مجموعة مختارة من شعر الأبنودى

سوق العصر

عبد الرحمن الأبنودي

الوحي ده .. ما جانيش من موسكو

ما جانيش من أمريكا

ما جانيش غير من هنا من القلب .

فانا باعتقد إني باحب الوطن

واموت فداء للشعب .

أنا صوتي مني وأنا ابن ناس فقرا

شائت ظروفي إني أكتب واقرا

فباشوف وباغني

والفقرا باعتينني

يا .. ناس .. ياهوه

قبلن ما قول قوله

إتأكدوا انه صوتي ده وصدر مني .

أنا مش عميل حد

أنا شاعر

جاي من ضمير الشعب.

خلي الكلام ياخد براحه يا خال

ما تقولش حريه وانا صوتي مش صوتي

وابقى جاوبني لما يفلت سؤال

بدال ما تكرهني وتناور على موتي .

خلي الكلام ياخد نفس مرتاح

ويمد دراعاته

والصوت يلعلع تحت هذا الممبر

إياني واد مصر وابن اكتوبر الأكبر

اللي واجهت المدفع القاتل

ودمي فوق بحر الرمال شنتر

ومت وانا اقول يا مصر

وعشقت موتي .

خلي الكلام ياخد براحه امال

ما تقولش حريه وانا صوتي مش صوتي

أنا ما احبش أمريكا

ولا أحب الغرب

وان كان ده في بلدنا تهمة

قبلت انا الإتهام.

أنا اللي شايف أمريكا

طايحة ف شعوب العصر

من حقي اقول : يا مصر

وتقوللي دولة صديقة ؟!

إيه اللي صدقها ..؟

أمال ده مين ده اللي قتلني في السويس وف بورسعيد

أيام ما كانت بورسعيد

بورسعيد ..؟

مين ده اللي كان يقتلني يومي على الكنال .. ؟

والوقت ..

وسٌع يا جدع للرأس مال

يا فقرا بكره تلاقوا شغل :

زبال

وشيال

إفرحوا يا عيال

وزغردوا يا حريم للرأس مال

واغرق يابو اللقمة الحلال

وشد وياك العيال

وموتي ياللي بتحلمي بلقمة وشال

ما هو يا انتو

يا أمريكا.

كل الشعوب اللي خرجوا بالوطن

م النار

وأصبحوا أحرار

قالوا احنا أولى والوطن أولى

وخاطبوا أمريكا شعب

يوم حاربوا الدولة

أنا عدوي ف إسرائيل

وإسرائيل في أمريكا

وأمريكا في إسرائيل

ودي مش عاوزه دليل.

جايين يخلوا الدنيا ليل

جايين يهدوا الحيل

ويخطفوا اللقمة من العياييل.

من إمتى شفنا الرأسمال يتفسح .. ؟

من إمتى شفنا الرأسمال إنساني .. ؟

جاي يطمس الأسماء ويمحي الملمح

ويحطنا في السلسلة من تاني

زغروده من قلبك يا ست الدار

وافرح يا حساني.

لو ابن تجار

لو كنت سمسار

لو كنت تعرف تجيب العار يا حساني

كان يبقى شأنك تاني.

وما دام ما نعرفشي نكون تجار

ولا أمي دلاله

ولا أبوك سمسار

ولا ليك أراضي ولا عقار

ولا ليك موتور كار

ولا تليفون

ولا أسرار

إيه اللي حيخلينا ننسى أمريكا

صوت الدم .. ؟

مظبوط يا حساني

مظبوط يا ولد العم.

ما حناش حكام يابا

إحنا محاكيم غلابه

وما نعرف غير نهلل

لم تهل الديابه.

وساعات بنخاف نقول

ونكتف العقول

لكن ساعات الصمت

يتعدى ع الأصول

يلكزني حساني شهيد أكتوبر

بيد غرقانه دم

وعيون طايلها الهم

يسألني عن موته

ويهزني صوته

يقوللي:

لما انت ما بتكرهش أمريكا

أنا مت ليه .. ؟

واللي قتلني قوللي مين بالظبط . ؟

وقاللي حساني :

أكدبك .. ؟ حاشا

بس انت

ما تقولليش عاد الباشا

لإنه عاد من زمان.

وابنه اللي متربي على اليوم ده

رجع من زمان.

طلع وماله المستخبي بان

واستولى ع الشقة وع الدكان

ونظم الطوابير للغلبان

رجع اللي بيدرس أصول الهوان

يعلي صوته في القاعات

وينجعص في صفحة الجورنان.

