انا ورقه ممضيه..بختم الشعار
في الدرج مرميه..وطريقي مشوار
من ايد لايد...وفوت علينا بكره
فكرني صاحبي توهت..عملي نعي ذكري
في النص قال غلبان.....بيدور علي مصلحته
منحوس ده ولا كان......مش عارف فين مصلحته
الدرج كان مفتوح......مافهمتش ليه يا صاحبي
ابرز عشان تروح...وطلبك يمشي ويعدي
علي اده كان عايش...هيجيب منين يا ناس
وجوا الحيط كان ماشي..خايف قلبه ينداس
من ختم لختم ودرج لدرج...نزلنا البدروم طلعنا البرج
وده يقولك ناقص حرف....وده يقولك الختم مش باين
خدلنا تلت سنين كعب داير....واخرتها ايه والله مش باين
عيت يا صاحبي وموت كمان...وانا لسه بلف ودق البيبان
والورثه كمله يارب يستحملوا...وجيه يوم الفرج وقفنا نستقبله
جيه سياده المدير والحزن علي وشه
وبكل احترام وادب قال للورثه خشوا
يؤسفني.. يؤسفني بدايه ما طمنشي
الوزير اتغير وخلاص هيمشي
والوزير الجديد حط قرارات جديده
يعني القديم يتقطع ونبتديها جديده
الورثه اغمي عليهم يا ولداه
وانا بقيت ورقه مالهاش حياه
وهيكتبوا ورقه جديده واللفه من تاني
لوكنت عايش يا صاحبي كنت هتموت تاني
