتى السلم
في الإسلام
شعار ديني
مفيش للشر
فيَّا مكان،
وعمري ما أكون
في يوم بادي
لكن ما أقبلش
يوم أتهان
ولا أنداس
دانا حساس
بـ يرخص دمي
لبلادي
ويغلي.. في دمي
ألف حماس
علي الظالم
وع الجاني
وأقول الحق
لو هـ يقطّعوا
لساني
وأقولها..
ورزقي وحسابي
علي اللي خلقني
سوّاني
أنا مسلم
قوي وبحزن
لأوطاني وحقاني
اصـحِّي الحــق
لو مـيِّت،
وأهم قضية
في حياتي
قضية
نصر أوطاني
ولو قالو
دا بيهاتي
ح أقول تاني
ولو حتى..
هـ أكون ميِّت
ح أموت كلي
واسيب فيكم
ضميري
صاحي ولساني
يقول تاني
يقول تاني
................محمد أبو زيد الأسيوطي