رجع يدافع عن ماضيه الكبير

في ذل شعبه الفقير.

ودق رجله ف أول الفدان

وطرد أبو القوره

ع الأرض

محنيه .. والبصة مكسورة

وقطع الصورة.

ولما قام الصوات

مد الجوانتي سكت النسوان

دلوقت .. عاوز تكون . ؟

عيش الحياة الغلط

عيش المعاني الغلط

وابلعها ما هياش ظلط

تنح

وعدي وفوت.

وامشي ودوس ع العباد

وامشي ودوس ع القوت

واتدارى تحت العبط.

هذا أوان الأونطة

والفهلوه والشنطة

تعرف تقول جود نايت

وتفتح السمسونايت

وتبتسم بالدولار .. ؟

تقفل بيبان الوطن

وتقول بتفتحها . ؟

وترمي مفتاحها . ؟

وتبيع في أمك وأبوك .. ؟

عيش

بن

جبنه .. لواري .. ؟

ملعون أبوها الحواري

أما القرى

فدي في بلد تانية

ومجتمع تاني.

وداع يا أرض الوطن

تحت الطوفان الجديد.

يا ضحكة التجار

هيه اللي حتوصلنا لشطوط الأمان

وتصلي بينا العيد.

مكتوب ما دام غنيت في يوم النكسة

أغني يوم النصر

وانا

أحب أغني النصر في بلادي

بشرط يبقى النصر نصر الناس

نصر المكن ع الفاس

والعيشة بالإحساس

والطفل والكراس

ورغيف ما يبيعنيش في دكانه

وكرامة تهزم إهانة.

واحس ليا وطن

واحس ليا ناس

وحاجات ما ليهاش حصر.

ساعتها احس بمصر

مصر اللي شالتني صوت

وسقتني

خلقتني

وادتني اسمي وتوبي وسري وملامحي

وعلى حواف النهر غسلتني

وأنبتني لما ملت ف يوم

وصدقتني لما سألتني.

مصر الغلابه اللي بتخلق مصر

وان كان صحيح لعصرنا أصوات

يبقوا الغلابه

هم صوت العصر.

مالي ومالها البنوك .. ؟

لا هم كانوا قالو لك

ان الفلوس

بتخر من جيب أخوك .. ؟

ولو أقول الحق أبقى بازايد

ويبقى وحيي من بلد تانيه

وبرضه في الآخر

أطلع انا اللي كنت بأتاجر

مش التاجر.

وانا لا صحيفه ف يدي ولا جورنان

اشرح لشعبي القصة والعنوان.

موت يا فقير .

موت يا الفقير لما يبان لك صاحب.

في المعمعة لا قاضي ولا حاجب.

اليوم بيمشي

والزمن يندار.

فين الغنا اللي يلهب الثوار

ويخلق الأحرار . ؟؟

موت يا الفقير

خوض السفر بلا زاد

لا تعلم الأولاد

ولا تخلق الأعياد

ولا تحب العباد

ده كل واحد في حربه

ما عادتش حربنا واحده زي ما كانت ..

لأ حربنا حربين :

حرب الدولار والرغيف

حرب المدن والريف

موت يا الفقير ياللي طعامك جهاد

من إمتى شفنا الضرع ناشف .. وجاد؟

ودا .. ع

يا أرض الوطن تحت الطوفان

لإني ناوي اغرق مع الغرقان

لإني ناوي افقر مع الغلبان

وابحث عن الإنسان

في قلمي وف صوتي

وحافضل أقول الحق

حتى ولول ده كان سبب موتي.

فانا باحب الوطن

وده وطني

أنا مش غريب

أنا إبن أفقر حي في دروبه

واعرف أودي معاه واجيب

وأفهم الضحكة اللي صوتها نحيب.

ماحناش في زمن الشعب.

ماحناش جسد واحد

ولا احناش لون.

ولا مواجهين ببنادقنا الغلط في الكون.

ولا بندخل صعب

أخطف وفر

بلا شعب بلا غيره

إن كان هو يقر

إحنا نقر.

وإيقي وا .. ضح

زي ابتسامة السر.

وما اعرف ان كنت ابص

على العدو ف سينا

ولا

للي خاطف رغيفي في المدن والريف.

وإحنا لسه بنزرع تعلا مدارينا

تشيع الغله

نسفوا السفيف.

