تررررررررررن تررررررررررررررن
- ألو ..
- ألو .. ازيك ..
- تمام الحمد لله .. مين معايا ..
- مين ؟ بتسأل مين .. اخص عليك .. هانت عليك العشرة ..
- معلش يمكن ناسى الصوت شوية .. بس فكرينى بيكى .. يعنى لو تسمحى ..
- انت حتستعبط .. مش فاكرينى ياسى محسن .. انا إخلاص اللى سيبتها ورميتها
- ايوة بس ....
- بس ايه حتقول ايه .. مبتردش على موبايلك ليه .. مبتردش ليه على تليفون البيت واللا لازم اكلمك من رقم غريب عشان ترد ..
- يابنتى اصبرى علية .. انا مش ...
- اوعى تكدب .. عرفاك من يومك كداب ..
- ياستى الله يسامحك .. بس ممكن تسمعينى ..
- اسمعك ايه .. سمعت الرعد .. إلهى زى ما جرتنى وراك وعصبتنى وسيبتنى وردة دبلانة اشوف فيك يوم يابعيد .. حسبى الله ونعم الوكيل فيك .. حسبى الله ونعم الوكيل فيك ..
- يانهارك اسود .. انتى بتدعى علية .. مش تسمعينى الاول ..
- اسمع ايه ياكداب ياخاين .. حتقولى ايه تانى .. حتقولى اللى كانت ماشية معاك بنت خالتك برده .. انت ليك كام بنت خالة .. 15 .. حتفضل طول عمرك كداب وملكش قيمة ..
- يادى النيلة .. ممكن تسكتى شوية من وصلة كلامك
اللى ...... بينقط سكر ..
- انت بتتريأ .. طبعا ما انت خلاص مبقتش عايزنى مبقتش طايقنى .. بكرة تندم يامحسن .. بكرة تندم ..
- ياستى اهمدى بقى فى ليلتك دى واسمعينى .. انتى ايه بالعة راديو ..
- كمان بقى لسانك طويل ..
- على اساس ان عندك لسان بينقط شعر لاحمد شوقى ..
- يامحسن ارجوك متسيبنيش انا فعلا بحبك انا عارفة انى غيرتى وحشة بس اعمل ايه ده عشان حبى ليك ..
- ياستى وحياة محسن اسكتى شوية ..
- بتحلفنى بيك يامعفن .. ربنا احسن منك ..
- الصبر يارب الصبر يارب .. يابنتى ممكن تسمعينى حقولك 5 كلمات بس .. ممكن؟
- اتفضل قول ..
- أخيراااااا .. ياستى انا بحاول اقولك من الصبح من اول المكالمة ...
انا مش محسن الرقم غلط
