بين خاطرين
هسة محير بين خاطرين
بين خاطرين أنا متحير !!!!
ما بين خاطر إنى أخاطر يبقى خيارى مخير فيه؟
بين خاطر إنى أسامح أعود من تانى وأرجع ليه؟
وحتى الحيره الكانت باديه.. ساقا الشوق للشوك وداها
لبست منيه زول بتمنى إنو أمانى العمر يلقاها
إلاّ لقاها داير وقفة
وقفة طويلة بين خاطرين ؟؟
خاطر زى الغيمة الراحلة لما تسوق المطرة معاها
وخاطر زى الأرض البور لما يفوتا المطر ينساها
وخاطر زى أحلام زولاً لما أمانى العمر يلقاها تسافر روحو لدنيا بعيدة تسوق أحلام المنية معاها
************
وأنا متحير بين خاطرين !!!!
خاطر زى إحساس طفلة يوم العيد جابولا هدية
وقالوا معاك أخوك يتقاسم يشارك روحك في العيدية
وقفت حائرة بين خاطرين؟
خاطر إنو تشيلا براها تشيلا لى روحا وماتديا؟ وخاطر إنو أخوها الأصغر يمسخ عندو العيد بهدية؟
************
وأنا متحير بين خاطرين !!!!
خاطر زى أحلام زولاً غادر بلدو يجيب الشبكة
ولما يعود لى مناهو الأعظم يلقى عروسو حداها الشبكة؟
يبقى محير بين خاطرين ؟؟
خاطر داير يستلقى ينوم ينساها وداير أمنيتو تقوم تتحقق
وقبل تفوتو يقوم يلقاها
************
وأنا متحير بين خاطرين !!!
خاطر الثابر كافح وذاكر وداير يحصد بى مجهودو
وخاطر زى خاطر المهمل وناسى جهودو قام راح سارق جهد الأول
وفجأة تجيهو صحوة خاطر !!
يبقى محير بين خاطرين ؟؟
خاطر العزة بإثمو تشيلو
وخاطر إنو كيف يتمتع بى مجهوداً جد ماهيلو !؟
************
وأنا متحير بين خاطرين !!!!
خاطر زى خاطر الزارع ينضف أرضو يبارى زراعتو سرابة سرابة
وفجأة المطرة تكب صبابة..... تغرق زرعو الليهو إتشابا
يبقى محير بين خاطرين ؟؟
خاطر الساخط وناسى إلاهو وخاطر المومن والله معاهو
داير يرتد يعاقب نفسو وداير يتصبر والله يرجاهو
************
وأنا متحير بين خاطرين !!!!
خاطر زى خاطر الأم الشقيت وتعبت ودايرة وليدة يبقالا الزاد
إلاّ الولد الجاحد بعد إتغرب سافر ما عاد !!
صبحت حايرة بين خاطرين ؟؟
خاطر إنو الأمل يملاها تقضى مساها حنين وسهاد !
وخاطر إنو الذكرى تفوتا وتبقى الحسرة ثواب وحصاد !
************
وأنا متحير بين خاطرين !!!!
وخاطر زى خاطر راحل فى صحراء صباحها هجير مساها سموم
شايل الزاد مخلاية حسره حطام الذكرى وقربه ملانه هموم
وفى طريقو تشلع بسمة تمد إيدينا سحاب وغيوم
وقف إتحير بين خاطرين ؟؟
خاطر يمشى تجاها يطرب لى حجاها يسرقو النوم
وخاطر يبعد بى شغلو يناضم ضلو يبارى الطير ويرجى اليوم
************
وأنا متحير بين خاطرين !!!!
خاطرزولا كل مناهو انو حبيبتو تقاسمو هناهو
تنور عمرو تبدد ليلو وظلم دجاهو
إلاّ شقيقو الكان متغرب دار البت الدارا أخوهو !!
سترة حالو ونفح شذاهو
وقف اتحير بين خاطرين ؟؟
خاطر انو يقول للناس عن ريدو وعمق مداهو !
وخاطر انو يضحى .. حبايبو يتهنو .. يصابح الوحدة !
ويماسى عناهو !!
************
وأنا متحير بين خاطرين !!!!
خاطر زى خاطر عامل بعد التعب الجوع هداهو ولحظة
سمَّ وختَّ اللقمة حداهو
جات حدية الشوم من فوق منشرة !
تختف اللقمة معاها مناهو
وقف إتحير بين خاطرين ؟؟
خاطر إنو يصيح
عساها تخاف الطيرة تسيب اللقمة وراها
وخاطر إنو يتيقن بى قسمة غيرو
مهما سوّا محال فى يوم يلقاها
***********
وأنا متحير بين خاطرين !!!!
خاطر طالب يلاقى الزولة العاش راجيها فرحة عمرو وصمت ضجيجو
تبقى الراحة وضل الواحة وزينة تاجو يوم تتويجو
إلاّ الفقر الكان قاساهو ظل يلازمو بعد تخريجو
وقف إتحير بين خاطرين ؟؟
خاطر إنو يشقى حبيبتو تضوق المرة وطول تهريجو
وخاطر إنو عشانا يسيبا تسعد دونو ويزيد تأجيجو ؟!
***********
وأنا متحير بين خاطرين !!!!
خاطر زولة بتسكب روحا
تفرح ذاتو وتفرج همو
تبقى الحس الساكن قلبو
تبقى حياتو ومسلك دمو
إلاّ الاهل الكان إجتمعوا قاموا ادوهو بنية عمو !!
وقفت حايرة بين خاطرين ؟؟
خاطر تبعد وتهرب منو ... تبقى الفرقة وما يتلمو
وخاطر تبقى قريبة كفاها حبيبها
تداوى جراحو وتبعد غمو
عمر محى الدين
ولسة محير بين خاطرين !!!!!!!