واسأل عيون المكن

ع اللي ف عيون الزمن

حتقول:

"أبو كدبه بان

وأبو همه بدري اتركن. "

كإنها مش بلدنا

كإنها مش مصر

وكإنها طالعه من اكتوبر

تخش سوق العصر

ينام العالم العربى
عبد الرحمن الابنودى

ينام العالم العربي

ليلاتي … زي ما بينام

بعواجيزه … بفتيانه

بأطفاله … بشبانه

قرا الجورنال

وملا سيارته بالبنزين

وشاف النشرة بعد الظهر

وقال في الانتفاضة كلام

وحياها

وبعدين … نام

***

نزل عمل الشوبنج

وفات على شركة الفيديو

وغير شنطة الأفلام

لبس وقلع لبس وقلع

وليف نفسه في الحمام

وقام للنوم

يكمل متعته أحلام

ونام العالم العربي ليلاتي زي ما بينام

وطول الليل

صحيتوا إنتوا

ولا بتوا ولا نمتوا

تلموا الجمر من تحت التراب والثلج

تضموا الجمر … وتحّتوا

بدت بحجارة

وانتهت الحجارة بنار

بدت أفراد

بقالها لجان يمين ويسار

بدت لكن… أهي فلسطين

بحور الناس موجات موجات

بتزحف عالعدو بقوة

كانوا عشرات

بقوا ميات

بقوا ألفات

هتاف واحد بدل هتافات

بدن واحد بل بدنات

علم واحد … عليه إشارات

علم مظلوم

وجاله يوم

يرفرف توبه في السموات

وله ضحكات

وله همسات

وله صيحات

بيتقدم خطى الزاحفين

وبينادي: أنا فلسطين

أنا فلسطين

أنا فلسطين

ظلمتوني وأديني … النضال ديني

وصوتي ما زال

ولوني ما زال

ورقصي ما زال

فلسطيني

فلسطيني

فلسطيني

ميعادنا في التاريخ قدام

ونام العالم العربي

ليلاتي زي ما بينام

***

ودي الليلة

سهرنا نغني بطولاتكم

ونشرب كاس في صحتكم

وكاس ورا كاس

في صحة أحلى وأجدع ناس

قزازة تؤدي لقزازة

وحيينا البنات … والصبر

وحيينا الشباب … والقبر

فلسطين خضرا جوه الخمر

أغرودة

زغرودة

وموجودة

وعلى الخارطة ما هياش سودا

ما هياش محتلة ولا حاجة

الاسم المشطوب

عبدالرحمن الأبنودي

اكشف غطا وجهك ومزع القناع
بلا حكومة .. بلا لكومة
بلا بطولة .. بلا بتاع
ياأسمر يأبو القلب الحديد
ياللي واجهت الموت ... في كل اتساع
ياأسمر يأبو الوجه العنيد
يا مصري ... ولحد النخاع
كله طلع كلام يا خال
والحال ..رجع تاني حال
أتاري الحرام..... هوه الحلال
وأتاري الهدى هوه الضلال
شموا نفسهم من جديد
والمرة دي ..
بدمك أنت يا بطل .... مع الأسف
وبعجنة اللحم اللي تتسمى الشهيد
ويعملوها عيد بليد
تعرفش بيه غير م الصحف .
واعترف ....
العيد بييجي ...
لاجل ما تموت من جديد
ولو ان موتك ريح بتغلب الرياح
لكنه ما حركش ليه أسن الحياه؟
ويا صاحبي ....
ما حركش ليه ألم الجراح؟
راح اللي راح
فلا انتظار ولا أمل
الحرب خلصت يابطل
والفرحة هبت ع الوطن ياصاحبي
من كل اتجاه
وزي ما قالوا: طلع نور الصباح
ورفرف العلم العظيم العالي
على كل الجباه
لكنه...
ليه من غير حياه؟
والنصر ليه على رقاب كل اللي عملوه
إتكى ؟
وليه في أرض المعركه
نسينا كل اللي بلغناه
بالمعاناه
والعرق وبالفخار ..وبالبكا
لما صحينا ع الحلم اللي ضاع
ونصرك اللي راح وما عادلوش شهود
وما عادش داخل الحدود
غير اللي سمسر
واللي قرقر
واللي وفر ... واللي باع؟!
***
اللي هوى الوطن .....هوى
بالعشق ولع وانكوى
من قبل ما يفتح ..... ذوى
يا أحلا أبناء الوطن
ترحل عليل......... بلا دوا
ترحل وحيد مجهول ...حزين
نرحل سوا؟!
