للشاعر: الصادق الياس
عندي شوق لي نيلنا
والاهل والطيبة
الجريف واللوبيا
وباقي ذكرى حبيبة
وقشة الصفصاف
القايمة عاملة زريبة
ضل مغطي القيف
فوقو روعة عجيبة
***
ياسواقي بلدنا
وينو صوتك مالو
وينو قارع مويتك
غنى باسم حالو
وين غسيل النيل
وشرهدوم فى رمالو
***
وينو ماضي الحلة
وين ومين الشالو
كان زمان نتدلى
لما كنا صغار
****
من فريع لفريع
نقطع الاثمار
كان بحرنا نعوموا
ناس كبار وصغار
فينا طيبة القرية
ومافى كان السار
***
وينو صوت الساقية
الكان يشق الليل
وين نخيلنا الرامي
الظلال فى النيل
***
وين ووين دفيقا
الكنا منو نشيل
وين جداول الموية
الجارية زي السيل
****
يابحر حلتنا
فى رمالك ذكرى
لا بتشيلا الموجة
ولا بتفارق الفكرة
الجريف واللوبيا
الصادق الياس
هذه القصيده عندما قرءتها تذكرت العشر سنوات الاولى قبل التهجير الثانى 1963 لبناء السد العالى
تذكرت تلك الحياه البسيطه كماصورها الشاعر
