لما الليل الظالم طول
وفجر النور عن عينا اتحول
قلنا نعيد الماضي الاول
ماضي جدودنا الهزموا الباغي
وهدوا قلاع الظلم الطاغي
***
وفي ليله وكنا حشود بتصارع
عهد الظلم الشب حواجز شب موانع
جانا هتاف من عند الشارع
***
قسما قسما لن ننهار
طريق الثوره هدي الاحرار
والشارع ثار
غضب الامه اتمدد نار
والكل يا وطني حشود ثوار
وهزمنا الليل
النور في الاخر.. طل الدار
وهزمنا الليل
والعزه اخضرت بالاحرار
***
وطنيأنحن سيوف امجادك
ونحنه مواكب تفدي ترابك
ولسه الشارع بشهد لينا
في يوم الغضبه حصاد ماضينا
مشينا نعطر حقل الثوره
بالدم نفديبه بلادنا الحره
وكان اكتوبر فجر الغضبه
كسر قيود الماضي الصعبه
لما مشينا مواكب صامده
تهدر وتغلي وتهتف راعده
الرصاص لن يثنينا
الرصاص لن يثنينا
***
وسال الدم في ارض الوادي
فدينا النور بالروح يا بلادي
وكانت صفحه حكاها العالم
فجر اكتوبر طل وسالم
وهزمنا الليل وهزمنا الليل
والنور في الاخر طل الدار
وهزمنا الليل وهزمنا الليل
والعزه اخضرت للاحرار
***
وكان في الجامعه موكب هادر
صمم يجلوا الليل السادر
كان الليل السادر غادر
والشعب الثائر صمم وهادر
***
وكان القرشي شهيدنا الاول
وما تراجعنا
نذرنا الروح مسكنا دربا
للشمس النايره قطعنا بحور
حلفنا نموت او نلقي النور
وكان في الخطوه بنلقي شهيد
بدمه بيرسم فجر العيد
***
يا اكتوبر نحنا العشنا ثواني زماان
في قيود ومظالم وليل وهوان
كان في صدورنا غضب بركان
وكنا بنقسم بالاوطان
نسطر اسمك يا سودان
***
بدمانا السالت راويه الساحه
حلفنا نسير ما نضوق الراحه
شهرنا سيوف عصيانا المدني
وكانت وحدة صف يا وطني
ايد في ايد حلفنا نقاوم
ما بنتراجع وما بنساوم
بينا وبينك تار يا ظالم
***
خطانا تسير في درب النصر
هتاف يدوي يهز القصر
كسرنا حواجز ازلنا موانع
صفا واحد
عامل وطالب وزارع وصانع
يا ساحة القصر يا حقل النار
يا واحه بتحضن روح نصار
روينا ورودك دم ثوار
شتلنا فضاكي هتاف احرار
***
خطينا ترابك احرف نايره
بتحكي سطور ايامنا الثايره
وشلنا الشهدا مشينا ونهتف
وجرح النار في قلوبنا بينزف
سجينا الشهدا وجينا نقاوم
ما بنتراجع وما بنتساوم
بينا وبينك تار يا ظالم
وفجأه ونحن صفوف بتصمم
زغرد فجر الثوره الحالم
وهزمنا الليل هزمنا الليل
والنور في الاخر طل الدار
وهزمنا الليل وهزمنا الليل
والعزه اخضرت للاحرار
***
قسما قسما يا اكتوبر
نحمي شعارك نحمي ثمارك
ونرفع راية الثوره الغاليه
عاليه ترفرف فوق الساقيه
عليها شعار الثوره الاكبر
ورسموا النادر زاهي واخضر
ولسه بنقسم يا اكتوبر
لما يطل في فجرنا ظالم
نحمي شعار الثوره نقاوم
ولسه بنقسم يا اكتوبر
ونبقي صفوف صفوف
تــــمتـــد وتهـــــــدر
لما يعود الفجر الحالم...يا اكتوبر
للشاعر هاشم صديق