***
نرحل سوا. أنا وانت والوطن الحبيب
ونسيبها للوطن الغريب
نسيبها للوطن المريب
لديب .. بيحرس الجياع
ولوهم اذا كشكش ..
بيزداد اتساع
وانت العريس اللي بنيت المجد
بايديك الجمال
وبقيت دريس طار في الخيال
وكأن حربك النبيله
لعبه لعبوها العيال
لعبوها ع الساكت
اتمرمغت الصفحة اللي فيها اسمك
حدوته...!
وشط الحواديت تاهت
الاسم مشطوب
والتاريخ ....باهت
ما فضلشي منه شيء يا عبد العاطي
لم العدو دباباته بعيد عن سينا
نسونا .. فنسينا
والاسم
كان لازم في سكة الخيانه
يتردم
واللي كتب عنك ندم
واللي وقف جنبك ندم
اضطر يفضح لعبة التبديد
وحاصروه بالوصم والتهديد
صبح الشريف موصوم
هوه الشريف اللي تمللي يتوصم
وبقى السليم مجزوم
يستعملوا وياه ياخال
لغة الجزم
وبقى الجبان صنديد
فارحل حزين مظلوم
ارحل سفيه موصوم
ارحل مريض ساكت
ارحل الى أبعد بعيد
***
مصر المهيبه بتنحدر للواطي
هل كنت تتخيل في يوم
السرعة دي في الموت يا عبد العاطي
حتى وانت قصاد صفوف الدبابات ؟
سامحني أنا ماعرفش كام عندك
من الأولاد وم البنات .
هل كنت تتخيل خيانة الوطن؟!
هل كنت تتخيل عبير هذا الزمن؟!
وهو صاعد للعلا نتن..؟!
وقول بحق .
ان كان قلبك خاف
والأر بي جي
مسنود على الأكتاف
ساعة اغتيال عساف؟
وهل خطر ع البال يا عبد العاطي
ان الخيانه حتسكن الآتي؟!
وان ملعوب لاتفاق ملعوب ؟
وان اكتوبر حيتباع ويا مصر؟
ــ الاتنين ــ في سوق العصر..؟
والمؤمنين
حيطردوا من صيغة المستقبل
ويصعد الخاطي ؟!!
دلوقت ايه اللي مضيق
صدرك الوسيع؟
وبتفهم ازاي الفروق
بين اشترا الوطن الأسير
والبيع؟
النصر تمنه اشتروا بيه قصر
تمن الوطن
اذن لدخول السمسره
ماكنتش حرب
ماكنش نصر
واللي رفضناه لاجل نتقدم
حدفنا بعيد ورا
***
ما تقولش زيي كان وكان
كان حيلة لاجل يموت فقيرها
في طوابير الهوان
وطنك يا صاحبي كان زمان
واللي احنا فيه
زمن العفاريت السمان
***
اصمد يا صاحبي لموتك العبثي
باعوا الوطن ياصاحبي بالمجان
مجان لكن ما تقدروش أتمان
ما راح زمان ( الشاذلي والجمسي )
وشمس سينا يوم ماعششت
صدرك العريان
غابت فانسى الحرب يا غلبان
أعداء وطننا صاروا أحبابه
ـــ مستمتعين بالوطن والوقت خان الوقت ــ
بيسلكوا وكأنهم أصحابه
أنت العدو دلوقت
أنت نشاز اللحن
أما احنا يا بطلي الحزين
فمدينا لهم للحياه
شريان ورا شريان
زعيقي وسط الخلق زي سكاتي
وتفاؤلي بقى جزء من احباطي
اتغيرت كل العقول
واتبدلت كل الفصول
واتعفرت كل الشموس
واتغبرت كل النفوس
وزي ما تقول قول!!
اسمك بهت
وكأن عمره ماكان
اتباع كأنه بضاعه ف الدكان
في الانفتاح على عورة الأوطان
آدي الجناة أبرار ...
وانت الخاطي .
وانت غلطة الوطن
في صفقة الشيطان
يا عبد العاطي
أنت نويت
وأتاري فيه غيرك نوى
ناس عليو فوق
وسابوك بتبحث في الفتات
عن الدوا
لكبدك اللي ما احتملش فانشوى
يا صاحبي موت أرجوك
وموت الغضب
الاسم كان هوه الهدف
رفرف على مرمى النيران
وكأنه قاصد ينضرب
الاسم ضلم وانشطب
ومصر مصرين
مصر احنا وهمه
لهم الغنايم والبهايم احنا
صوتهم وجع مسموم
بيسكن العصب
ويلهب اللهب
ياصاحبي موت أرجوك وموت الغضب
لعينيك ياصاحبي بانتمي
كان صدرك هوه صدر بلادي
من الهجير باجري عليه
واترمي
وأنا قصدي أغسل همي.. بازداد هم
عفوك ياعبد العاطي
الوطن عمي ( بكسر العين والميم)
وامشي وهملنا يابن العم
واسمك المشطوب
مازال هناك مكتوب
في قلب سينا في سرها الدفين
في صدور جميع المخلصين
المرضى زيك ياوطن
واللي حيغلبوا المحن
واللي حيجلو عنه عار الغبار
عشان يشع اسمك كأنه نهار
الاسم ـــ رمز العزة ـــ
بيصيبهم بداء
ينسوك ما ينسوك . الضمير متذكرك
هنا مش هنا ــ صدقني ــ
بكره حافكرك
مين اللي قال يامصر ابنك ضاع؟
دحنا حنعلن ع المشاع
اسم اللي باع حلمك ياعبدالعاطي
للشرق أو للغرب
للأهل أو للغرب ( بضم الغين)
ولحد داك اليوم
سيب الحياه تمشي لورا بالورب
مين ده ياعبد العاطي
أبو جته جامده وكرش؟
اللي بيحدف بالمتين مليار
ويعز ع الناس قرش؟!!
هل شفته يوم الضرب؟
هل كان معاك في الحرب؟
أتاري دم الشهدا له أتمان
تمن الشهيد مابيقبضوش والدب
انهب وصيع بينهبو المقاطيع
ويالله بيع كل اللي شلناه للزمان
ويكون شعار بلدك
وبدال ماتبني بيع.
هنا تكتشف ان الخراب
هوه الربيع
بيع المصانع والصحاري واشتري
آخر حدود الأرض والشواطيء
وهكذا
مصر اللي كانت ملكنا
واللي حميناها بصدرك عننا
انسحبت واحنا في عز النوم
انسحبت في السر وف كام يوم
هربت كده علنا يا عبدالعاطي
***
مش دي البلاد اللي حاربت عشانها
ولا هم دول ياصاحبي حكامها
ولا مصر دي اللي رفعت أعلامها
ورميت بروحك في خضم الحرب
ونيرانها.
فين احنا دلوقت ياعبد العاطي
مين اللي وطى العالي ياصاحبي ؟!!
وعلى الواطي ( بتشديد اللام في على )
مين اشترى بتمنك الصحرا والشاطي
وطاطي
فاكرنا وراه حنطاطي
وصالح القاتل وعادانا
وادانا ضهره وسابنا ببلاهه
نعد قتلانا
وهرب بمصر وخبى عنوانها؟!!
***
ارحل ياعبد العاطي
يابن الطيبين ارحل
ارحل وحيدمظلوم حزين أسهل
كل القصص ماتت
كل المثل ماعت
كل الحقوق ضاعت
البياعين باعت
أهل القيم صاعت
وأهل الحقوق جاعت
حتى اللي صابت
من جديد خابت
كله اتمسح والزور
هوه اللي شادد خطوته
وثابت
والنصر كان ياعم عبد العاطي
أهم أغلاطك وأغلاطي
ارحل بتتفرج على عشوش اللصوص
المحروسين ببدله ظباطي!!!
***
ياللي كسرت القانون
وحاولت وطنك يكون
مات الوطن
ورجعت الميه تاني تمشي في الواطي
يابطل زمانه فات
ياصياد الدبابات
يامجسد الحسرة
فى أسوأ معانيها
ماعدش غير الموت حرية
ارحل ياعبد العاطي
لا أكل ولا ميه
لاحلم بالألوفات ولا الميه
الحسرة وطنية
الحسرة وطنية
دواها لا من صبر ولا من نوم
انت الشهيد اللي ضل وعاش
لحد اليوم
ماعدش شيء ينباع
يا مزعج اللي تاجروا في النسيان
في وطن بيشم بالصمت
وما عادش لازمه سماع
***
عارفك ما متش علة
مت تعب
ماهو كام سنة يا صحابي
يحتمل الحطب... نار الغضب؟
وكل ما تبرق صور في الذاكرة
للدبابات اللي حرقت ( بفتح الحاء والراء )
أو الجنود اللي قتلت
ولما م الضحك اتمزعت
بفرحة النصر اللي كان ابداع
كل اللي ضاع منك
مع اللي ضاع
تخمدها بكفوفك بصمت رهيب
من غير ما تعتب ع الوطن
وتودي وياه في الألم
وتجيب
كلمنا وانت في السرير عيان
عن اللي ولى ...وخان
وعن اللي باع النصر ف الدكان
مش ده الوطن
اللي اتفقت معاه ياصاحبي زمان
تئن والأنين مرير
وانت بتقلب على السرير
سرير فقير
تطلق زفير الحزن في النفس الأخير
ولا الشاشات بكيت
ولا المذياع أذاع
فاكشف غطا وجهك
ومزع القناع
بلا حكومة
بلا رئاسة
بلا معارضة
بلا بتاع .!!

صلاح چاهين

الاسم زى الجواهر فى الضلام يلمع..

تسمع كلامُه ساعات تضحك ساعات تدمع

شاعر عظيم الهبات.. معنى ومبنى ياخال

يشوف إذا عَتَّمِت واتشبَّرت لاحْوال

كإنه شاعر ربابة.. ساكن الموّال

يقول.. وحتى إن ماقالش تحسّ إنه قال

ولا يقول م الكلام إلا اللى راح ينفع!!

■ ■ ■

المسألة مش قوافى قد ما هى رُؤَى..

الكون فى إيد البصير أصغر من البندقة

وضحكة الفيلسوف مِتجمعَّة من شقا

تفتحها تقفل عليك.. مِسا ده ولا صباح؟

والصوت ده وسط الفرح زغروتة والا نواح؟

يا بهجة الدنيا يا غنّيوة الأفراح

أكلوا تمورك وراضى لو صابوك «بالنّقا!!»

■ ■ ■

نزل من بطن أمُّه..

بصراخ موزون مُقفَّى

وكإن فنُّه.. دمُّه

وتقيل مع إنه خِفَّه
واسمُه.. صلاح جاهين

من صُغرُه آخر شقاوة

وله أمور عجيبة

يرسم رسومات نقاوة

ويقول حاجات غريبة
تأليف صلاح جاهين

■ ■ ■

يتهيألك مكشر

هوّه بيضحك لجّوه

وحتى لو يكركر

الوِشّ.. هوّه هوّه
ماركة صلاح جاهين

■ ■ ■

والدُه - وأنا شفتُه - قاضى

يزوره ف مكتبُه:

«أبويا.. دايماً راضى

وأنا نفسى أكتبه
وامضى: صلاح جاهين

■ ■ ■

يرسم يقرا الشوارع

والخلق فى الحوارى

وفى النظر كان بارع

للبايع.. واللى شارى
وارسم يا صلاح جاهين

■ ■ ■

وإن حَب الرسمة تنطق

يرسم واحد تخين

تتحير لو تدقّق

ده سعيد والاّ حزين
تلاقيه صلاح جاهين

■ ■ ■

يرسم يرفع ورقته

يبعدها.. ويقّربها

ويسألنا: «انبسطتوا»؟

كإنه... بيجرّبها
فينا.. صلاح جاهين

■ ■ ■

وكان يغّنى وطنه

بقلبه.. وبضميره

وكان عايش فى زمنه

مش فى زمن حدّ غيره
ما اسموش صلاح جاهين

■ ■ ■

وتعالى شوف يا صلاح

اللى جرى م اللى كان

سرقوا لون الصباح

وبهجة المكان..
ومكان صلاح جاهين

■ ■ ■

الظلم كِبر.. وسادِد

مصرك ماعادتش هيه

أضيق من القصايد

وأوسع من رباعية
كتبها صلاح جاهين

■ ■ ■

عاش عمره يشبه نفسُه

وفى صدقه شخص عادى

أمله رماه ليأسُه

قالّك: «بلاش السنادى»
ورحل صلاح جاهين

■ ■ ■

وكل ما جَسَدُه غاب

الراجل الأصيل

يحضر من الغياب

حانِنْ لنهر النيل
وامْضِة صلاح جاهين

» مجموعة مختارة من شعر ( صلاح جاهين )
» مجموعة مختارة من شعر الشاعر ( على سلامة )
» مجموعة مختارة من شعر ( فؤاد حداد )
» مجموعة مختارة من اشعار ( سيد حجاب )
» مجموعة مختارة من شعر ( أحمد رامى )